އުމްރާގެ ވައްކަން: ހައްލެއް ލިބެންޖެހޭ!

މީހުންނަށް ހީވެފައި އޮންނަނީ ހައްޖާއި އުމްރާ އަށް މީހުން ގެންދިއުމަކީ ވަރަށް މާތް މަގުސަދެއްގައި ބަޔަކު ލިއްލާހިއަށްޓަކައި ކޮށްދޭ ކަމެއްގެ ގޮތުގައެވެ. އެހެން ނަމަވެސް ހައްޖާއި އުމްރާ އަށް މީހުން ގެންދިއުމުގެ ހިދުމަތުގެ ތާރީހުން ފެންނަނީ މުޅިން އެހެން މަންޒަރެކެވެ. އެކި އަހަރުތަކުގައި މީޑިއާތަކުގެ ސުރުހީތަކުން ފެންނަން ހުރީ ވައްކަމާއި ބޮޑެތި ކޮރަޕްޝަންގެ ވާހަކަތެކެވެ. ތުހުމަތުތައް ކުރެވިފައި ހުރީކީ ހަމައެކަނި އަމިއްލަ ކުންފުނިތަކަށް އެކަންޏެއް ވެސް ނޫނެވެ. ދައުލަތުގެ ކަމާ ބެހޭ އިދާރާތަކާއި އެ ހިދުމަތް ދޭ ތަންތަނާއި މެދު ވެސް ކުރެވިފައި ހުރި ތުހުމަތުތައް ވަކި މަދެއް ނޫނެވެ.

އުމްރާއަށް ގެންގޮސް އަނެއްކާވެސް ހާލުގައި ޖައްސާފައި!

އުމްރާގެ ވައްކަމުގެ ވާހަކަ އަނެއްކާ ވެސް މި ވަނީ ފެންމަތިވެފައެވެ. އަމިއްލަ ކުންފުންޏެއްގެ ބެލުމުގެ ދަށުން އުމްރާ އަށް ގެންދިޔަ ބަޔަކު ރާއްޖެ އާދެވޭނެ ގޮތެއް ނެތި ތާށިވެފައިވާ ކަމުގެ ޚަބަރުތައް ވަނީ ފެތުރިފައެވެ. އެހެން ފަހަރުތަކެކޭ އެއްގޮތަށް މި ފަހަރު ވެސް އެ މީހުން ރާއްޖެ ގެންނަން ޖެހިފައި މި ވަނީ ސަރުކާރު މެދުވެރިވެގެން ކޮންމެ ވެސް ހައްލެއް ހޯދައިގެންނެވެ. މިއީ އާ ކަމެއް ނޫނެވެ.

advertisement

މި ފަހަރު ސައުދީގައި ތާށިވެގެން އުޅެނީ އަލްހިޖްރަ ޓްރެވެލް އެންޑް ޓުއާސް ކިޔާ ކުންފުންޏެއްގެ ބެލުމުގެ ދަށުގައި އުމްރާ އަށް ދިޔަ ބައެކެވެ. މި ގްރޫޕްގެ މީހުން ފުރުމުގައި ވެސް ބޮޑެތި ދަތިތަކެއް ކުރިމަތިވިއެވެ. އެ ގޮތުން ފުރަން އޮތް ދުވަހު ފްލައިޓް ހަމަނުޖެހިގެން ނުފުރި އެކި މީހުން ފުރުވާލާފައި ވަނީ އެކި ފްލައިޓްތަކަށް ބަހާލައިގެންނެވެ. އެ ގްރޫޕްގެ ހަވާލުގައި 24 މީހަކު މިދިޔަ ޑިސެމްބަރުގައި އުމްރާ އަށް ގޮސްފައިވާ އިރު އެ މީހުންގެ ރިޓާން ޓިކެޓް ހަމަނުޖެހި މިހާރު ތިބީ ސައުދީގައި ތާށިވެފައެވެ. އެ ގްރޫޕްގެ ފޭސްޕުކް ޕޭޖްގައި މީގެ ކުރިން ކުރި ޕޯސްޓެއްގައި ބުނެފައި ވަނީ އުމްރާވެރިން ގެނައުމަށް މަސައްކަތް ކުރަމުން ދާ ކަމަށާއި ނަމަވެސް މިއަދާ ހަމައަށް ވެސް އެކަމުގައި އަލިމަގެއް ފެނިފައި ނުވާ ކަމަށެވެ. އެ ޕޯސްޓް ފަހުން ވަނީ ނަގާފައެވެ.

އަދިވެސް ދަނީ ޕެކޭޖްތައް ވިއްކަމުން!

