ފޯބްސްއިން ހޮވި އަހަރުގެ “ހޮޓެލް އިންސްޓަގްރާމް އޮފް ދި އިޔާ” އެވޯޑް އިތާފުއްޓަށް

ފޯބްސްއިން ހޮވި އަހަރުގެ “ހޮޓެލް އިންސްޓަގްރާމް އޮފް ދި އިޔާ” އެވޯޑް ވޮލްޑޯފް އެސްޓޯރިއާ މޯލްޑިވްސް އިތާފުއްޓަށް ލިބިއްޖެއެވެ. އިތާފުށި ރިސޯޓަކީ މަޝްހޫރު ހިލްޓަން ބްރޭންޑުގެ ދަށުން ހިންގާ ލަގްޒަރީ ރިސޯޓް ބްރޭންޑެއްކަމަށްވާ ވޮލްޑޯފް އެސްޓޯރިއާއިން ތަރައްޤީކުރި ރިސޯޓެކެވެ.

މާލެ އަތޮޅުގައި ތަރައްޤީކޮށްފައިވާ “ވޮލްޑޯފް އެސްޓޯރިއާ މޯލްޑިވްސް އިތާފުށި” ރިސޯޓު ހުޅުވާފައިވަނީ 2019 ވަނަ އަހަރުގެ ތެރޭގައެވެ. ފޯބްސްއިން ހޮވި މި އަހަރުގެ އެންމެ ފުރިހަމަ އިންސްޓަގްރާމް އެކައުންޓެއް ހިންގާ ހޮޓަލަކަށް ދޭ ” ހޮޓެލް އިންސްޓަގްރާމް އޮފް ދި އިޔާ” އެވޯޑް އިތާފުއްޓަށް ލިބުނީ އެ ރިސޯޓްގެ އިންސްޓަގްރާމް އެކްއުންޓްގައި ހިއްސާކޮށްފައިވާ ފޮޓޯތަކުގެ ރީތިކަމުގެ ސަބަބުންކަމަށް ފޯބްސްއިން ބުނެއެވެ.

advertisement

އިތާފުށި ރިސޯޓަށް މި އެވޯޑް ލިބިފައިވަނީ ދުނިޔޭގެ މަޤްބޫލް 5 ތަނަކާއި ވާދަކޮށްގެންނެވެ. ފޯބްސް މަޖައްލާއިން ވަނީ ކިޔުންތެރިންނާއި އަދި އެ މަޖައްލާގެ ފޮލޯވަރުންނަށް ވޯޓު ދިނުމުގެ ފުރުސަތު ހުޅުވާލާފައެވެ. ވޯޓު ދިނުމުގެ ފުރުސަތު ހުޅުވާލުމުން 1000 އަށްވުރެ ގިނަ މީހުން ވޯޓު ދީފައިވަނީ އިތާފުށި ރިސޯޓަށެވެ.

އިތާފުށި ރިސޯޓްގައި ތަރައްޤީކޮށްފައިވާ ޓްރީޓޮޕް ރެސްޓޯރަންޓާއި، އޯވަރ ވޯޓަރ ވިލާތަކާއި، އިރުއަރާ އަދި އިރުއޮއްސޭ ރީތި މަންޒަރުތަކާއި، މޫދުގެ ހިތްގައިމު ފޮޓޯތައް ފޯބްސް މަޖައްލާއިން ވަނީ ފާހަގަކޮށްފައެވެ.

ފަޅު ހިއްކައިގެން ތިން ރަށް ގުޅުވާލައިގެން ތަރައްޤީކޮށްފައިވާ އިތާފުށި ރިސޯޓްގައި 122 ކޮޓަރި ހުރެއެވެ. މީގެތެރޭގައި އޯވަރ ވޯޓަރ ވިލާއާއި ރީފް ވިލާ އަދި ބީޗް ވިލާ ހިމެނޭއިރު، ކޮންމެ ވިލާއެއްގައި ޕްރައިވެޓް ޕޫލެއް ހިމެނެއެވެ. ރީފް ބީޗް އަދި ވޯޓަރ ވިލާތަކުގައި މޫދާއި ގުޅިފައިވާ ގުދުރަތީ ޕޫލަކާއި ސްވިންގިން ބެޑެއް ހިމެނެއެވެ.

އިތާފުށީގައި ތަރައްޤިކޮށްފައިވާ ވިލާތަކާއި ސްޕާތަކުގެ އިތުރުން ރިސޯޓަށް އިތުރު ފުރިހަމަކަމެއް ގެނެސްދެނީ ފަތުރުވެރިންނަށް ޚިދުމަތްދިނުމަށްޓަކައި ރިސޯޓުގައި ހުންނަ 11 ރެސްޓޯރެންޓެވެ. ކޮންމެ ތަނަކުން ތަފާތު ވައްތަރެއްގެ ކެއުންތަކާއި ރަހަތައް ލިބިގެންދާއިރު ރިސޯޓުގައި ތަރައްޤީކޮށްފައިވާ ޓްރީޓޮޕް ޑައިނިންގ ރޫމްއިން ކޮށްލެވޭ ތަޖުރިބާ މާބޮޑަށްވެސް ތަފާތުވާނެކަމަށް ރިސޯޓު ހިންގާ ފަރާތުން ބުނެއެވެ.