ޓޫރިޒަމް ދާއިރާގެ މުވައްޒަފުންނަށް ރިސޯޓްތަކުގައި ވެކްސިންދޭން ފަށައިފި

ފަތުރުވެރިކަމުގެ ދާއިރާގެ ފްރަންޓްލައިންގައި މަސައްކަތްކުރާ މުވައްޒަފުންނަށް ކޯވިޑް-19 ވެކްސިން ދިނުމުގެ މަސައްކަތް ރިސޯޓްތަކުގައި އިއްޔެ ފަށައިފިއެވެ.

މިހާތަނަށް ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކަށް ވެކްސިން ދެމުން އައިސްފައިވަނީ މާލެ ސަރަޙައްދުގައެވެ. އެހެން ނަމަވެސް މިހާރު މިވަނީ ރިސޯޓުތަކުގައި ވެކްސިން ދޭން ފަށާފައެވެ.

advertisement

ރިސޯޓްތަކުގައި މަސައްކަތްކުރާ މުވައްޒަފުންނަށް ރިސޯޓްތަކުގައި ދޭން ފެށި ފުރަތަމަ ދުވަހުވެސް ވަނީ 99 މީހަކަށް ވެކްސިން ދީފައެވެ. ރިސޯޓްތަކުގައި ވެކްސިން ދިނުމުގެ ޕްރޮގްރާމް ފެށުމަށް ރިސޯޓުތަކުން 90 ސިއްޙީ ޚިދުމަތްތެރިންނަށް ތަމްރީން ވަނީ ދީފައެވެ. އެންމެ ފުރަތަމަ މި ޕްރޮގްރާމް ފަށާފައިވަނީ ބަނޑޮސް މޯލްޑިވްސް ރިސޯޓުގައެވެ.

ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކަކީ ފްރަންޓްލައިންގައި މަސައްކަތްކުރާ ފަރާތްތަކަށްވުމާއި ރާއްޖެ އަންނަ ފަތުރުވެރިންނާއި އެންމެ ގާތުން މަސައްކަތްކުރާ ބަޔަކީ ފަތުރުވެރިކަމުގެ ސިނާއަތުގެ މުވައްޒަފުންނަށްވާތީ މިމަހުގެ 4 ވަނަ ދުވަހުން ފެށިގެން މި ދާއިރާގެ މުވައްޒަފުންނަށް ވަނީ ވެކްސިން ދޭން ފަށާފައެވެ.

ރާއްޖޭގެ ފަތުރުވެރިކަމުގެ ދާއިރާގައި ވަޒީފާ އަދާކުރާ މުވައްޒަފުންނަށް 20000 ވެކްސިން ޑޯޒް ވަނީ ޚާއްސަކޮށްފައެވެ. ކޮންމެ މީހަކުވެސް ވެކްސިންގެ 2 ޑޯޒް ފުރިހަމަކުރަންޖެހޭއިރު މިއީ 10000 މުވައްޒަފުންނަށް ބޭނުންކުރެވޭނެ ވެކްސިންއެވެ.