އުމްރާ އަށް މީހުން ގެންދިއުމަށް އިސްލާމިކް މިނިސްޓްރީން ވެސް ހުއްދަދީފައިވާ އެ ކުންފުނީގެ ހިއްސާދާރުން ކަމަށް ބިޒްނަސް ޕޯޓަލް އިން ދައްކަނީ ފިރާގް މުހައްމަދު ފުޅު އަދި މުސްތަފާ މުހައްމަދު ފުޅު ކިޔާ ދެ މީހެކެވެ. އެ ގްރޫޕުން ޑިސެމްބަރު މަހު އުމްރާ ދަތުރު ޕްރޮމޯޓްކުރުމަށް ފޭސްބުކްގައި ކޮށްފައިވާ ޕޯސްޓެއްގައި ވާ ގޮތުން ދެކޮޅު ޓިކެޓާއި، ވިސާ، ހަރަމާއި ކައިރިން ހޮޓާ، މައްކާ/މަދީނާ ޒިޔާރަތް ދަތުރާއި، ދެ އުމްރާ، ދިވެހި ކެއުން އަދި ކޮންމެ މީހަކަށް ފަސް ލިޓަރުގެ ޒަމްޒަމް ފެން ފުޅިއެއް ލިބޭ ގޮތަށް ކުރާ މި ދަތުރުގެ އަގަކީ 28،500ރ. އެވެ. ސުވާލަކީ އިޝްތިހާރުގައި ބުނެފައިވާ ގޮތަށް ދެކޮޅު ޓިކެޓް ނުނެގީ ކީއްވެ ހެއްޔެވެ؟ އަދި މީހުން ފުރުވާލުމުގައި މައްސަލަ ޖެހުނު އިރު ވެސް ފުރި މީހުން އަނބުރާ އާދެވޭނެ ކަން އިސްލާމިކް މިނިސްޓްރީން ކަށަވަރު ނުކުރީ ކީއްވެ ހެއްޔެވެ؟

މި މައްސަލަ ފެންމަތިވެފައިވާ އިރު މި ގްރޫޕުން ގެންދަނީ ކުރިއަށް އޮތް ރޯދަ މަހަށް ވެސް ޕެކޭޖްތައް ވިއްކަމުންނެވެ. އެ ގްރޫޕްގެ ފޭސްބުކް ޕޭޖްގައިވާ ގޮތުން މުޅި ރޯދަ މަސް ހަ ރޯދައާއި އެކު އުމްރާ ޕެކޭޖްގެ އަގަކީ 43،000ރ. އެވެ. އެ ޕެކޭޖްގައި ހިމެނެނީ، ދެކޮޅު ޓިކެޓާއި، ވިސާ، ހަރަމާއި ކައިރިން ހޮޓާ، މައްކާ/މަދީނާ ޒިޔާރަތް ދަތުރު، ދެ އުމްރާ، ދިވެހި ކެއުން، އިހްރާމް، ފައިވާން ލާ ދަބަސް، ދުއާ ފޮތް އަދި ފަސް ލީޓަރުގެ ޒަމްޒަމް ފެންފުޅިއެކެވެ. މީގެ އިތުރުން އިތުރު އަގަކާ އެކު ތިން ވަނަ އުމްރާއަކާއި ޘާއިފް އަދި ޖިއްދާ ދަތުރާއި އެ ނޫން ވެސް ތަންތަނަށް ޒިޔާރަތްކުރުމުގެ ފުރުސަތު ފަހިކޮށްދޭ ކަމަށް އެ ޕޯސްޓްގައި ވެއެވެ. މައުލޫމާތު ލިބިފައިވާ ގޮތުގައި މި ގްރޫޕުން މިހާރު ވެސް ވަނީ ރޯދަ މަހުގެ އުމްރާ އަށް ބައެއް ފަރާތްތަކުގެ އަތުން ފައިސާ ވެސް ނަގާފައެވެ. ހަމަ މިހުރިހާ ކަމެއް ހިމަނައިގެން ރޯދަ މަހުގެ ފަހު 15 އަދި ހަ ރޯދަ ހިމެނޭހެން 39،500ރ. އަށް ވެސް ވަކި ޕެކޭޖެއް ދަނީ ވިއްކަމުންނެވެ.

