ރާއްޖޭގައި ކޯވިޑް ވެކްސިން ޖަހަންފަށައިފި

ރާއްޖޭގައި ކޯވިޑް ވެކްސިން ދޭން މިއަދު ފަށައިފިއެވެ. ރާއްޖޭގައި ދޭން ފަށާފައިވަނީ އިނގިރޭސިވިލާތުގެ އޮކްސްފޯޑް ޔުނިވަރސިޓީއާއި ސިންގަޕޫރުގެ އެކްސްޓްރާ ޒެނެކާއިން ތައްޔާރުކޮށްފައިވާ ވެކްސިން ބަލައިގެން އިންޑިއާގެ ސެރަމް އިންސްޓިޓުއުޓްގައި ތައްޔާރުކޮށްފައިވާ “ކޮވިޝީލްޑް” ވެކްސިންއެވެ

ރާއްޖޭގައި ކޯވިޑް ވެކްސިންދޭން މިއަދު ފަށާފައިވާއިރު މާލެ ސަރަހައްދުގެ އިތުރުން ކުޅުދުއްފުއްޓާއި، އައްޑޫ ސިޓީގައިވެސް ވަނީ ވެކްސިން ޖެހުމުގެ މަސައްކަތް ރަސްމީކޮށް ފަށާފައެވެ. ކޯވިޑް ވެކްސިން ޖެހުމަށް ސޯސަލް ސެންޓަރުގައި ބޭއްވި ރަސްމިއްޔާތުގައި ފްރޮންޓްލައިންގައި މަސައްކަތްކުރާ ސިއްހީ ހިދުމަތްތެރިންނާއި، ސަރުކާރުގެ ބައެއް އިސް ފަރާތްތަކުން ވަނީ ވެކްސިން ޖައްސަވާފައެވ. އެގޮތުން ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހްއާއި، ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުޙައްމަދު ނަޝީދުއާއި، ބައެއް ވަޒީރުން ވަނީ ވެކްސިން ޖައްސަވާފައެވެ

advertisement

ކުރިއަށް އޮތްތަނުގައި ވެކްސިން ޖަހަމުން ގެންދާނީ ވެކްސިން ދިނުމަށް ކަނޑައަޅާފައިވާ އިސްކަންދޭ ތަރުތީބާ އެއްގޮތަށް ކަމަށް ހެލްތު ޕްރޮޓެކްޝަން އެޖެންސީން ވިދާޅުވެއެވެ. އަދި ރާއްޖޭގެ ހުރިހާ ހިސާބުތަކެއްގައިވެސް ކުރިއަށް އޮތް ދުވަސްތަކުގެ ތެރޭގައި ވެކްސިން ދޭން ފަށާނެ ކަމަށާއި މާލެ ސަރަހައްދުން ވެކްސިން ދިނުމަށް ހަމަޖެހިފައިވަނީ އައިޖީއެމްއެޗް އާއި ހުޅުމާލެ ހޮސްޕިޓަލާއި، ވިލިމާލެ ހޮސްޕިޓަލާއި އޭޑީކޭ ހޮސްޕިޓަލާއި ޓްރީޓޮޕް ހޮސްޕިޓަލުން ކަމަށް އެޗްޕީއޭއިން ވިދާޅުވެއެވެ. އައްޑޫ ސިޓީން ވެކްސިން ދޭނީ އައްޑޫ އިކުއެޓޯރިއަލް ހޮސްޕިޓަލުންނެވެ. ކުޅުދުއްފުށިން މިވެކްސިން ދޭނީ ކުޅުދުއްފުށީ ރީޖަނަލް ހޮސްޕިޓަލުން ކަމަށްވެސް އެޗްޕީއޭއިން މަޢުލޫމާތުދެއްވައެވެ

އިންޑިއާއިން ރާއްޖެއަށް ހަދިޔާ ކުރި ކޯވިޑް-19 ވެކްސިން “ކޮވިޝީލްޑް” ވެކްސިން ރާއްޖޭގައި ޖެހުމުގެ ހުއްދަ މޯލްޑިވްސް ފުޑް އެންޑް ޑްރަގް އޮތޯރިޓީން ދީފައިވަނީ މިމަހުގެ 28 ވަނަ ދުވަހުއެވެ. ކޮވިޝީލްޑް ވެކްސިންގެ 1 ލައްކަ ޑޯޒް ވަނީ ރާއްޖެއަށް ލިބިފައެވެ

އެމްއެފްޑީއޭއިން ހުއްދަ ދީފައިވަނީ ކޯވިޑް-19 ގެ ބަލިމަޑުކަމުން ރައްކާތެރިވުމަށް އުމުރުން 18 އަހަރުން މަތީގެ މީހުންނަށް މިވެކްސިން ބޭނުންކުރުމަށެވެ. އަދި މި ވެކްސިން މާބަނޑު މީހުން ބޭނުންކުރުމަށް ހުއްދަ ދޫކޮށްފައި ނުވެއެވެ