ޒަރޫރީ ބޭނުންތަކަށް ބޭރަށް ނިކުތުމަށް ފުލުހުން ވަކި ޙާއްސަ ހުއްދައެއް ދޫކުރަނީ

ޒަރޫރީ ބޭނުންތަކަށް ބޭރަށް ނުކުންނައިރު ބޭނުންކުރުމަށް ފުލުހުންގެ ހުއްދައަށް އެދެވޭނެ އިންތިޒާމު ހަމަޖައްސައިފިއެވެ. ޒަރޫރީ ބޭނުންތަކަށް ބޭރަށް ނުކުންނައިރު ވަކި ހާއްސަ ހުއްދައެއް ދޫކުރުމުގެ އިންތިޒާމް ފުލުހުން ހަމަޖައްސާފައިވަނީ މާލެ ސަރަހައްދުގައި އިރޮއޮއްސި 6 އިން ފަތިހު 6 އަކަށް އެއްގަމު އުޅަނދު ދުއްވުން މަނާކޮށްފައިވާތީއެވެ.

ފުލުހުން ވިދާޅުވީ، މާލެ ސަރަހައްދުގައި ވެހިކަލް ދުއްވުމާއި މީހުން ނުކުމެ އުޅުން މަނާ ވަގުތުތަކުގައި ޒަރޫރީ ބޭނުންތަކަށް ވެހިކަލް ބޭނުން ކުރުމަށް ނުވަތަ ބޭރަށް ނުކުތުމަށް ފުލުހުންގެ ޚާއްސަ ޕޯޓަލް މެދުވެރިކޮށް ހުއްދައަށް އެދެވޭނެ އިންތިޒާމު މިހާރުވާނީ ހަމަޖެހިފައިވާކަމަށެވެ. ހުއްދަ ދެވޭނެ ކަންކަމަކީ އެމަރޖެންސީ ނުވަތަ ޒަރޫރީ ކަންކަމުގައެވެ. އެގޮތުން ޑިއުޓީ ނުވަތަ މަސައްކަތަށް ދިއުމާއި އައުމަށާއި، އެއަރޕޯޓް ޓްރާންސްފަރއާއި، ކާބޯތަކެތި ޑެލިވަރކުރުމަށް ކެފޭ، ރެސްޓޯރެންޓުތަކަށް ހުއްދަ ދޫކުރާނެކަމަށް ފުލުހުން ވިދާޅުވިއެވެ.
ވެހިކަލް ދުއްވުން މަނާ ގަޑިތަކުގައާއި ކާފިއު ވަގުތު ޒަރޫރީ ބޭނުންތަކަށް ވެހިކަލް ބޭނުން ކުރުމަށް ނުވަތަ ބޭރަށް ނުކުތުމަށް ޕޮލިސް ޕާރމީޓަށް އެދުމަށް ކަނޑައަޅަފައިވާ ޕޯޓަލްއަކީ police.gov.mv/permit އެވެ. އަދި ޕޮލިސް ޕަރމިޓް ސެންޓަރ އަށް ގުޅޭނެ ނަންބަރެއްގެ ގޮތުގައި 1665އަށް ގުޅޭނެ އިންތިޒާމްވެސް ވަނީ ހަމަޖައްސާފައެވެ.

advertisement

މާލެ ސަރަހައްދުގައި ރޭގަނޑު 11:30އިން ފަތިހު 04:00އަށް މިހާރު ވަނީ ކާފިއުވެސް އިއުލާންކޮށްފައެވެ. މާލެ ސަރަހައްދުގައިވޭތުވެދިޔަ 24 ގަޑިއިރުގެ ތެރޭގައިވެސް ވަނީ 101 މީހުން ކޯވިޑަށް ޕޮޒިޓިވްވެފައެވެ. އަދި ވޭތުވެދިޔަ 24 ގަޑިއިރުގެ ތެރޭގައި މުޅި ރާއްޖެއިން ކޯވިޑް ޖެހުނު މީހުންގެ ޖުމްލަ އަދަދަކީ 209 އެކެވެ.