މި މައްސަލަ ފެންމަތިވުމާއި ގުޅިގެން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އެކްސްގައި ކުރެއްވި ޕޯސްޓެއްގައި ވިދާޅުވެފައި ވަނީ އެކަން ހައްލުކުރުމަށް އެ މިނިސްޓްރީން މަސައްކަތް ކުރަމުން އަންނަ ކަމަށެވެ. އަދި ހައްޖު ކޯޕަރޭޝަން މެދުވެރިކޮށް އުމްރާ ވެރިންނަށް އެހީވުމަށް މަސައްކަތް ކުރަމުން އަންނަ ކަމަށާއި އުމްރާވެރިންނާއި މެދު އިހްމާލުވި ހިޖްރަ ގްރޫޕްގެ ވެރިންގެ މައްސަލަ ތަހުގީގުކޮށް ފިޔަވަޅު އަޅާނެ ކަމަށް ވެސް މިނިސްޓަރުގެ ޕޯސްޓްގައި ވެއެވެ.

އުމްރާވެރިންނާ މެދު އިހްމާލުވި ހިޖުރަ ގްރޫޕްގެވެރިންގެ މައްސަލަ ތަޙްޤީޤުކޮށް ފިޔަވަޅު އަޅާނަން.— Mohamed Shaheem Ali Saeed (@Mohamedshaheem1) January 8, 2025

މައްކާގައި މިވަގުތުގައި އޮތް މޯލްޑިވްސް ޙައްޖު ކޯޕަރޭޝަންގެ މެދުވެރިކޮށް، ހާލުގައި ޖެހުނު އުމްރާވެރިންނަށް އެހީވުމަށް މިދަނީ މަސައްކަތްކުރަމުން. އަޅުގަނޑުވާނީ ހައްޖު ކޯޕަރޭޝަންގެ އެމްޑީއަށް އިރުޝާދު ދީފަ.— Mohamed Shaheem Ali Saeed (@Mohamedshaheem1) January 8, 2025

ތަކުރާރުކޮށް ވަމުންދާ ކަމެއް، ހައްލެއް ނުލިބޭ

މިއީ ހަމަ ކޮންމެ އަހަރަކު ކަހަލަ ގޮތަކަށް ދިމާވާ މައްސަލައެކެވެ. އެކި ފަހަރު އެކި ގްރޫޕްތަކުން މިފަދަ ބޮޑެތި އޮޅުވާލުންތައް އޮޅުވާލައެވެ. ބައެއް ކުންފުނިތަކުން ތަކުރާރުކޮށް ވެސް އޮޅުވާލާފައި އެބަ ހުއްޓެވެ. މީގެ ކުރިން ހައްޖުގެ އަޅުކަމުގައި ވެސް މިފަދަ ބޮޑެތި އޮޅުވާލުންތައް އޮޅުވާލައި މަކަރު ހެދުމުގެ ސަބަބުން އެތައް ބަޔަކަށް އަދިވެސް ބަދަލު ނުލިބި އެބަ ތިއްބެވެ. މަލީޝާ ހައްޖު ގްރޫޕްގެ ސްކޭމާއި ފަތުހު ގްރޫޕްގެ މައްސަލަ އާއި މަޝްއަރު ހައްޖު ގްރޫޕުން ދެ އަހަރު އޮޅުވާލައިގެން މީހުން އުމްރާ އަށް ގެންގޮސް ލަނޑު ދިން މައްސަލަ ފަދަ އެތައް މައްސަލައެއް މީގެ ކުރިން ފެންމަތިވެފައި ވެއެވެ. ސަރުކާރުން ކުންފުންޏެއް އުފައްދައި ހައްޖުގެ އަޅުކަމަށް މީހުން ގެންދަން ފަށަންޖެހުނު މައިގަނޑު ސަބަބަކީ ވެސް މި ވައްކަންތައް ބޮޑުވުމެވެ. ކޯޓާ ދޫކުރުމުގައި ވެސް ކޮރަޕްޝަން އިންތިހާ އަށް އޮންނަ ކަމަށް އަބަދު ވެސް ތުހުމަތުކުރެވެއެވެ. ހައްޖު ކޯޓާގެ މައްސަލާގައި އޭސީސީ އަށް މައްސަލައެއް ހުށަނާޅާ ފަހަރެއް ނުދެއޭ ބުންޏަސް ދޮގަކަށް ނުވާނެއެވެ.

ސަރުކާރުން މިހާރު ނިންމާފައި ވަނީ އަމިއްލަ ކުންފުނިތަކަށް ހައްޖު ކޯޓާ ނުދިނުމަށެވެ. މައިގަނޑު ސަބަބަކީ މިފަދަ މަކަރުތަކަށް ފުރުސަތު ނުދިނުމާއި ހައްޖު ކޯޕަރޭޝަންގެ ކިޔުގައި ވެސް އެތައް ހާސް ބަޔަކު ތިބުމެވެ. ބައެއް މައްސަލަތަކާއި ތުހުމަތުތައް ހުރި ނަމަވެސް ޖުމްލަ ގޮތެއްގައި ސަރުކާރުގެ މި ނިންމުމަށް ގިނަ ބަޔަކު ތާއީދުކުރިއެވެ.

