އަދާލަތު ޕާޓީގެ ރައީސަކަށް މިފަހަރުވެސް އިންތިހާބުވީ އިމްރާން

އަދާލަތު ޕާޓީގެ ރިޔާސީ އިންތިޚާބު ކާމިޔާބުކޮށް އެ ޕާޓީގެ ރައީސަކަށް ހޯމް މިނިސްޓަރ އިމްރާން އަބްދުﷲ އިންތިޚާބު ވެއްޖެއެވެ. އިމްރާން އެ ޕާޓީގެ ރައީސަކަށް އިންތިހާބުވެފައިމިވަނީ 3 ވަނަ ދައުރަށެވެ.
އަދާލަތު ޕާޓީން ބޭއްވި އިންތިޚާބުގެ ވަގުތީ ނަތީޖާ ދައްކާގޮތުން ހޯމް މިނިސްޓަރ އިމްރާން ޢަބްދުﷲ އާއި އެމަނިކުފާނުގެ ރަނިންމޭޓް އަޙްމަދު ޝަރީފަށް ވަނީ 921 ވޯޓު ލިބިވަޑައިގެންފައިއެވެ. މިއީ ވޯޓު ލީމީހުންގެ 84.65 އިންސައްތަ ވޯޓެވެ.
މި އިންތިޚާބުގައި ވާދަކުރެއްވި އިސްލާމިކް މިނިސްޓަރ ޑރ. އަޙްމަދު ޒާހިރުއާއި ރަނިންގ މޭޓް އަޙްމަދު ނަޝީދަށް ލިބިވަޑައިގެންނެވީ 167 ވޯޓެވެ. މިއީ ނިސްބަތުން ބަލާނަމަ 15.35 އިންސައްތަ ވޯޓެވެ.
ވޯޓުލުން ކުރިއަށްގެންގޮސްފައިވަނީ އޮންލައިންކޮނެވެ. ވޯޓުލުމުގެ ޙައްޤު ލިބިފައިވާ 6866 މީހުންގެ ތެރެއިން ވޯޓުގައި ބައިވެރިވެފައިވަނީ 23.88 އިންސައްތަ މީހުންނެވެ. މިއިންތިޚާބުގެ ދާއިމީ ނަތީޖާ އިއުލާނުކުރާނީ 5 ދުވަސް ފަހުންނެވެ.

އަދާލަތު ޕާޓީގެ ރައީސަކަށް އިމްރާން އައްޔަންކޮށްފައިވާއިރު އިމްރާނަކީ މިހާރުވެސް އެ ޕާޓީގެ ރައީސްއެވެ.

advertisement