50 އަހަރުން މަތީގެ ހައިރިސްކް މީހުންނަށް ވެކްސިން ޖަހަން ފަށައިފި

އުމުރުން 50 އަހަރާއި 55 އަހަރާއި ދެމެދުގެ މީހުންގެ ތެރެއިން ހައި ރިސްކު މީހުންނަށް ވެކްސިން ދޭން ފަށައިފިއެވެ. މި އުމުރުގެ ހައި ރިސްކް މީހުންނަށް ވެކްސިން ދޭންފަށާފައިވަނީ މިއަދުއެވެ.

މާލޭ ސަރަހައްދުގައި އުޅޭ 50-55 އަހަރުގެ މީހުންގެ ތެރެއިން ހައި ރިސްކު މީހުންނަށް ވެކްސިން ދެނީ ސޯޝަލް ސެންޓަރާއި ހުޅުމާލެ ފްލޫ ކްލިނިކުގައި ހެނދުނު 9:00 އިން ހަވީރު 5:00 އާ ހަމައަށެވެ. އަދި ވިލިމާލެ ޔޫތު ސެންޓަރުގައި ވެކްސިން ދިނުން އޮންނާނީ ހެނދުނު 9:00 އިން މެންދުރު 1:00 އަށެވެ.

advertisement

50 އަހަރާއި 55 އަހަރާއި ދެމެދުގެ މީހުންގެ ތެރެއިން ވެކްސިން ދިނުމަށް އިސްކަންދޭ މީހުންގެ ތެރޭގައި ހަކުރު ބަލި ހުންނަ މީހުންނާއި، ކިޑްނީ ބަލީގެ މީހުންނާއި، ބައްޔެއްގެ ސަބަބުން ނުވަތަ ބޭނުންކުރާ ބޭހުގެ ސަބަބުން ދިފާއީ ނިޒާމް ބަލިކަށިވެފައިވާ މީހުންނާއި، ދިގު މުއްދަތަކަށް ފުރަމޭގެ ބައްޔެއް ތަހައްމަލުކުރާ މީހުން ހިމެނެއެވެ. މީގެއިތުރުން ތެލަސީމިއާ/ސިކްލް ސެލް އެނީމިއާ ހުންނަ މީހުންވެސް ހިމެނެނީ ހައިރިސްކު މީހުންގެ ތެރޭގައެވެ.

55 އަހަރުން މަތީގެ ހުރިހާ މީހުންނަން ސެންޓަރުތަކަށް ދިއުމުން ވެކްސިން ޖަހައިދޭނެ އެވެ. ވެކްސިން ޖަހަން ދާއިރު އެއީ ކާކުކަން އަންގައިދޭ ލިޔުމަކާއި ބޭނުންކުރާ ބޭހުގެ މައުލޫމާތު ގެންދަންޖެހެއެވެ. އަދި ވެކްސިން ޖަހަން ފަސޭހައިން ކޮނޑު ދެއްކޭނެ ފަދަ ހެދުމެއް ލާން އެޗްޕީއޭ އިން އެދެ އެވެ.

ރާއްޖޭގައި ވެކްސިން ޖަހަން ފެށީ މިމަހުގެ 1 ވަނަ ދުވަހުއެވެ. މިހާތަނަށް ރާއްޖޭގައި 12،934 މީހުންނަށް ވެކްސިން ވަނީ ޖަހާފައެވެ.