ސަރުކާރުން ހައްޖުދަތުރުތައް ނެގުމުން އަމިއްލަ ކުންފުނިތައް އުމްރާއަށް

ހައްޖަށް މީހުން ނުގެންދެވޭތީ އަމިއްލަ ކުންފުނިތަކުން މިހާރު އެންމެ ބޮޑު ވާދަވެރިކަމެއް އޮތީ އުމްރާ އަށް މީހުން ގެންދިއުމުގައެވެ. އުމްރާ އަށް ދޭ ހުއްދަ ނުހޯދައި ވެސް އެތައް ކުންފުންޏަކުން އުމްރާ އަށް މީހުން އެބަ ގެންދެއެވެ. ވިސާ އަށް ސައުދީން ދިން ލުއިތަކާ އެކު ޓުއަރ އޮޕަރޭޓަރުންނަށް ވެސް ސައުދީ ޓުއަރ ޕެކޭޖްތައް ދަނީ ވިއްކަމުންނެވެ. އަދި ޓުއާގެ ގޮތުގައި އޮޅުވާލައިގެން އުމްރާ ދަތުރުތައް ވެސް އަންނަނީ ކުރަމުންނެވެ. އެ ގޮތުން މިދިޔަ އަހަރުގެ ކުރީކޮޅު އުމްރާގެ ހުއްދަ ނެތި ޓުއަރ އޮޕަރޭޓަރެއްގެ ގޮތުން އުމްރާ އަށް މީހުން ގެންދިޔަ ބަޔަކު ވެސް ހާލުގައި ޖެހުނު މައްސަލައެއް ފެންމަތިވިއެވެ.

އެ ގޮތުން އަލް މަޝްއަރު ޓުއާސް އިން ގެންދިޔަ މީހުން ހާލުގައި ޖެހުމުން އެ ފަހަރު ވެސް އެ މީހުން ރާއްޖެ ގެންނަން ޖެހުނީ އިސްލާމިކް މިނިސްޓްރީ މެދުވެރި ވެގެންނެވެ. އެ މީހުން ސައުދީގައި ތާށިވީ އެ ގްރޫޕުން ޓިކެޓް ނެގި އޭސް ޓްރެވެލްސް އަށް ފައިސާ ނުދައްކާތީ ޓިކެޓްތައް ކެންސަލްކުރުމުންނެވެ. އެ ކުންފުނިން ވަނީ އޭގެ ކުރިން 2023 ވަނަ އަހަރު އަލް މަޝްއަރު ހައްޖު އެންޑް އުމްރާ ގްރޫޕްގެ ނަމުގައި ބަޔަކު އުމްރާ އަށް ގެންގޮސް ހާއްލުގައި ޖައްސާފައެވެ. އެފަހަރު ވެސް ފްލައިޓް ޗާޓާކުރުމާއި ޓިކެޓަށްވާ ފައިސާ އަށް ދޫކުރި ޗެކްތައް ބައުންސްވެ އުމްރާވެރިން މައްކާގައި ތާށިވުމުން ރާއްޖެ ގެންނަން ޖެހުނީ އިސްލާމިކް މިނިސްޓްރީން އެކަމުގެ ތެރެއަށް ވަރަށް ބޮޑަށް ވަދެގެންނެވެ. ތާށިވި 138 މީހުން ރާއްޖެ ގެނައީ ޓިކެޓް ފައިސާގެ އެއްބައި ދައްކައި އަނެއް ބައި ފަހުން ދައްކާ ގޮތަށް މިނިސްޓްރީ މެދުވެރިކޮށެވެ. 

