ކުރިއަށްއޮތް 2 ހަފްތާއަށް މާލެ ސަރަހައްދުގެ ގްރޭޑް 6 އިން ދަށުގެ ކިޔެވުން އޮންލައިންކޮށް

މާލޭ ސަރަޙައްދުގެ ސްކޫލްތަކުގެ ގްރޭޑް 6 އިން ދަށުގެ ކިޔެވުން ކުރިއަށް އޮތް ދެ ހަފްތާއަށް އޮންލައިންކޮށް ކުރިއަށް ގެންދިއުމަށް އެޑިއުކޭޝަން މިނިސްޓްރީން ހަމަޖައްސަވައިފިއެވެ. އެޑިޔުކޭޝަން މިނިސްޓްރީން ވިދާޅުވީ، 14 ފެބުރުއަރީން ފެށިގެން 25 ފެބުރުއަރީއަށް މާލެ ސަރަހައްދުގެ ސްކޫލްތަކުގެ ގްރޭޑް އެކަކުން ހަޔަކަށް ކިޔެވުން ކުރިއަށް ގެންދާނީ އޮންލައިންކޮށްކަމަށެވެ.
ގްރޭޑް ހަޔަކުން ދަށުގެ ދަރިވަރުންނަށް އޮންލައިންކޮށް ކިޔަވައިދޭ ގޮތަށް ހަމަޖެއްސެވީ މާލެ ސަރަހައްދުގައި ކޯވިޑް-19 އިތުރުވަމުން ދާތީ އެޗްޕީއޭގެ އިރުޝާދުގެ މަތިން ބަލި ފެތުރުން ކޮންޓްރޯލް ކުރުމަށްޓަކައި އަޅާ ފިޔަވަޅެއްގެ ގޮތުން ކަމަށް އެޑިއުކޭޝަން މިނިސްޓްރީން ވިދާޅުވެއެވެ.
އެޑިއުކޭޝަން މިނިސްޓްރީންވަނީ މާލޭ ސަރަޙައްދުގެ ޕްރީ ސްކޫލުތަކާއި ނާސަރީ ކްލާސްތަކުގެ ދަރިވަރުން ސްކޫލަށް ހާޟިރުކޮށްގެން ކިޔަވައިދިނުންވެސް މިމަހުގެ ދެވަނަ ދުވަހުން ފެށިގެން މެދުކަނޑާލާފައެވެ.
ރާއްޖޭގެ ސްކޫލްތަކުގައި އަލުން ކިޔެވުން ފަށާފައިވަނީ މިމަހުގެ 10 ވަނަ ދުވަހުއެވެ. ކިޔެވުން ފަށާފައިވަނީ ކޯވިޑްއިން ރައްކާތެރިވުމުގެ ގޮތުން އަޅަންޖެހޭ ފިޔަވަޅުތަކާއެކުގައެވެ. އެގޮތުން ސްކޫލްތަކުގައި އަޅާފައިވާ ރައްކާތެރިކަމުގެ ފިޔަވަޅުތަކުގެ ތެރޭގައި ދަރިވަރުންނާއި ޓީޗަރުން ސްކޫލަށް ވަނުމުގެ ކުރިން ހުން ބެލުމާއި އަތް ސެނިޓައިޒްކުރުން ހިމެނެއެވެ. ކްލާސްތަކުގެ ތެރޭގައި ދަރިވަރުން އިށީންދެ ތިބޭ އެރޭންޖްމަންޓާއި ޓީޗަރުން ކިޔަވައިދިނުމުގައި ކްލާސް ތެރޭގައި އަމަލުކުރާ ގޮތްތައް ވެސް ހުރީ ގައިދުރުކަމަށް މަގުފަހިވާނެ ގޮތަށެވެ. ދަރިވަރުންނާއި މުދައްރިސުން ތިބެނީ މާސްކްވެސް އަޅައިގެންނެވެ. ސްކޫލްތަކުގައި ވަނީ އަތްދޮވެވޭނެ އިންތިޒާމްތަކާއި ސެނިޓައިޒަރވެސް ބަހައްޓާފައެވެ.

advertisement