ކޯވިޑް ކޮންޓްރޯލްކުރަން އެޅި ފިޔަވަޅުތަކާއިއެކު ބީއެމްއެލްގެ ޙިދުމަތް ދިނުމަށް ބަދަލުތަކެއް

ކޮވިޑް-19 ފެތުރުން ކޮންޓްރޯލް ކުރުމަށް އެޗްޕީއޭއިން އެޅި ފިޔަވަޅުތަކާއެކު ބީއެމްއެލް އިން ހިދުމަތް ދޭ ގޮތްތަކަށް ބަދަލު ގެނެސްފި އެވެ.

ބީއެމްއެލްއިން ބުނީ ބެންކުގެ ޙިދުމަތްތަކަށް ގެނައި ބަދަލާއިއެކު މިހާރު އެ ބޭންކުން ހިދުމަތްދޭނީ މުވައްޒަފުން ވަކިވަކި ޓީމްތަކަށް ބަހާލައިގެންކަމަށެވެ. މީގެއިތުރުން ބީއެމްއެލްގެ މުވައްޒަފުންނަށް ގޭގައި ތިބެގެން މަސައްކަތް ކުރެވޭނެ އިންތިޒާމުތައް ވެސް މިހާރު ވަނީ ހަމަޖައްސާފައެވެ.

advertisement

ބީއެމްއެލްއިން ޙިދުމަތްދޭ ގޮތައް ބަދަލުގެނެސްފައިވަނީ މުވައްޒަފުންނާއި ކަސްޓަމަރުންގެ ރައްކާތެރިކަން ކަށަވަރު ކުރުމަށްކަމަށެވެ. މިއާއިއެކު ބައެއް ޙިދުމަތްތައް ލިބުމުގައި ކުރިއާއި އަޅާބަލާއިރު ލަސްތަކެއް ދިމާވުމަކީ އެކަށީގެންވާ ކަމެއްކަމަށް ބީއެމްއެލްއިން ވަނީ ބުނެފައެވެ. އޭގެތެރޭގައި އަމިއްލަ ފަރުދުންނާއި ވިޔަފާރިތަކުގެ އެކައުންޓް ހުޅުވުމާއި، ރާއްޖޭން ބޭރަށް ފައިސާ ފޮނުވުމާއި، ކާޑު އަދި ޗެކް ޕްރޮސެސް ކުރުމާއި، ރަށްރަށުގައި ބަހައްޓާފައިވާ އޭޓީއެމް ސާވިސް ކުރުމުގެ މަސައްކަތްތައް ހިމެނެއެވެ.

ކޯވިޑް19 ގެ ކޭސްތައް ރާއްޖޭގައި ފެންނަ މިންވަރު އަނެއްކާވެސް އިތުރުވާން ފެށުމާއިއެކު ކުރިން ލުއިދިން ގިނަ ކަންކަން ވަނީ އަލުން މަނާކޮށްފައެވެ. އަދި އޮފީސްތަކުން ޙިދުމަތްދޭއިރުވެސް ވީހާވެސް މަދު މުވައްޒަފުން ނެރެގެން މަސައްކަތްކުރުވުމަށާއި ގޭގައި ތިބެގެން މަސައްކަތްކުރެވެންހުރި މުވައްޒަފުންނަށް އެ ފުރުސަތު ދިނުމަށް ވަނީ ސަރުކާރުން އަންގާފައެވެ.