ވެކްސިންގެ 2 ޑޯޒް ހަމަކުރުމަށްފަހު ފުރުމުގެ މުއްދަތު އޮތް ދަރިވަރުން އެކަން އެންގުމަށް އެދިއްޖެ

ކޯވިޑް19 ވެކްސިންގެ ދެ ޑޯޒު ފުރިހަމަކޮށް ރާއްޖެއިން ބޭރަށް ފުރޭނެ މުއްދަތު އޮތް ދަރިވަރުން އެކަން އަންގަން ހަޔާ އެޑިއުކޭޝަން މިނިސްޓްރީން އަންގައިފިއެވެ.

ހަޔާ އެޑިއުކޭޝަން މިނިސްޓްރީން ބުނީ މިނިސްޓްރީގެ ސްކޮލާޝިޕް ފުރުސަތުތަކުގައާއި މަތީތައުލީމާއި ތަމްރީނަށްދޭ ލޯނު އެހީ އަދި އަމިއްލަ ހަރަދުގައި ރާއްޖޭން ބޭރުގައި ކިޔަވަމުންދާ ދަރިވަރުންގެ ތެރެއިން މިވަގުތު ރާއްޖޭގައި ތިބި ދަރިވަރުން ކޮވިޑް19 ގެ ވެކްސިން ދެ ޑޯޒް ފުރިހަމަކުރުމަށްފަހު އެނބުރި ރާއްޖޭން ބޭރަށް ދިއުމަށް އެދޭކަމަށެވެ. ވެކްސިންގެ ފުރަތަމަ ޑޯޒް ޖެހުމަށްފަހު މަދުވެގެން ހަތަރު ހަފްތާ ހަމަކޮށް ވެކްސިންގެ ދެވަނަ ޑޯޒް ޖެހޭނެ މުއްދަތު އޮތް ދަރިވަރުން ރަޖިސްޓްރީވާން މިހާރު ވަނީ ހުޅުވާލައިފައެވެ.
ރަޖިސްޓްރީވާން ޖެހޭނީ ގޫގުލް ފޯމް މެދުވެރިކޮށެވެ.
ރާއްޖެއިން ބޭރަށް ކިޔަވަންދާ ދަރިވަރުންނަށް ވެކްސިން ޖެހުމުގެ އިންތިޒާމުތައް ހަމަޖެއްސުމުގެ މަސައްކަތް ކުރަމުން އަންނަކަމަށް ހެލްތް އެމެޖަންސީ އޮޕަރޭޝަން ސެންޓަރުންވެސް ވަނީ ހާމަކުރައްވާފައެވެ. ކޯވިޑްގެ ވެކްސިން ރާއްޖޭގައި ދޭން ފަށާފައިވަނީ މިމަހުގެ 1 ވަނަދުވަހުން ފެށިގެންނެވެ.

advertisement

ކޯވިޑުން ރައްކާތެރިވުމަށ ްޖަހާ ވެކްސިން މިހާތަނަށް ރާއްޖޭގައި ޖެހި މީހުންގެ އަދަދު ވަނީ 40،000 ގާތްކޮށްފައެވެ. މިދިޔަ 24 ގަޑިއިރުގެ ތެރޭގައިވެސް 5485 މީހުންނަށް ވަނީ ވެކްސިންގެ ފުރަތަމަ ޑޯޒް ޖަހާފައެވެ. މާލެ އާއި އަތޮޅުތެރޭގެ ރަށްތަކުގެ އިތުރުން ރިސޯޓްތަކުގައިވެސް ވަނީ ވެކްސިން ދޭން ފަށާފައެވެ. ރިސޯޓްތަކުގައި ވެކްސިން ދޭން އިއްޔެ ފެށިއިރު ފުރަތަމަ ދުވަހުވެސް 99 މީހުންނަށް ވަނީ ވެކްސިން ދީފައެވެ.