އަމިއްލަ ހިޔާލު: މާލެ އަށް އަރާ ފޭބުން ދުއްތުރާ ބޮޑު ވޭނަކަށް

މި ވާހަކަ ދައްކާތާ އެތައް ޒަމާނެއް ވެއްޖެއެވެ. މާލޭގެ ފަޅުގެ ތޮއްޖެހުން ބޮޑުވެ، މާލެ އަށް އަރާ ފޭބުން ވަނީ ވަރަށް ބޮޑު ތުރާލަކަށް ވެފައެވެ. ވަކި ސަރަހައްދެއް ނޫނެވެ. މާލޭ އުތުރު ފަރާތު ފަޅުން ފެށިގެން މަސްވެރިންގެ ބަނދަރާއި ރަސްމީ ފާލަން ސަރަހައްދުގައި ވެސް އެއްވެސް ތަރުތީބެއް ނެތެވެ. ފާލަމުން ފެށިގެން ހުޅުމާލޭ ފެރީ ޓާމިނަލާ ހިސާބަށް ހުރި އެކި ޖެޓީތަކަށް ވެސް ގާތްކުރުމަކީ ވަރަށް ބޮޑު ތަކުލީފެކެވެ. މިއީ އިއްޔެއަކު މިއަދަކު އޮތް ދައްޗެއް ނޫނެވެ. މިއީ އެތައް އަހަރެއްވީ، ހައްލުނުކުރެވުނު މައްސަލައެކެވެ.

މާލެ އަށް އަރާ ފޭބުމުގެ ދަތިކަން އެންމެ ބޮޑަށް އިހުސާސްކުރެވޭނީ ވާރޭ ވެހޭ ދުވަހެއް ނަމައެވެ. ހިޔާ ވެލާނެ ތަންކޮޅެއް ނޯވެއެވެ. އަރާ ފައިބަންޖެހޭނީ ވެހޭހާ ވާރޭގެ ތެރޭގައި ތެމި ފޯވެގެންނެވެ. ދަތުރުކުރާ އުޅަނދު އަންނަންދެން މަޑުކޮށްލާނެ ޖާގައެއްވެސް އެއްވެސް ދިމާއެއްގައި ނެތެވެ.

advertisement

މީގެ އިތުރުން ތޮއްޖެހުން ބޮޑުކަމުން އުޅަނދުފަހަރަށް އަރާ ފައިބަންޖެހެނީ ވެސް އެއް އުޅަނދުން އަނެއް އުޅަނދު މަތިންނެވެ. އުމުރުން ދުވަސްވީ މީހުންނާއި ކުޑަކުދިން އަދި އެ ނޫން ވެސް ބަލިތައް ތަހައްމަލް ކުރަމުންދާ މީހުންނަށް މިއީ ކުޅަދާނަ ކަމެއް ނޫނެވެ. އެފަދަ މީހުން އަރާ ފައިބަންޖެހެނީ އެތައް ބައެއްގެ އެހީތެރިކަމާއި އެކުގައެވެ. ތޮއްޓާ ގާތްކުރެވެނީ މަދު އުޅަނދުފަހަރަކަށެވެ. އެއްވެސް ތަރުތީބެއް ނެތުމުން، ފެރީތަކަށް ވެސް މަޑުކުރެވޭކަށް ނޯވެއެވެ. އެރި މީހަކު އެރީ ކަމަށް ބަލާފައި އޮންނަނީ ފުރަންޖެހިފައެވެ.

“ތަންކޮޅެއް ފަސޭހައިން މާލެ އަރާ ފޭބޭނެ ގޮތް ވާނީ އަދި ކިހާ ދުވަހަކުން ބާވައޭ ހިތަށް އަރާ، ވާރޭން ހިޔާވާނެ ގޮތެއް ނެތް. މަޑުކޮށްލައިގެން ކޮޅަށް ހުރެލާނެ ޖާގަވެސް ލޯންޗްތައް ފުރާ ގަޑީގައި ނޯވޭ،” ރައްޔިތުން މަޖިލީހުގެ ކެންދޫ ދާއިރާގެ ކުރީގެ މެންބަރު އަދި މަޝްހޫރު ޤާނޫނީ ވަކީލް އަލީ ހުސެން އެކްސްގައި ކުރައްވާފައިވާ ޕޯސްޓެއްގައި ވެއެވެ.

