އެއްލައްކަ ޑޯޒް ހުސްވަންދެން ފުރަތަމަ ޑޯޒް ދޭނެ – އެޗްއީއޯސީ

އެއްލައްކަ ޑޯޒުގެ ވެކްސިން ހުސްވަންދެން ފުރަތަމަ ޑޯޒު ދެމުންގެންދާނެ ކަމަށް އެޗްއީއޯސީއިން ބުނެފި އެވެ.
އެޗްއީއޯސީއިން ބޭއްވި ނޫސްވެރިންގެ ބައްދަލުވުމުގައި ވެކްސިން އޮޕަރޭޝަންސްގެ ފަރާތުން ވާހަކަދައްކަވަމުން މުހައްމަދު ހަމްޒަތު ވިދާޅުވީ ވެކްސިން ދޭން ކުރިން ރޭވި ގޮތަށް ބަދަލު ގެނެސްފައިވާކަމަށެވެ. އެގޮތުން މިހާރު ގެނައި ބަދަލާއިއެކު އެއްލައްކަ ޑޯޒް ހުސްވަންދެން ފުރަތަމަ ޑޯޒު ދެމުންގެންދާނެ ކަމަށް އޭނާ ވިދާޅުވިއެވެ.
އެއްލައްކަ ޑޯޒް ހުސްވަންދެން ފުރަތަމަ ޑޯޒު ދިނުމަށް ނިންމާފައިވަނީ އިތުރު ވެކްސިން ލިބޭނެކަން ޔަގީން ކުރެވިފައި އޮތީމައިކަމަށް އޭނާ ވިދާޅުވިއެވެ. ވެކްސިން ލިބުމުގައި އެއްވެސް ދައްޗެއް ކުރިމަތިވާނެ ކަމަށް ލަފާ ނުކުރެވޭ ކަމަށާއި ވެކްސިން ލިބޭނެކަމުގެ ޔަގީންކަން އެބައޮތް ކަމަށް ހަމްޒަތު ވަނީ ވިދާޅުވެފައެވެ. މި މަހުގެ ތެރޭގައި އިތުރު ޑޯޒުތައް ލިބޭނެކަމަށް އޭނާ ވިދާޅުވި އެވެ.
ޗައިނާއިންވެސް ވަނީ ރާއްޖެއަށް ސައިނޯފާމް ވެކްސިންގެ 100،000 ޑޯޒް ހަދިޔަ ކުރަން ނިންމައިފައެވެ. އެ ވެކްސިންތަކުގެ އިތުރުން ސަރުކާރުން ވަނީ 700،000 ޑޯޒް ގަތުމަށް އެސްޓްރާޒެނެކާއާއެކު އެއްބަސްވުމެއް ހަދާފަ އެވެ.

advertisement