އިމްޕޯޓް އެކްސްޕޯޓުން ދައުލަތަށް ލިބުނު އާމްދަނީ %30 ދަށްވެއްޖެ

މޯލްޑިވްސް ކަސަޓަމްސް ސަރވިސްގެ ތަފާސްހިސާބުތައް ދައްކާގޮތުން މިދިޔަ މަހު އިމްޕޯޓް އެކްސްޕޯޓުން ދައުލަތައް ލިބުނު އާމްދަނީ ވަނީ ދަށްވެފައެވެ. 2019 ވަނަ އަހަރުގެ ޑިސެމްބަރުމަހު 359 މިލިއަން ރުފިޔާ ދައުލަތަށް ލިބިފައިވާއިރު، މިދިޔަ އަހަރުގެ ޑިސެމްބަރުމަހު މި ޢަދަދުވަނީ 252 މިލިއަން ރުފިޔާއަށް ދަށްވެފައެވެ. އެހެންކަމުން މިއީ 30 އިންސައްތައިގެ ދަށްވުމެކެވެ.

އިމްޕޯޓް އެކްސްޕޯޓުން ދައުލަތައް ލިބުނު އާމްދަނީ ދަށްވެފައިވާއިރު އިމްޕޯޓްވެސް މި މުއްދަތުގައި ވަނީ ދަށްވެފައެވެ. ތަފާސް ހިސާބުތައް ދައްކާގޮތުން 2019 ވަނަ އަހަރުގެ ޑިސެމްބަރުމަހު ރާއްޖެއަށް 4.4 ބިލިއަން ރުފިޔާގެ މުދާ އިމްޕޯޓް ކޮށްފައިވާއިރު، މި އަހަރުގެ ޑިސެމްބަރުމަހު މި ޢަދަދުވަނީ 2.6 ބިލިއަން ރުފިޔާއަށް ދަށްވެފައެވެ. ދިވެހިރާއްޖެއަށް އެންމެ ގިނައިން މުދާ އެތެރެކޮށްފައިވާ ގައުމުތަކަކީ ޗައިނާ، ޔޫ.އޭ.އީ އަދި އިންޑިއާއެވެ.

advertisement

އެކްސްޕޯޓް ދަށްވިނަމަވެސް މިދިޔަމަހު ރާއްޖެއިން އެކްސްޕޯޓުކުރި މުދަލުގެ އަދަދު 8 އިންސައްތަ ވަނީ އިތުރުވެފައެވެ. ކަސްޓަމްސްގެ ތަފާސްހިސާބުތައް ދައްކާގޮތުން 2019 ވަނަ އަހަރުގެ ޑިސެމްބަރުމަހު ރާއްޖެއިން 425 މިލިއަން ރުފިޔާގެ މުދާ އެކްސްޕޯޓްކޮށްފައިވާއިރު މިދިޔަ އަހަރުގެ ޑިސެމްބަރުމަހު މިއަދަދު އުޅެނީ 459 މިލިއަން ރުފިޔާގައެވެ. ރާއްޖެއިން އެންމެ ގިނަ އަދަދަކަށް އެކްސްޕޯޓުކުރަނީ މަހުގެ ބާވަތްތަކެވެ. މިދިޔަ މަހު ރާއްޖެއިން އެންމެ ގިނައިން އެކްސްޕޯޓްކުރީ ތައިލެންޑަށެވެ. ދެވަނައަށް އެންމެ ގިނައިން މުދާ އެކްސްޕޯޓްކޮށްފައިވަނީ ޖަރުމަންވިލާތަށެވެ. އެއަށްފަހު އިންޑިއާއަށެވެ.
މިދިޔަ ޑިސެމްބަރ މަހު ރާއްޖެއިން މުދާ އެކްސްޕޯޓު ކުރި މިންވަރު އިތުރުވި ނަމަވެސް އިމްޕޯޓް ވަނީ ދަށްވެފައެވެ.