ވެކްސިންގެ ފުރަތަމަ ޑޯޒްޖެހި ބައެއް މީހުންނަށް ބަލި ޖެހިފައި އެބަހުރި – އެޗްއީއޯސީ

ވެކްސިން ޖެހި ފަހުން ކޮވިޑް-19އަށް ޕޮޒިޓިވްވެފައިވާ ބައެއް މީހުން ރާއްޖޭގައި އެބަ ތިބި ކަމަށް އެޗްއީއޯސީ އިން ބުނެފި އެވެ. ހެލްތު އިމަޖެންސީ އޮޕަރޭޝަން ސެންޓަރުން ބުނީ ވެކްސިން ޖެހުމަށްފަހު ވެކްސިން މަސައްކަތް ކުރަން ވަގުތު ނަގާނެ ކަމަށާއި އެހެންކަމުން ވެކްސިން ޖެހުމަށްފަހުގައިވެސް ރައްކާތެރިކަމުގެ ފިޔަވަޅު އަޅަންޖެހޭނެކަމަށެވެ.
އެޗްއީއޯސީގެ ބައްދަލުވުމުގައި ވާހަކަދައްކަވަމުން ޑރ. ނަޒްލާ މުސްތަފާ ވިދާޅުވީ، ވެކްސިން ޖެހިތާ ފަސް ވަރަކަށް ދުވަސް ފަހުން ކޮވިޑްއަށް ޕޮޒިޓިވްވެފައިވާ މީހުން އެބަ ތިބި ކަމަށެވެ. ވެކްސިންގެ ފުރަތަމަ ޑޯޒް ޖެހުމަށްފަހުވެސް ރައްކާތެރިކަމުގެ ފިޔަވަޅުތައް އަޅައިގެން އުޅެން ޖެހޭނެ ކަމަށް ޑރ. ނަޒްލާ ވަނީ ވިދާޅުވެފައެވެ.
ޑރ. ނަޒްލާ ވިދާޅުވި ގޮތުގައި ފުރަތަމަ ޑޯޒް ޖެހުމުގެ ދެ ހަފްތާ ފަހުން ކޮވިޑް ޖެހުމުގެ ފުރުސަތު 60 ޕަސެންޓު ކުޑަކޮށްދެ އެވެ. އަދި ދެވަނަ ޑޯޒް ޖަހާތާ ދެ ހަފްތާ ފަހުން ބަލި ޖެހުމުގެ ފުރުސަތު 70 ޕަސެންޓު ކުޑަކޮށްދެ އެވެ. ނަމަވެސް، ކޮވިޑް ޖެހިގެން ބޮޑަށް ބަލިވުމުން ރައްކާތެރިކޮށްދޭނެ އެވެ.
ވެކްސިން ޖަހަމުންދާތީ މިހާރު ބައެއް ފަރާތްތަކުން ފަރުވާ ކުޑަ ކުރާ ކަމަށް އެޗްއީއޯސީން ވިދާޅުވެއެވެ. ރާއްޖޭގައި މިހާރު 50،000 އަށްވުރެ ގިނަ މީހުންނަށް ވަނީ ވެކްސިންގެ ފުރަތަމަ ޑޯޒް ދީފައެވެ. ނަމަވެސް ކޯވިޑް ޖެހޭ މީހުންގެ އަދަދު އަދިވެސް އުޅެނީ 100 އިން މަތީގައެވެ.

advertisement