މާލެ ސަރަހައްދުގެ ރައްކާތެރިކަމުގެ ފިޔަވަޅު އިތުރު 2 ހަފްތާއަށް

މާލޭ ސަރަޙައްދުގައި އިޢުލާންކޮށްފައިވާ ރައްކާތެރިކަމުގެ ފިޔަވަޅުތައް އިތުރު 2 ހަފްތާއަށް ދެމެހެއްޓުމަށް ނިންމައިފިއެވެ. މާލެ ސަރަހައްދުގައި ރައްކާތެރިކަމުގެ ފިޔަވަޅުތައް ވަރުގަދަކޮށްފައިވަނީ ކޯވިޑް-19ގެ ޙާލަތު ގޯސްވެ ޕޮޒިޓިވްވާ މީހުންގެ ޢަދަދުތައް މައްޗަށް ގޮސްފައިވާތީއެވެ.

ޑިރެކްޓަރ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ސޮއިކުރައްވާ ނެރުއްވާފައިވާ އެންގުމުގައި ވަނީ ކޯވިޑް-19 އިން ރައްކާތެރިވުމަށް އަޅާފައިވާ ޚާއްސަ ފިޔަވަޅުތަކަށް ބަދަލުގެނައުމަށް އެންގި އެންގުމުގެ މުއްދަތު އިތުރުކޮށްފައިވާކަމަށެވެ. އެގޮތުން މިމަހުގެ 2ވަނަ ދުވަހުން ފެށިގެން 14 ދުވަހަށް މުއްދަތަކަށް އަޅާފައިވާ ފިޔަވަޅުތައް މިމަހުގެ 17އިން ފެށިގެން އިތުރު 14 ދުވަހުގެ މުއްދަރތަކަށް އިތުރުކުރުމަށް ނިންމާފައިވާކަމަށް މި އެންގުމުގައި ވަނީ ބުނެފައެވެ.

advertisement

މާލޭ ސަރަޙައްދުގައި އިޢުލާންކޮށްފައިވާ ރައްކާތެރިކަމުގެ ފިޔަވަޅުތަކުގެ މުއްދަތު އިތުރުކުރުމާއިއެކު ކުރިއަށް އޮތް 2 ހަފްތާގައިވެސް ރޭގަނޑު 23:00އިން ފެށިގެން ފަތިހު 4:30އަށް މާލެ ސަރަޙައްދުގައި ވަނީ ކާފިއު އިޢުލާންކޮށްފައެވެ. އަދި އިރުއޮއްސި 18:00 އިން ފެށިގެން ހެނދުނު 6:00އަށް މާލެ ސަރަހައްދުގައި އެއްގަމު އުޅަނދު ދުއްވުންވެސް މަނާވާނެއެވެ.
މީގެ އިތުރުން ޕްރީ ސްކޫލްތަކާއި ނާރސަރީތަކާއި ޑޭކެއަރ ޚިދުމަތް ބަންދުކުރަން ނިންމާފައިވާއިރު ޔުނިވަރސިޓީއާއި ކޮލެޖްފަދަ ތަންތަނުގެ ކިޔަވައިދިނުން، ކުރިއަށް އޮތް 2 ހަފްތާގައި އޮންލައިކޮށް ކުރިއަށް ގެންދިއުމަށް ވެސް ވަނީ އަންގަވާފައެވެ.

މި ފިޔަވަޅުތަކުގެ އިތުރުން ކުރިއަށް އޮތް 2 ހަފްތާގައި ޕާކުތަކާއި މައިދާންތަކަށް ޒިޔާރަތްކުރުން ހުއްޓާލުމަށްވެސް ވަނީ އަންގަވާފައެވެ. އަދި އެކަނި ކުރާ ކަސްރަތުފިޔަވައި، އެހެން ހުރިހާ ކުޅިވަރު ޙަރަކާތަކާއި ކަސްރަތުގެ ޙަރަކާތްތައް ކުރިއަށް އޮތް 2 ހަފްތާއަށް ހުއްޓާލުމަށްވެސް ވަނީ އަންގަވާފައެވެ.