ރާއްޖެއަށް އެންމެ ގިނައިން ފަތުރުވެރިން އައި ޤައުމަކަށް އިންޑިއާ

ރާއްޖެއަށް އެންމެ ގިނައިން ފަތުރުވެރިން އަންނަ ގައުމަކަށް އިންޑިއާ ވެއްޖެއެވެ. އިންޑިއާ މި ލިސްޓުގެ 1 ވަނައަށް ޖެހިލާފައިމިވަނީ ރަޝިއާ މާކެޓް 1 ވަނައިގައި އޮތުމަށްފަހު ރަޝިއާ ފަހަތައް ޖައްސާލާފައެވެ. މިދިޔަ އަހަރުވެސް ރާއްޖެއަށް އެންމެ ގިނަ ފަތުރުވެރިން އައިސްފައިވަނީ އިންޑިއާއިންނެވެ.
ޓޫރިޒަމް މިނިސްޓްރީގެ ތަފާސްހިސާބުތަކުން ދައްކާ ގޮތުގައި މިމަހުގެ 18 ވަނަ ދުވަހާއި ހަމައަށް އިންޑިއާއިން 32،970 ފަތުރުވެރިން ވަނީ ރާއްޖެ އައިސްފައެވެ. ލިސްޓުގެ ދެވަނައިގައި އޮތީ ރަޝިއާ އެވެ. އެގައުމުން މިއަހަރުގެ މިހާތަނަށް 32،019 ފަތުރުވެރިން ރާއްޖެއަށް އައިސްފައިވެ އެވެ. އިއްޔެއާ ހަމައަށް އެންމެ ގިނަ ފަތުރުވެރިން އައީވެސް ރަޝިއާއިންނެވެ.
ކޯވިޑް19ގެ ކުރިން އިންޑިއާއަކީ ރާއްޖެއަށް 5 ވަނައަށް އެންމެ ގިނައަދަދަކަށް ފަތުރުވެރިން ޒިޔާރަތްކުރާ ޤައުމެވެ. ނަމަވެސް ކޯވިޑް19 އަށްފަހު ރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރާ ޤައުމަކަށް އިންޑިއާވުމުގެ ސަބަބުތައް ގިނައެވެ. ކޯވިޑް19ގެ ޕެންޑަމިކްގެ ތެރޭގައި އިންޑިއާއާއި ރާއްޖެއިން ވަނީ ދެކުނު އޭޝިއާގައި ޤާއިމްކުރި ފުރަތަމަ “އެއަރ ޓްރެވެލް ބަބުލް” ޤާއިމްކޮށްފައެވެ. މިއާއިއެކު އިންޑިއާގެ ގިނަ އެއަރލައިންތަކަކުން ވަނީ ރާއްޖެއަށް ދަތުރުފަށާފައެވެ.
އަހަރުގެ މިހާތަނަށް ރާއްޖެއަށް 151،113 ފަތުރުވެރިން ރާއްޖެއަށް ވަނީ އައިސްފަ އެވެ. އެވްރެޖުކޮށް ދުވާލެއްގެ މައްޗަށް މިހާރު ރާއްޖެ އަންނަނީ 3،000 ފަތުރުވެރިންނެވެ.
މިވަގުތު ޓޫރިސްޓުންނަށް ހިދުމަތްދޭ 646 ފެސިލިޓީ ހިންގަމުންދާއިރު އެއީ ޖުމްލަ 44،277 އެނދެވެ. ޓޫރިޒަމް މިނިސްޓްރީން ބުނީ ޓާގެޓަކީ މި އަހަރުގެ ތެރޭ 1.5 މިލިއަން ޓޫރިސްޓުން ގެނައުން ކަމަށެވެ.

advertisement