އެމްއެމްޕީއާރުސީގެ މިއަހަރުގެ ފުރަތަމަ ފެމިލިއަރައިޒޭޝަން ޓްރިޕް މެދުއިރުމަތީގެ ނޫސްވެރިންނަށް

އެމްއެމްޕީއާރުސީން ކުރިއަށްގެންދާ ފެމިލިއަރައިޒޭޝަން ޓްރިޕްގެ ފުރަތަމަ ދަތުރުގައި މެދުއިރުމަތީގެ ނޫސްވެރިން ރާއްޖެ ގެނެސްފިއެވެ. މިއީ މެދުއިރުމަތީގެ ޤައުމުތަކުގައި ރާއްޖޭގެ ފަތުރުވެރިކަން އިޝްތިހާރުކުރުމަށްޓަކައި ކުރިއަށްގެންދާ ޚާއްސަ މީޑިއާ ޓްރިޕެކެވެ.

މި ދަތުރުގައި މެދުއިރުމަތީގެ މަޝްހޫރު ހަތަރު މީޑިއާ ކަމަށްވާ ސެވޮއަރ ފްލެއަރ، ދަ ނެޝަނަލް، މިލޭނިއަމް މިލިޔަނަރ އަދި ފެކްޓް އަބޫދާބީގެ ތަޖުރިބާކާރު ހަތަރު ނޫސްވެރިން ވަނީ ރާއްޖެ އައިސްފައެވެ.
އެމްއެމްޕީއާރުސީން ބުނީ މި ފެމިލިއަރައިޒޭޝަން ޓްރިޕްގެ މަޤްސަދަކީ ރާއްޖެއަކީ މެދުއިރުމަތީގެ ފަތުރުވެރިން ޗުއްޓީ ހޭދަކުރަން ޒިޔާރަތްކުރަން އެންމެ މަގުބޫލު މަންޒިލްގެ ގޮތުގައި އިޝްތިހާރުކުރުމެވެ. އަދި ކޯމިޑް-19 އިން ރައްކާތެރިވުމަށްޓަކައި އެޅިފައިވާ ހަރުދަނާ ފިޔަވަޅުތަކުގެ ސަބަބުން ދިވެހިރާއްޖެއަކީ އާއިލާއާއެކު ޗުއްޓީ ހޭދަކުރުމަށް ވެސް އެންމެ ރައްކާތެރި އަދި ހިތްގައިމު މަންޒިލްގެ ގޮތުގައި އިޝްތިހާރުކުރުމަކީވެސް މި ދަތުރުގެ ބޭނުމެއްކަމަށް އެ ކުންފުނިން ވަނީ ބުނެފައެވެ.
މި މީޑިއާ ޓީމުން ރާއްޖޭގައި ހޭދަކުރާ ހަ ދުވަހުގެ ދަތުރުގައި ތިބުމަށް ހަމަޖެހިފައިވަނީ ގްރޭންޑް ޕާކް ކޮއްދިއްޕަރު އަދި ޝެރަޓަން މޯލްޑިވްސް ފުލް މޫން ރިސޯޓް އެންޑް ސްޕާގައެވެ.

އަދި މި ދަތުރަށްފަހު ދަތުރުގައި ބައިވެރިވި ކޮންމެ ނޫހެއްގެ ޕްރިންޓް، އޮންލައިން އަދި މީސްމީޑިއާގެ ޒަރިއްޔާއިން ރާއްޖޭގައި ލިބެން ހުންނަ ޚިދުމަތްތަކާއި ދަތުރުގައި ތިބި ކޮންމެ ރިސޯޓަކުން ފަތުރުވެރިންނަށް ލިބެން ހުންނަ ތަފާތު ތަޖުރިބާތަކާ ބެހޭ ލިޔުންތައް ޝާޢިރު ކުރާނެއެވެ. މި އާޓިކަލްތައް 3.7 މިލިއަނަށް ވުރެ ގިނަ މީހުންނަށް ފޯރާނެ ކަމަށް ލަފާކުރެވޭ ކަމަށް އެމްއެމްޕީއާރުސީން ބުނެއެވެ.

advertisement