އިންޑިއާގެ ވިސްތާރާ އެއަރލައިނުން އަންނަ މަހު ރާއްޖެއަށް ދަތުރުތައް ފަށަނީ

އިންޑިއާގެ ވިސްތާރާއިން އަންނަމަހު ރާއްޖެއަށް ދަތުރުތައް ފަށާނެކަމަށް އެ އެއަރލައިނުން ހާމަކޮށްފިއެވެ.
އިންޑިއާގެ ވިސްތާރާ އެއަރލައިނުން ރާއްޖެއަށް ދަތުރުތައް ފެށުމަށް ހަމަޖެހިފައިވަނީ އަންނަ މަހުގެ 3 ވަނަ ދުވަހުއެވެ. މި އެއަރލައިންގެ ދަތުރުތައް ރާއްޖެއަށް ކުރާނީ މުމްބާއީން ވެލާނާ އިންޓަނޭޝަނަލް އެއަރޕޯޓަށެވެ.
އިންޑިއާގެ ވިސްތާރާ އެއރަލައިންއިން ރާއްޖެއަށް ދަތުރުފަށަނީ އިންޑިއާއާއި ރާއްޖެއާ ދެމެދު ޤާއިމްކޮށްފައިވާ އެއަރ ޓްރެވެލް ބަބުލްގެ ދަށުންނެވެ. ވިސްތާރާ އެއަރލައިންގެ ދަތުރުތައް އަންނަ މަހު ރާއްޖެއަށް ފަށާއިރު ހަފްތާއަކު 3 ދަތުރު އެ އެއަރލައިނުން ރާއްޖެއަށް ކުރުމަށް ވަނީ ހަމަޖެހިފައެވެ. ދަތުރުތައް ކުރާނީ ބުދަ، ހޮނިހިރު އަދި އާދިއްތަ ދުވަހުއެވެ. ޓިކެޓް ބުކްކުރުމުގެ ފުރުސަތު އެއަރލައިންގެ ވެބްސައިޓުންނާއި، އޮންލައިން ޓެރެވެލް އެޖެންސީތައް މެދުވެރިކޮށް މިހާރު ވަނީ ހުޅުވާލާފައެވެ.
އިންޑިއާގެ ގިނަ އެއަރލައިންތަކަކުން މިހާރުވެސް އަންނަނީ ރާއްޖެއަށް ދަތުރުތައް ބާއްވަމުންނެވެ. އޭގެތެރޭގައި އެއަރ އިންޑިއާ، އިންޑިގޯ، ގޯ އެއަރ އަދި ސްޕައިސްޖެޓް ފަދަ އެއަރލައިންތައް ހިމެނެއެވެ.

މިއަހަރުގެ މިހާތަނަށް ރާއްޖެއަށް އެންމެ ގިނަ އަދަދަކަށް ފަތުރުވެރިން އައި 2 ވަނަ ޤައުމަކީ އިންޑިއާއެވެ. އަހަރުގެ މިހާތަނަށް އިންޑިއާއިން ރާއްޖެއަށް 26000 އަށްވުރެ ގިނަ ފަތުރުވެރިން ވަނީ އައިސްފައެވެ.

advertisement