ކޯވިޑް ފެތުރޭތީ އައްޑޫގައި ކެފޭ ރެސްޓޯރަންޓް ހުޅުވައިގެން ޙިދުމަތްދިނުން މެދުކަނޑާލައިފި

އައްޑޫސިޓީގައި ކޯވިޑް-19 އަށް ޕޮޒިޓިވްވި މީހުންގެ އަދަދު އިތުރުވުމާއި ގުޅިގެން އެ ސިޓީގެ ކެފޭ ރެސްޓޯރެންޓު ހުޅުވައިގެން ޚިދުމަތް ދިނުން މެދު ކަނޑާލައިފިއެވެ.
އައްޑޫސިޓީ މިވަގުތު އޮތީ މޮނީޓަރިން އަށް ލާފައެވެ. އައްޑޫ ސިޓީ ކައުންސިލުން ކުރި އިއުލާނުގައި ބުނެފައިވަނީ، އައްޑޫގައި މިވަގުތު ކޮމިއުނިޓީ ސްޕްރެޑެއް އޮވެދާނެ ކަމަށް ލަފާ ކުރެވޭތީ ކޯވިޑް ހުއްތުވުމަށް ޙާއްސަ ފިޔަވަޅުތަކެއް އަޅަން ނިންމާފައިވާ ކަމަށެވެ.
މި ފިޔަވަޅުތަކުގެ ތެރޭގައި ހިމަނައިގެން ކެފޭ ރެސްޓޯރެންޓް ތަކުން ޑެލިވަރީގެ ޚިދުމަތާއި ޓޭކްއަވޭ ޚިދުމަތް އެކަނި ދިނުމަށް ކައުންސިލުން ވަނީ އަންގާފައެވެ. އަދި ގާޑިޔާ ތަކުން ޚިދުމަތް ދިނުން މެދު ކަނޑާލުމާއި އާންމު ވިޔަފާރި ކުރާތަންތަނުން އެއްފަހަރާ ކަނޑައެޅިފައިވާ އަދަދަށް ޚިދުމަތް ދިނުމަށް ވަނީ އަންގާފައެވެ. މީގެ އިތުރުން އާންމު މައިދާން ތަކާއި ތަންތަނަށް މީހުން އެއްވުން ސިޓީ ކައުންސިލުންވަނީ މަނާކޮށްފައެވެ.

އައްޑޫ ސިޓީން ކޯވިޑަށް ޕޮޒިޓިވްވި މީހުންގެ އަދަދު މިހާރު ވަނީ 40 އިން މައްޗަށް އަރާފައެވެ. ކޮމިއުނިޓީ ސްޕްރެޑެއް އޮވެދާނެތީ ޒަރޫރީ ބޭނުންތަކަށް ނޫންގޮތަށް ބޭރަށް ދިއުން ރައްކާތެރި ނޫން ކަމަށް ކައުންސިލުން ވިދާޅުވެއެވެ.

advertisement