ތަންކޮޅެއް ފަސޭހައިން މާލެއަށް އަރާ ފޭބޭނެ ގޮތް ވާނީ އަދި ކިހާދުވަހަކުން ބާވައޭ ހިތަށް އަރާ. ވާރޭން ހިޔާވާނެ ގޮތެއް ނެތް. މަޑުކޮށްލައިގެން ކޮޅައް ހުރެލާނެ ޖާގަވެސް ލޯންޗުތައް ފުރާ ގަޑީގަ ނޯވޭ. pic.twitter.com/HP6Vf1QruV— Ali Hussain (@AleeVoice) January 5, 2025

އަލީ އެކްސް އަށް އެ ޕޯސްޓް ދޫކޮށްލެއްވީ އެއް ލޯންޗުން އަނެއް ލޯންޗަށް ބަޔަކު އަރާ މަންޒަރާއި އެކުގައެވެ. މާލެ އަށް އަރާ ފޭބުމުގައި ހުރި ދަތިކަން އިތުރު އެއްވެސް ތަފްސީލަކާއި ނުލައި އެ ފޮޓޯގަނޑުން އެކަނި ވެސް ސިފަވެގެން ދެއެވެ. މިއީ ހަމަ އެކަނި ވިއްސާރަ ދުވަހެއްގެ ހާލަތެއް ނޫނެވެ. އެއް އުޅަނދުން އަނެއް އުޅަނދަށް މީހުން އަރަންޖެހުމަކީ ހަމަ ކޮންމެ ދުވަހެއްގެ ވެސް ހާލަތެވެ. މާލޭގެ ބަނދަރުގެ ކޮންމެ ސަރަހައްދަކަށް ބަލައިލި ނަމަވެސް މި މަންޒަރު ފެންނާނެއެވެ.

މިއީ ތޮއްޖެހުން ބޮޑުވުމުގެ ނަތީޖާއެވެ. އެހެން ނަމަވެސް މިއީ ހަމައެކަނި ތޮއްޖެހުން ބޮޑުވެގެން ވާ ގޮތެއް ވެސް ނޫނެވެ. ތަރުތީބެއް ވެސް ނެތީއެވެ. އުޅަނދުފަހަރު ގާތްކޮށް ފުރާ ހެދުމުގައި އިންތިޒާމެއް ވެސް ނެތީއެވެ. މީހުން އަރުވާ ބޭލުމަށް ހާއްސަ ގިމަތަތަކެއް ނެތެވެ. ރަސްމީކޮށް މާލެ އަތޮޅުގެ ފެރީތައް އޮންނަ އިރު ވެސް އެ ފެރީތަކަށް މީހުން އެރުވުމުގައި ވެސް އެއްވެސް އިންތިޒާމެއް ނެތެވެ. ކޮންމެ ދުވަހަކު ތިން ހަތަރު ފެރީ އޮންނަ އިރު ވެސް އެއިން އުޅަނދަކުން ދަތުކުރާ މީހުން ބޯ ނިވާކޮށްލާނެ ތަންކޮޅެއް ވެސް އެޅުނު ކަމަކަށް ނުވިއެވެ. އެތައް ސަރުކާރެއް އައިސް ގޮސްފިއެވެ. މި ވާހަކަ އެތައް ގޮތަކަށް ދެކެވިއްޖެއެވެ.

