އައްޑޫ ސިޓީގައި ރޭގަނޑު 8 އިން ފަތިހު 4:30 އަށް ބޭރަށް ނިކުތުން މަނާކޮށްފި

ރޭގަނޑު 8:00އިން ފަތިހު 4:30އަށް އައްޑޫ ސިޓީގައި ކާފިއު ހިންގަންފަށައިފިއެވެ. އައްޑޫގައި ގިނަ އަދަދެއްގެ ކޯވިޑް ކޭސްތައް ފެނުމާއި ގުޅިގެން އެ ސިޓީވަނީ މޮނިޓަރިންއަށް ލާފައެވެ.
އައްޑޫ ސިޓީގައި ކޮވިޑް ރޯގާ ފެތުރުން ކޮންޓްރޯލްކުރުމަށް ރޭ ދަންވަރު 12:00އިން ފެށިގެން ފިޔަވަޅުތައް ވަރުގަދަ ކުރުމަށް ޑިރެކްޓާ ޖެނެރަލް އޮފް ޕްބްލިކް ހެލްތް، މައިމޫނާ އަބޫބަކުރު ވަނީ ނިންމާފައެވެ. މި ފިޔަވަޅުތަކުގެ ތެރޭގައި އައްޑޫ ސިޓީގައި ރޭގަނޑު 8:00އިން ފެށިގެން ފަތިހު 4:30އަށް، އެއްގަމު އުޅަނދުފަހަރު ދުއްވުމާއި މަގުމައްޗާއި އާންމު ތަންތަނަށް މީހުން ނުކުތުން ވަނީ މަނާކޮށްފައެވެ. އަދި އައްޑޫގެ އެއް އަވަދުން އަނެއް އަވަށަށް ދިޔުމާއި ޕާޓީތަކާއި ހަފްލާތަކާއި ރަސްމިއްޔާތުތައް ބޭއްވުންވެސް ވަނީ މަނާކޮށްފައެވެ.
މީގެއިތުރުން އައްޑޫގައި އަޅާފައިވާ އިތުރު ފިޔަވަޅުތަކުގެ ތެރޭގައި ހޮޓާތަކާއި ރެސްޓޯރެންޓްތައް ބަންދުކުރުމާއި، އެއްފަހަރާ ތިން މީހުންނަށްވުރެ ގިނަ މީހުން އެއްވެ އުޅުން މަނާކުރުމާއި، ސެލޫން، ޖިމް އަދި ބޯކޮށާ ތަންތަން ބަންދުކުރުމާއި، ހުރިހާ ކުޅިވަރު ހަރަކާތްތަކާއި ކަސްރަތުގެ ހަރަކާތްތައް ހިންގުން ހުއްޓާލުމާއި، ޓެކްސީ ހިދުމަތް ދޭ ފަރާތްތަކުން އެޗްޕީއޭގެ ގައިޑްލައިނާ އެއްގޮތަށް ހިދުމަތް ދިނުން ހިމެނެއެވެ. މީގެއިތުރުން ފިހާރަތާކާއި ބޭންކުތަކުން އެޗްޕީއޭގެ ގައިޑްލައިނާ އެއްގޮތަށް ހިދުމަތް ދިނުމާއި، ޔުނިވާސިޓީ/ކޮލެޖް/ސްކޫލަތަކުގެ ދަރިވަރުން ހާޒިރުވެގެން ކްލާސްތައް ކުރިއަށް ނުގެންދިޔުން ހިމެނެއެވެ.

އައްޑޫގައި މި ފިޔަވަޅުތައް އަޅާފައިވަނީ، ހަތް ދުވަހުގެ މުއްތަކަށެވެ. އައްޑޫ ސީޓީން ޖުމްލަ 80 އަށް ވުރެ ގިނަ މީހުން މިހާރު ވަނީ ކޮވިޑަށް ޕޮޒިޓިވްވެފައެވެ.

advertisement