ކަޅު ބިއްލޫރި ޖަހާފައިވާ ޓެކްސީތަކުގައި އެތެރެފެންނަ ބިއްލޫރިޖަހަން އަންގައިފި

ކަޅު ބިއްލޫރި ޖަހާފައިވާ ޓެކްސީތަކުގެ ބިއްލޫރި، ޓެކްސީ ޤަވާއިދާ އެއްގޮތަށް އެތެރެފެންނަ ސާފު ބިއްލޫރިއަށް ބަދަލުކުރުމަށް ޓްރާންސްޕޯޓް މިނިސްޓްރީން އަންގަވައިފިއެވެ. އެ މިނިސްޓްރީން މިހެން އަންގާފައިވަނީ ޓެކްސީ ޤަވާއިދާ ޚިލާފަށް ބައެއް ޓެކްސީތަކުގައި ކަޅު ބިއްލޫރި ބޭނުންކުރަމުންދާތީއެވެ.
ޓެކްސީ ޤަވާއިދުގެ 11 ވަނަ މާއްދާގައި ބަޔާންކޮށްފައިވަނީ ޓެކްސީކުރާ އުޅަނދުގެ ބިއްލޫރި ހުންނަންވާނީ މަގެއްގެ އަރިމަތީގައި ހުންނަ މީހަކު އާދައިގެ ގޮތަކަށް އެ އުޅަނދަށް ބަލާއިރު، އެ އުޅަނދުން ދަތުރުކުރާ ފަސިންޖަރުން ފެންނަގޮތަށްކަމަށެވެ. ކަޅު ބިއްލޫރި ޖަހައިގެން ދުއްވާ ޓެކްސީތަކުގެ ބިއްލޫރި ޤަވާއިދާ އެއްގޮތަށް ބަދަލު ކުރުމަށް ޓްރާންސްޕޯޓް މިނިސްޓްރީން ދެއްވާފައިވަނީ 6 މަސްދުވަހުގެ މުއްދަތެކެވެ. އެ މިނިސްޓްރީން ނެރުނު ބަޔާނެއްގައި ވިދާޅުވެފައިވަނީ 31 ޖަނަވަރީ 2021 އިން ފެށިގެން 06 މަސް ދުވަހުގެ ތެރޭގައި ޓެކްސީކުރާ އުޅަނދުތަކުގެ 4 ދޮރުފަތާއި ވިންޑްސްކްރީނުގެ ބިއްލޫރި އެތެރެ ފެންނަ ސާފު ބިއްލޫރިއަށް ބަދަލު ކުރުމަށް އަންގާ ކަމަށެވެ.
ޓެކްސީތަކުގައި ޖަހާފައިވާ ބިއްލޫރިއަކީ އެތެރެ ފެންނަ ފަދަ ބިއްލޫރިއެއްކަމަށް ޤަވައިދުގައި ކަނޑައަޅާފައިވަނީ ސަލާމަތާއި ރައްކާތެރިކަމަށްޓަކައެވެ. ކޯވިޑް19 ގެ ހާލަތާއި ގުޅިގެންވެސް ޓެކްސީތަކުގައި ވަކި ޙާއްސަ ގައިޑްލައިންއެއް ވަނީ ކަނޑައަޅާފައެވެ. އެގޮތުން ޓެކްސީގެ ކުރިއަށް ފަސިންޖަރުން ނޭރުވެއެވެ. އަދި ޑްރައިވަރާއި ވަސިންޖަރުންގެ ދެމެދުގައި ފަރުދާއެއް ޖަހަންޖެހެއެވެ.

advertisement