މާސްކް ނާޅައިގެން 1500 އަށްވުރެ ގިނަ މީހުން ޖޫރިމަނާކޮށްފި

މާލެ ސަރަހައްދުގައި މާސްކް ނާޅައިގެން 1500 އަށްވުރެ ގިނަ މީހުން ޖޫރިމަނާކޮށްފިއެވެ.

ފުލުހުން އާންމުކުރި ތަފާސް ހިސާބުތައް ދައްކާގޮތުން މިދިޔަ މަހުގެ 31 ވަނަދުވަހު ފެށިގެން މިމަހުގެ 8 ވަނަ ދުވަހުގެ ނިޔަލަށް މާސްކު ނަޅާ އުޅެގެން 1551 މީހަކު ވަނީ ޖޫރިމަނާކޮށްފައެވެ. އެންމެ ގިނަ މީހުން ޖޫރިމަނާކުރީ 4 ފެބްރުއަރީގައެވެ. އެދުވަހު މާސްކު ނާޅާ ބޭރުގައި އުޅުމުގެ ސަބަބުން 284 މީހުން ޖޫރިމަނާކޮށްފައިވެއެވެ.

advertisement

ކޯވިޑުން ރާއްކާތެރިވުމަށް އަޅާފައިވާ ފިޔަވަޅުތައް އިތުރަށް ހަރުކަށި ކުރީ މިދިޔަ މަހުގެ 31 ވަނަދުވަހުއެވެ. މިހާރު މާލެ ސަރަހައްދުގައި ރޭގަނޑު 8:30 އިން ފަތިހު 4:00 އަށް އެއްގަމު އުޅަނދު ދުއްވުމަކީ މަނާކަމެކެވެ. އަދި ދަންވަރު 11:30 ފެށިގެން ފަތިހު 04:00 މާލޭގައި މަގުމައްޗަށް ނުކުމެ އުޅުން ވަނީ މަނާކޮށްފައެވެ.

ކާފިއުގެ ވަގުތުގައި ބޭރުގައި އުޅުނު 988 މީހަކު ޖޫރިމަނާކޮށްފައިވާކަމަށްވެސް ފުލުހުންގެ ހިސާބުތަކުން ދައްކައެވެ. އަދި މި މުއްދަތުގެ ތެރޭގައި ކާފިއު ވަގުތަކުގައި ވެހިކަލް ދުއްވައިގެން 271 އުޅަނދެއް ޖޫރިމަނާކޮށްފައިވާކަމަށްވެސް ފުލުހުންގެ ތަފާސްހިސާބުތަކުން ދައްކައެވެ.

މިމަހުގެ 7 ވަނަ ދުވަހުން ފެށިގެން މީހުން ދިރިއުޅޭ ހުރިހައި ރަށެއްގައި ބޭރަށްދާއިރު މާސްކް އެޅުން ވަނީ މަޖުބޫރުކޮށްފައެވެ. އަތޮޅުތެރޭގެ ރަށްރަށުގައިވެސް ކޯވިޑްގެ ކޭސްތައް ފެންނަ މިންވަރު މިހާރު ވަނީ އިތުރު ވެފައެވެ. އަދި ބައެއް ރަށްރަށުން ނަގާ ރޭންޑަމް ސާމްޕަލްތައްވެސް އަންނަނީ ޕޮޒިޓިވްވަމުންނެވެ. ކޯވިޑްގެ ކޭސްތައް ފެންނަ މިންވަރު މާލެ ސަރަހައްދުގައިވެސް އަނެއްކާ މިހާރު ވަނީ އިތުރުވާންފަށާފައެވެ.