މި އުނދަގޫ ޖެހެނީ ހަމައެކަނި ދިވެހިންނަކަށް ނޫނެވެ. އެކި ދުވަސްވަރު މާލެ ސަރަހައްދަށް ޒިޔާރަތްކުރާ ބޭރުގެ ކްރޫޒްތަކަށް ވެސް މި އުނދަގޫ ޖެހެއެވެ. އެފަދަ ދުވަހެއްގައި ނަމަ މާލެ ބަނދަރު ސަރަހައްދު ހީވާނީ އަޑިއަށް ހިނގައިދާނެ ހެންނެވެ. އެ އުޅަނދުފަހަރުން މާލެ އަށް އެތައް ބަޔަކު ފައިބަނީ މި ތަނުން ހިތްހަމަޖެހުންތަކެއް ލިބޭނެ ކަމުގެ އުންމީދުގައެވެ. އެހެން ނަމަވެސް އެ މީހުންނަށް ފާހާނާ ކޮށްލެވޭނެ ގޮތެއް ވެސް ހަމަޖެހިފައެއް ނުހުރެއެވެ. ބޯހިޔާކޮށްލައި، މަޑުކޮށްލާނެ ތަނެއް ނެތެވެ. އެފަދަ ކްރޫޒްތަކުން ފައިބާ މީހުންނަށް ހާއްސަކޮށްގެން މަސްވެރިންގެ ޕާކް ސަރަހައްދުން ގިމަތައެއް ހެދިއެވެ. އެހެން ނަމަވެސް އެ ތަން ވެސް ހުރީ ބޭނުންކުރެވޭ ފަދަ ގޮތަކަށް ނޫނެވެ. އުޅަނދުފަހަރު އެތަނަކަށް ގާތްކުރެވޭ ކަމަކަށް ނުވެއެވެ.

މާލެ އެކަންޏެއް ވެސް ނޫނެވެ. ވެލާނާ އިންޓަނޭޝަނަލް އެއާޕޯޓުން ފުރުމުގައި ވެސް މި ދަތިތައް އެބަ އޮތެވެ. އުޅަނދުފަހަރު ގާތްކުރުމަށް ފާލަންތައް ހަދާފައި ހުރި ނަމަވެސް ޓްރެފިކް ބޮޑުކަމުން އެއިން ތަނަކުން ޖާގަ ލިބުމަކީ ދަތި ކަމެކެވެ. ހާއްސަކޮށް ނުކުޅެދުންތެރިކަން ހުންނަ ފަރާތްތަކަށް އުޅަނދުފަހަރަށް އެރުމަކީ ދަތި އުނދަގޫ ކަމެކެވެ.

މާލެ އަށް އަރާ ފޭބުމުގައި މިހާރު ކުރިމަތިވާ ދަތިތަކަށް ހައްލެއް ހޯދައިދޭން ސަރުކާރުން ވެސް އަދި މާލޭ ސިޓީ ކައުންސިލަކުން ވެސް މަސައްކަތެއް ކުރާ ތަނެއް ނުފެނެއެވެ. މި ދަތިތައް ތަހައްމަލުކުރާ މަންޒަރު ސަރުކާރުގެ އެކި މުއައްސަސާތަކުގެ އެކި ވެރިންނަށް ކޮންމެ ދުވަހަކު ވެސް ފެންނާނެއެވެ. އެހެން ނަމަވެސް އެކަމަށް ހައްލެއް ހޯދައިދޭކަށް ނޫޅެއެވެ. އަލީ ވިދާޅުވި ފަދައިން މި ކަމަށް ލުއި ފަސޭހަ ގޮތެއް ވާނީ ކޮން ދުވަހަކުން ބާއެވެ؟

“އަމިއްލަ ހިޔާލު” ކެޓަގަރީގެ ދަށުން ޝާއިއުކުރެވޭ ލިޔުންތަކުގައި ހިމެނެނީ ލިޔުން ކޮންޓްރިބިއުޓް ކުރާ ފަރާތްތަކުގެ ހިޔާލެވެ. މި ލިޔުންތަކަކީ ކޮންމެހެން އެމްވީ ޕްލަސްގެ އެޑިޓޯރިއަލް ދައްކުވައިދޭ ލިޔުންތަކެއް ނޫނެވެ. އެމްވީ ޕްލަސްއަށް ލިޔުމެއް ހުށައަޅަން ބޭނުންނަމަ media@plus.mv އަށް އީމެއިލް ކުރެއްވުން އެދެމެވެ.