އިންޑިއާ އިން ރާއްޖެއަށް ހަދިޔާކުރި “ކޮވިޝީލްޑް” ވެކްސިން އަށް އެމްއެފްޑީއޭ އިން ހުއްދަ ދީފި

އިންޑިއާ އިން ރާއްޖެއަށް ހަދިޔާކުރި “ކޮވިޝީލްޑް” ވެކްސިން އަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ހުއްދަ ދީފި އެވެ.

އެމްއެފްޑީއޭ އިން ނެރުނު ބަޔާނެއްގައި ބުނީ މި ވެކްސިނަށް ހުއްދަ ދޭން ނިންމީ މިހާރުގެ ހާލަތަށް ބަލައި “ރެސްޓްރިކްޓެޑް ޔޫސް އިން އިމަޖެންސީ ސިޗުއޭޝަން” ގައި ބޭނުންކުރުމަށް، ބައިނަލްއަގުވާމީ މިންގަނޑުތަކުން ބަލަންޖެހޭ ކަންކަމަށް ބެލުމަށް ފަހުގައި ކަމަށެވެ.

advertisement

ހުއްދަ ދޭން ނިންމީ މިކަމުގައި ބަލަންޖެހޭ ޓެކްނިކަލް ކަންކަން ފުރިހަމައަށް ބަލައި ދިރާސާކުރުމަށް ފަހު، އެމްއެފްޑީއޭގެ ފަންނީ ލަފާދޭ ޓެކްނިކަލް ބޯޑު ކަމަށްވާ ނެޝަނަލް ފާމަސޫޓިކަލް ބޯޑުގެ ލަފަޔާއި މަޝްވަރާގެ މަތިން ކަމަށް އެމްއެފްޑީއޭ އިން ވަނީ ބުނެފައެވެ.

ރާއްޖޭގައި ބަލީގެ ހާލަތު އޮތް މިންވަރަށް ބަލައި، ކޮވިޝީލްޑަށް ހުއްދަ ދިނީ އުމުރުން 18 އަހަރުން މަތީގެ މީހުންނަށް ޖެހުމަށް އެކަންޏެވެ. ނަމަވެސް މިއީ އަދި މާބަނޑު މީހުންނަށް ޓެސްޓުކޮށްފައިވާ ވެކްސިނަކަށް ނުވާތީ މާބަނޑު މީހުންނަށް ވެސް މި ވެކްސިން އަދި ނުދޭނެ އެވެ.

ކޮވިޝީލްޑަކީ އޮކްސްފޯޑް ޔުނިވަސިޓީ އާއި އެސްޓްރަޒެނެކާ ގުޅިގެން ތައްޔާރުކޮށްފައިވާ ވެކްސިންގެ ފޯމިއުލާއާ އެއްގޮތަށް، ދުނިޔޭގައި އެންމެ ގިނައިން ވެކްސިން އުފައްދާ ކުންފުނި، ސީރަމް އިންސްޓިޓިއުޓުން އުފައްދާ ވެކްސިނެވެ.

ރާއްޖެއަށް “ކޮވިޝީލްޑް” ގެ 100،000 ޑޯޒް މިހާރު ވަނީ ލިބިފައެވެ. އަދި އެސްޓްރަޒެނެކާ ވެކްސިންގެ 700،000 ޑޯޒް ގަންނަން ރާއްޖެއިން އެސްޓްރާޒެނެކާގެ ސިންގަޕޫރު ކުންފުންޏާ އެކު ވަނީ ސޮއިކޮށްފަ އެވެ.