ފުރަތަމަ ދުވަހުވެސް 282 މީހަކަށް ކޯވިޑް ވެކްސިން ދީފި

ރާއްޖޭގައި ކޯވިޑް ވެކެސިން ދޭން ފެށި ފުރަތަމަ ދުވަހު 282 މީހަކަށް ވެކްސިން ދީފައިވާކަމަށް ހެލެތް ޕްރޮޓެކްޝަން އެޖެންސީ ވިދާޅުވެއްޖެއެވެ. ރާއްޖޭގައި ކޯވިޑް19 ގެ ވެކްސިން ދޭންފަށާފައިވަނީ އިއްޔެއެވެ. އިއްޔެ ރާއްޖޭގެ 3 ސަރަހައްދެއްގައި ވަނީ ވެކްސިން ދޭން ފަށާފައެވެ. އެއީ މާލޭގެ އިތުރުން އައްޑޫ ސިޓިއާއި ކުޅުދުށްފުށި ސިޓީގައެވެ.

ރާއްޖޭގެ ފުރަތަމަ މި ވެކްސިން ޖެއްސެވީ ހުޅުމާލެ މެޑިކަލް ފެސިލިޓީއާއި ހަވާލުވެޑައިގެން ހުންނެވި އައިޖީއެމްއެޗްގެ ޑޮކްޓަރ ޑރ. ޝިރާނީ އަބްދުއްރަހީމްއެވެ. އޭގެއިތުރުން ރައީސުލްޖުމްހޫރިއްޔާ އިބްރާހިމް މުހައްމަދު ސާލިހާއި ދައުލަތުގެ ބައެއް އިސްވެރިންނާއި ފްރަންޓްލައިންގައި މަސައްކަތްކުރާ ބައެއް ފަރާތްތަކުން ވަނީ ވެކްސިން ޖަހާފައެވެ.
ވެކްސިންގެ ފުރަތަމަ ދުވަހު އައްޑޫ ސިޓީއާއި ކުޅުދުށްފުށީ ސިޓީގައި ކޮންމެ ސިޓީއަކުން 30 މީހުންނަށް ވަނީ ވެކްސިން ދީފައެވެ.

ރާއްޖޭގައި ޖަހަނީ އިންޑިއާއިން ރާއްޖެއަށް ހަދިޔާކުރި ކޮވިޝިލްޑް ވެކްސިންއެވެ. އެ ޤައުމުން ވަނީ ރާއްޖެއަށް ކޮވިޝިލްޑްގެ 1 ލައްކަ ޑޯޒް ހަދިޔާކޮށްފައެވެ. ކޮވިޝިލްޑްގެ 1 ލައްކަ ޑޯޒް ރާއްޖެ ގެނެސްފައިވަނީ މިދިޔަމަހުގެ 20 ވަނަދުވަހުއެވެ. ރާއްޖެއަށް އިތުރު ވެކްސިންގެ ޑޮޒްތައް ހޯދުމުގެ މަސައްކަތް މިހާރު ސަރުކާރުން ދަނީ ކުރައްވަމުންނެވެ. އަދި 6 މަސްދުވަހުގެ ތެރޭގައި ރާއްޖޭގެ އާބާދީއަށް އެއްކޮށް ވެކްސިން ޖަހާ ނިމޭނެކަމަށް ސަރުކާރުން ވިދާޅުވެއެވެ