ގެއްލޭ ޕާސްޕޯޓާއި ވަގައްނަގާ ޕާސްޕޯޓުގެ މައުލޫމާތު އިންޓަޕޯލްގައި ހިމަނަން ނިންމައިފި

ގެއްލޭ ޕާސްޕޯޓާއި ވަގަށްނަގާ ޕާސްޕޯޓް ނުވަތަ އެހެނިހެން ސަބަބުތަކާހުރެ ކެންސަލްކުރާ ޕާސްޕޯޓުގެ މަޢުލޫމާތު އިންޓަޕޯލްގައި ހިމެނުމަށް ނިންމާފައިވާކަމަށް މޯލްޑިވްސް އިމިގްރޭޝަނުން ވިދާޅުވެއްޖެއެވެ.

މިގޮތަށް ނިންމާފައިވަނީ ގެއްލޭ އަދި ވަގަށް ނަގަ ޕާސްޕޯޓް ބޭނުންކޮށްގެން ކުރާ ކުށްތައް ހުޓުވުމަށްޓަކައި، މި މަޢުލޫމާތު އިންޓަޕޯލް މެދުވެރިކޮށް އެހެން ޤައުމުތަކުގެ އިމިގްރޭޝަންގެ ސަމާލުކަމަށް ގެނައުމަށްކަމަށް އިމިޤްރޭޝަނުން ވިދާޅުވެއެވެ.

advertisement

އިންޓަރޕޯލާއި ދިވެހި ސަރުކާރާ ދެމެދު ވެފައިވާ އެއްބަސްވުމުގެ ދަށުން، ގެއްލުމުން ނުވަތަ ވަގަށް ނެގުމުން ނުވަތަ އެހެނިހެން ސަބަބަކާ ގުޅިގެން ކެންސަލު ކުރާ ޕާސްޕޯޓާއި ދަތުރުކުރުމުގެ އެހެނިހެން ލިޔުންތައް އިންޓަރޕޯލާ ޙިއްޞާކުރަން ޖެހެއެވެ.

އެހެންކަމުން މިމަހުގެ 25ވަނަ ދުވަހުން ފެށިގެން ދޫކުރާ ދިވެހި ޕާސްޕޯޓާއި ދަތުރުކުރުމުގެ ވަގުތީ ލިޔުން ގެއްލިގެން ނުވަތަ ވަގަން ނެގުމުން ރިޕޯޓު ކުރުމުން އެމަޢުލޫމާތު އިންޓަރޕޯލްގެ “ސްޓޯލަން އެންޑް ލޮސްޓް ޓްރެވަލް ޑޮކިއުމެންޓް” (އެސް.އެލް.ޓީ.ޑީ) ޑާޓާބޭސްގައި ހިމަނަމުންދާނެކަމަށް އިމިގްރޭޝަނުން ވަނީ ވިދާޅުވެފައެވެ.

މިފަދަ މަޢުލޫމާތެއް ރިޕޯޓު ކުރާ ވަގުތުން ފެށިގެން ޕާސްޕޯޓަކީ ދަތުރު ކުރުމަށް ބޭނުން ކުރެވޭ ސައްޙަ ލިޔެކިއުމަކަށް ނުވާނެއެވެ. އެހެންކަމުން ރިޕޯޓު ކުރާ ފަހުން ޕާސްޕޯޓު ފެނިއްޖެ ހާލަތެއްގައި، ރާއްޖެއާއި އަދި ރާއްޖެއިން ބޭރުގެ ޤައުމުތަކުން އެތެރެވެ ބޭރުވުމަށް ސައްޚަ ލިޔެކިއުމެއްގެ ގޮތުގައި އެފަދަ ޕާސްޕޯޓެއް ބޭނުން ނުކުރެވޭނެކަމަށްވެސް އިމިގްރޭޝަނުން ވިދާޅުވިއެވެ.