އިންޑިއާއިން އިތުރު 1 ލައްކަ ޑޯޒްގެ ވެކްސިން ރާއްޖެއަށް ހަދިޔާކޮށްފި

ކޮވިޝީލްޑް ވެކްސިންގެ އިތުރު 100،000ޑޯޒް އިންޑިއާއިން ދިވެހިރާއްޖެއަށް އަނެއްކާވެސް ހަދިޔާކޮށްފިއެވެ. ފޮރިން މިނިސްޓްރީގައި ބޭއްވި ރަސްމިއްޔާތުގައި މިވެކްސިން ރާއްޖެއާ ހަވާލުކޮށްދެއްވީ އިންޑިއާގެ އެކްސްޓަރނަލް އެފެއަރސް މިނިސްޓަރ ޑރ.ސުބްރަމަނިޔަމް ޖައިޝަންކަރެވެ. މިއެހީއާ ރާއްޖޭގެ ފަރާތުން ޙަވާލުވެވަޑައިގަތީ ފޮރިން މިނިސްޓަރ އަބްދުﷲ ޝާހިދާއި ހެލްތު މިނިސްޓަރ އަޙްމަދު ނަސީމެވެ.

މިހާރު ރާއްޖޭގައި ޖަހަމުން ދަނީވެސް އިންޑިއާއިން ހަދިޔާކުރި 1 ލައްކަ ޑޯޒްގެ ވެކްސިނެވެ. މި ޝިޕްމަންޓް ރާއްޖެއަށް ގެނައީ މިދިޔަ ޖެނުއަރީމަހުގެ 20ވަނަ ދުވަހުއެވެ. އިންޑިއާއަކީ އަބަދުވެސް ރާއްޖެއަށް އެކި ގޮތްގޮތުން އެހީތެރިވެދޭ ޤައުމެކެވެ.

advertisement

އިންޑިއާއިން ރާއްޖެއަށް އެންމެ ފުރަތަމަ ހަދިޔާކުރި 1 ލައްކަ ޑޯޒްގެ ކޮވިޝިލްޑް ވެކްސިން ޖަހަންފަށާފައިވަނީ މިމަހުގެ 1 ވަނަ ދުވަހުއެވެ. މިހާރު ރާއްޖޭގައި 70،000 އަށްވުރެ ގިނަ މީހުންނަށް ވަނީ ވެކްސިން ދީފައެވެ.

ރާއްޖޭގައި ފުރަތަމަ ވެކްސިން ދޭންފެށީ ކޯވިޑް-19ގެ ޙާލަތާ ގުޅިގެން ފްރަންޓް ލައިންގައި މަސައްކަތްކުރާ ފަރާތްތަކަށެވެ. ނަމަވެސް މިހާރު މިވަނީ ޢުމުރުން 18އަހަރުން މަތީގެ ހުރިހާ އުމުރުފުރާތަކަކަށް ވެކްސިން ދިނުމުގެ މަސައްކަތް ފަށާފައެވެ.

ރާއްޖޭގައި ދިވެހިންގެ އިތުރަށް ބިދޭސީންނަށްވެސް ވެކްސިން ދިނުމަށްވަނީ ފަށާފައެވެ. މިހާތަނަށް ރާއްޖޭގެ މުޅި އާބާދީގެ %12 މީހުން ވެކްސިންގެ ފުރަތަމަ ޑޯޒް ފުރިހަމަކޮށްފައިވެއެވެ.