ގްރޫޕް ވެކްސިނޭޝަނަށް ރަޖިސްޓްރީވުމަށް ހުޅުވާލައިފި

ކުންފުނިތަކާއި ޖަމިއްޔާތަކުގައި މަސައްކަތްކުރާ މުވައްޒަފުން ކޯވިޑް-19ގެ ގްރޫޕް ވެކްސިނޭޝަނަށް ރަޖިސްޓްރީވުމަށް ހެލްތު ޕްރޮޓެކްޝަން އެޖެންސީން ހުޅުވާލައިފިއެވެ.

އެޗް.ޕީ.އޭއިން ވަނީ އެކި ދާއިރާތަކުގައި ހަރަކާތްތެރިވާ ކުންފުނިތަކާއި، މުއައްސަސާތަކާއި، ޖަމިއްޔާ ޖަމާޢަތްތަކުން ގްރޫޕް ވެކްސިނޭޝަނަށް ރަޖިސްޓްރީވުމަށް ފޯކަލް ޕޮއިންޓްތަކެއް ކަނޑައަޅާފައެވެ.

advertisement

ގްރޫޕް ވެކްސިނޭޝަނަށް ކެފޭ ރެސްޓޯރެންޓްތަކާއި، ފިހާރަތަކާއި އަމިއްލަ ކުންފުނިތައް ރަޖިސްޓަރ ކުރަންޖެހެނީ މިނިސްޓްރީ އޮފް އިކޮނޮމިކް ޑިވެލޮޕްމަންޓް މެދުވެރިކޮށެވެ. އެގޮތުން އެ މިނިސްޓްރީގެ ނަންބަރު 3333188 ނުވަތަ registrations@trade.gov.mv އީމެއިލް މެދުވެރިކޮށް އެޕޮއިންޓްމަންޓަށް އެދެވޭނެކަމަށް އެޗް.ޕީ.އޭއިން ވިދާޅުވެއެވެ.

ކުޅިވަރު ޖަމްއިއްޔާތަކާއި، ކްލަބްތަކާއި އެސޯސިއޭޝަންތަކާއި، އަމިއްލަ ޖަމްއިއްޔާ ޖަމާޢަތްތަކަށް ގްރޫޕް ވެކްސިނޭޝަން ހެއްދުމަށް އެދެންޖެހެނީ މިނިސްޓްރީ އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވަރމަންޓަށެވެ. އެ މިނިސްޓްރީގެ ނަންބަރު 3347365 ނުވަތަ 3347329 އަދި fathimath.ahmed@youth.gov.mv އީމެއިލް މެދުވެރިކޮށް އެޕޮއިންޓްމަންޓަށް އެދެވޭނެއެވެ.
މަސްވެރިކަމާއި ދަނޑުވެރިކަމާގުޅުންހުރި މަސައްކަތް ކުރާ ފަރާތްތަކަށް މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ފޯކަލް ޕޮއިންޓެއްގެ ގޮތުގައި ހަމަޖައްސާފައިވާއިރު، އެ މިނިސްޓްރީގެ 3339286 ނަންބަރަށް ގުޅައިގެން އެޕޮއިންޓްމަންޓަށް އެދެވޭނެކަމަށް އެޗް.ޕީ.އޭއިން ވިދާޅުވެއެވެ. އަދި އެ މިނިސްޓްރީގެ އީމެއިލް hr@fishagri.gov.mv މެދުވެރިކޮށްވެސް އިންތިޒާމްތައް ހެއްދޭނެއެވެ.
މީގެ އިތުރުން ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް މިނިސްޓްރީ އޮފް ޓޫރިޒަމް މެދުވެރިކޮށް ގްރޫޕް ވެކްސިނޭޝަނަށް ރަޖިސްޓްރީވުމުގެ ކަންކަން ކުރިއަށްގެންދެވޭނެކަމަށް އެޗް.ޕީ.އޭއިން ވިދާޅުވެއެވެ. އެގޮތުން އެ މިނިސްޓްރީގެ ނަންބަރު 3022245 އަށް ގުޅައިގެން ނުވަތަ iihr@tourism.gov.mv އީމެއިލް މެދުވެރިކޮށް އެޕޮއިންޓްމަންޓްގެ ކަންކަން ހަމަޖެއްސޭނެކަމަށް އެ އެޖެންސީން މަޢުލޫމާތުދެއްވައެވެ.
ރާއްޖޭގައި ކޯވިޑް19 ގެ ވެކްސިން ދޭންފަށާފައިވަނީ މިމަހުގެ 1 ވަނަ ދުވަހުއެވެ. ރާއްޖޭގައި މިހާތަނަށް 64 ހާހަށްވުރެ ގިނަ މީހުން ކޯވިޑް-19 އިން ދިފާޢުވުމަށް ވެކްސިން ޖަހާފައިވާއިރު، މިހާރު ހުރި ކޮވިޝީލްޑް ވެކްސިންގެ ސްޓޮކް ހުސްވަންދެން ވެކްސިން ޖަހާނެކަމަށް އެޗް.އީ.އޯ.ސީން ވަނީ ހާމަކުރައްވާފައެވެ. ރާއްޖޭގައި ވެކްސިންގެ ދެވަނަ ޑޯޒް ޖެހުމަށް ނިންމާފައިވަނީ ފުރަތަމަ ޑޯޒް ޖަހާތާ 8 ހަފްތާ ފަހުންނެވެ.