އަހަރުގެ މިހާތަނަށް ޕޮޒިޓިވް ވެފައިވަނީ 160 ފަތުރުވެރިން

އަހަރުގެ މިހާތަނަށް ރާއްޖެއައި ފަތުރުވެރިންގެ ތެރެއިން ކޯވިޑަށް ޕޮޒިޓިވްވެފައިވަނީ 160 ފަތުރުވެރިންކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ޓޫރިޒަމް މިނިސްޓްރީން އާންމުކޮށްފައިވާ ހިސާބުތަކުން ދައްކާ ގޮތުން މިމަހުގެ 3 ވަނަ ދުވަހާއި ހަމައަށް ރާއްޖެއަށް 99،379 ފަތުރުވެރިން ވަނީ ރާއްޖެ އައިސްފައެވެ. މީގެތެރެއިން ކޯވިޑަށް ޕޮޒިޓިވްވެފައިވަނީ 0.09 އިންސައްތަ ފަތުރުވެރިންނެވެ. މިއީ ޖުމްލަ 160 ފަތުރުވެރިންނެވެ. މިވަގުތު އެކްޓިވް ކޭސްތަކުގެ 90 އެވެ. ޕޮޒިޓިވްވި ޓޫރިސްޓުންގެ ތެރެއިން 70 ޓޫރިސްޓުން މިހާރު ވަނީ ބަލިން ރަނގަޅުވެފައިކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ.

advertisement

ޓޫރިޒަމް މިނިސްޓްރީން މީގެކުރިންވެސް ވިދާޅުވެފައިވަނީ ރާއްޖެ އަންނަ ފަތުރުވެރިންގެ ތެރެއިން ކޯވިޑަށް ޕޮޒިޓިވްވަނީ ނިސްބަތުން މަދު އަދަދެއްގެ ފަތުރުވެރިންކަމަށެވެ. މިދިޔަ އަހަރުގެ ޖުލައި މަހުގެ ތެރޭގައި ރާއްޖޭގެ ފަތުރުވެރިކަން ޓޫރިޒަމް މިނިސްޓްރީން ހުޅުވާލާފައިވަނީ ރައްކާތެރިކަމުގެ ފިޔަވަޅުތައް އަޅައިގެންނެވެ. ފަތުރުވެރިކަން ހުޅުވާލި މަދު ގައުމުތަކުގެ ތެރޭގައި ރާއްޖެ ހިމެނޭއިރު ފަތުރުވެރިން ޕޮޒިޓިވްވާ އަދަދު ދަށްކޮށް ހިފެހެއްޓިފައިވަނީ ކޯވިޑުން އަރައިގަތުމަށް ރާއްޖެއިން ކަނޑައަޅާފައިވާ ހަރުދަނާ ފިޔަވަޅުތަކުގެ ސަބަބުންނެވެ.