އުމްރާ އަށް މީހުން ގެންދިއުމުގައި މަކަރު ހަދާ މައްސަލައާ ގުޅިގެން އިސްލާމިކް މިނިސްޓްރީން މީގެ ކުރިން ވަނީ ކަންބޮޑުވުން ފާޅުކޮށްފައެވެ. މި އަހަރުގެ މެދުތެރޭގައި ނޫސްވެރިންނާއި ބައްދަލުކުރައްވައި މިނިސްޓަރު ޑރ. ޝަހީމް ވަނީ އުމްރާ އަށް ދާން ފައިސާ ދައްކަނީ އުމްރާއަށް މީހުން ގެންދިއުމުގެ ހުއްދަ އޮންނަ ބައެއްތޯ ބެލުމަށް އިލްތިމާސް ކުރައްވާފައެވެ. އެހެން ނަމަވެސް މި ފަހަރު ހާލުގައި ޖެހިފައި މި ވަނީ މިނިސްޓްރީން ހުއްދަ ވެސް ދީފައިވާ ގްރޫޕަކުން ގެންދިޔަ ބައެކެވެ. އެހެން ކަމުން ހުއްދަ އޮތް ކުންފުނިތަކަށް ވެސް އިތުބާރުކުރަންޖެހޭ ސަބަބެއް ނެތެވެ.

މި މައްސަލަ ފެންމަތިވުމާ އެކު ސޯޝަލް މީޑިއާގައި އެތައް ބަޔަކު ދަނީ އުމްރާ އަށް މީހުން ގެންދިއުމަށް އަމިއްލަ ކުންފުނިތަކަށް ހުއްދަ ނުދިނުމަށް ގޮވާލަމުންނެވެ. މިއީ މީގެ ކުރިން ހައްޖުގެ އަޅުކަމަށް މީހުން ގެންދިއުމުގައި ބޮޑެތި މަކަރުތައް ހަދަން ފެށުމުން ވެސް ގިނަ ބަޔަކު ފާޅުކުރި ހިޔާލެކެވެ. އެ ގޮތުން ހަމައެކަނި ސަރުކާރުގެ ކުންފުންޏަށް ފުރުސަތު ދިނުމަށް އަންނަނީ ގޮވާލަމުންނެވެ.

މޯލްޑިވްސް ޙައްޖު ކޯޕަރޭޝަން ވަރުގަދަ ކަމާއެކު ވުޖޫދުގައި އޮންނަންޖެހެނީ ކީއްވެގެންކަން ޙާލުގެ ދުލުން ނުކިޔައިދޭތޯ؟ ހައްޖު ކޯޕަރޭޝަނާ މެދު ދިވެހިން އުފާވާންވާނެ..❤️❤️@schakyyl https://t.co/z0F53bN83p— Mohamed Shaheem Ali Saeed (@Mohamedshaheem1) January 8, 2025

“މޯލްޑިވްސް ޙައްޖު ކޯޕަރޭޝަން ވަރުގަދަ ކަމާއެކު ވުޖޫދުގައި އޮންނަންޖެހެނީ ކީއްވެގެންކަން ޙާލުގެ ދުލުން ނުކިޔައިދޭތޯ؟ ހައްޖު ކޯޕަރޭޝަނާއި މެދު ދިވެހިން އުފާވާންވާނެ،” މިނިސްޓަރު ޑރ. ޝަހީމް އެކްސްގައި ކުރެއްވި ޕޯސްޓެއްގައި ވިދާޅުވެފައި ވެއެވެ.

ދިވެހިން ހައްޖަށް ގެންދިއުމުގެ އިންތިޒާމްތައް މިހާރު ކުރަމުން އަންނަނީ ހައްޖު ކޯޕަރޭޝަނުންނެވެ. އެ ކޯޕަރޭޝަންގެ ހިދުމަތަށް ގިނަ ބަޔަކު ތައުރީފްކުރެއެވެ. ކިޔުގެ މައްސަލައަކީ ކޯޓާއާ ގުޅިފައި އޮތް ކަމެކެވެ. އެހެންކަމުން އެ މައްސަލައަށް އަވަސް ހައްލެއް ލިބޭނެ ކަމަކަށް ނުބެލެވެއެވެ. ހައްޖުގެ އިތުރުން އެ ކޯޕަރޭޝަނުން މިހާރު ވެސް އުމްރާ އަށް މީހުން ގެންދެއެވެ. އަދި އެ ހިދުމަތާއި މެދު އެތައް ބަޔަކު ތައުރީފް ވެސް ކުރެއެވެ. އެހެންކަމުން އުމްރާ އަށް ހުއްދަ ދިނުން ހުއްޓާލައި ހައްޖު ކޯޕަރޭޝަން ފުޅާނުކުރަންވީ ސަބަބެއް ނެތެވެ. އަދި އުމްރާގެ ގޮތުގައި ޓުއަރ އޮޕަރޭޓަރުންނަށް ވެސް މީހުން ނުގެންދެވޭ ގޮތަށް ހެދުމަކުން އޮތް ގޯހަކީ ކޮބައި ހެއްޔެވެ؟ އުމްރާގެ ވައްކަމަށް ހައްލެއް ލިބެންޖެހެއެވެ.