ރިލީޕް ޕެކޭޖްގެ ދަށުން 1 ބިލިއަނަށްވުރެ ގިނަ ރުފިޔާ ވިޔަފާރިތަކަށް ދޫކޮށްފިން – ރައީސް

ކޯވިޑް ރިލީފް ޕެކޭޖްގެ ދަށުން އަމިއްލަ މަސައްކަތްކުރާ ފަރާތްތަކާއި ވިޔަފާރިތަކަށް 1 ބިލިއަނަށްވުރެ ގިނަ ރުފިޔާގެ ލޯނު ދޫކޮށްފައިވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިޙް ވިދާޅުވެއްޖެއެވެ.

advertisement

މިއަހަރަށް ރައްޔިތުންގެ މަޖިލިސް ހުޅުވުމުގެ ޖަލްސާގައި، ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހް ވިދާޅުވީ، ކޯވިޑް-19ގެ ސަބަބުން، ނިސްބަތުން އިޤްތިޞާދީ އެންމެ ބޮޑު ގެއްލުމެއް ލިބުނު އެއް ޤައުމަކީ ދިވެހިރާއްޖެކަމަށެވެ.

އިޤްތިސާދު ހީނަރުވިޔަ ނުދިނުމަށްޓަކައި ރިލީޕް ޕެކޭޖްގެ ތެރެއިން ވިޔަފާރިތަކަށް 1 ބިލިއަނަށްވުރެ ގިނަ ރުފިޔާގެ ލޯނު ސަރުކާރުން ދޫކޮށްފައިވާކަމަށް ރައީސުލްޖުމްހޫރިއްޔާ ވިދާޅުވިއެވެ. މީގެއިތުރުން ކޯވިޑް-19ގެ ސަބަބުން ވަޒީފާ ގެއްލުނު 17147 މީހަކަށް 221 މިލިއަނަށްވުރެ ގިނަ ރުފިޔާވެސް މި ސަރުކާރުން ދޫކޮށްފައިވާކަމަށް ރައީސް ވިދާޅުވިއެވެ.

“ކަރަންޓާއި ބިލުތަކުން 117 މިލިއަން ރުފިޔާއަށްވުރެ ބޮޑު ޢަދަދެއް ކަނޑައިލަދިނިން. ސަރުކާރުގެ ރިލީފް ޕެކޭޖްގެ ތެރެއިން ކުދި އަދި މެދުފަންތީގެ ވިޔަފާރިތަކަށާއި، އަމިއްލަ މަސައްކަތްކުރާ މީހުންގެ އިތުރުން، ދިވެހިންގެ ވަޒީފާތައް ރައްކާތެރިކުރުމަށް ޝަރުތުކޮށް، ބޮޑެތި ވިޔަފާރިތައްވެސް ހިމެނޭ ގޮތަށް، 1 ބިލިއަނަށްވުރެ ގިނަ ރުފިޔާގެ ލޯނު ވަނީ ދޫކޮށްފައި.” ރައީސް ވިދާޅުވިއެވެ.

މި އަހަރުގެ ތެރޭގައިވެސް، ކުދި އަދި މެދު ފަންތީގެ ވިޔަފާރިތަކަށް ލޯން ދޫކުރުމަށް ސަރުކާރުން ވަނީ ނިންމާފައެވެ. އެކަމަށްޓަކައި މިއަހަރުގެ ބަޖެޓްގައި 400 މިލިއަން ރުފިޔާ ވަނީ ކަނޑައަޅާފައިވާކަމަށް ރިޔާސީ ބަޔާނުގައި ރައީސް ވަނީ ވިދާޅުވެފައެވެ.

ކޯވިޑް ރިލީފް ޕެކޭޖްގެ ދަށުން ކުދި ފަންތިއާއި މެދުފަންތީގެ ވިޔަފާރިތަކަށް ލޯނު ދޫކުރަނީ އެސްއެމްއީ ބޭންކުންނެވެ. އަދި ބޮޑެތި ވިޔަފާރިތަކަށް ލޯނު ދޫކުރަމުންއައީ ބީއެމްއެލްއިންނެވެ.