ބައިނަލްއަޤްވާމީ 30 އެއަރލައިނަކުން މިހާރު އަންނަނީ ރާއްޖެއަށް ދަތުރުކުރަމުން

ކޯވިޑް19 އަށްފަހު އަލުން ރާއްޖެއަށް ދަތުރުފެށި ބައިނަލްއަޤްވާމީ އެއަރލައިންތަކުގެ އަދަދު 30 އަށް އަރައިފިއެވެ.

ޓުއަރިޒަމް މިނިސްޓްރީގެ ‘މޯލްޑިވްސް ޓޫރިޒަމް އަޕްޑޭޓްސް’ ރިޕޯޓުގައިވާ ގޮތުން ރާއްޖެއަށް މިހާރު ދަތުރުތައް ބާއްވާ 30 އެއަރލައިންގެ ތެރޭގައި ހިމެނެނީ ރާއްޖެއަށް ޝެޑިއުލް ދަތުރުތައް ބާއްވާ 23 އެއަރލައިންއަކާއި ޗާޓަރ ދަތުރުތައް ބާއްވާ 7 އެއަރލައިންއެކެވެ.

ރާއްޖެއަށް ޝެޑިއުލް ދަތުރުތައް ބާއްވަމުންދާ އެއަރލައިންތަކުގެތެރޭގައި ދުނިޔޭގެ މަޤްބޫލު ބައެއް ބޮޑެތި އެއަރލައިންތައްވެސް ހިމެނެއެވެ. އޭގެތެރޭގައި އެމިރޭޓްސް، ޤަތަރު އެއަރވޭސް، ސްޕައިސްޖެޓް، ސްރީލަންކަން އެއަރލައިން، ޓާކިޝް އެއަރލައިން، އޭރޯފްލޮޓް، އެއަރ އިންޑިއާ، އެޑްލްވެއިސް، އެމިރޭޓްސް، އިއްތިހާދު އެއަރވޭސް ފަދަ އެއަރލައިންތައް ހިމެނެއެވެ.

ރާއްޖެއަށް ޗާޓަރު ދަތުރުތައް ބާއްވަމުންދާ 7 އެއަރލައިންއަކީ އެއާ އަސްތާނާ، އަޒުރު އެއަރ ޔޫކްރެއިން، ގުލިވައާ، ޔޫކްރެއިން އިންޓަރނޭޝަނަލް، ސްކެޓް އެއަރވޭސް، އުޒްބަކިސްތާން އެއަރވޭސް އަދި ބުއޫ އެއަރއެވެ.

ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން ރާއްޖެއަށް އެންމެ ގިނަ އަދަދަކަށް ފަތުރުވެރިން އައިސްފައިވަނީ އެމިރޭޓްސް އެއަރލައިންސްގެ ފްލައިޓުތަކުގައެވެ. އއަހަރުގެ މިހާތަނަށް އެމިރޭޓްސްއިން ރާއްޖެއަށް ވަނީ 396 ދަތުރުކޮށްފައެވެ. މި ދަތުރުތަކުގައި 35228 ފަތުރުވެރިން ރާއްޖެއަށް އައިސްވާ ކަމަށް ތަފާސް ހިސާބުތަކުން ދައްކައެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން އަހަރުގެ މިހާތަނަށް ރާއްޖެއަށް 176000 އަށްވުރެ ގިނަ ފަތުރުވެރިން ވަނީ އައިސްފައެވެ. އެންމެ ގިނަ ފަތުރުވެރިން ރާއްޖެ އައިސްފައިވަނީ އިންޑިއާއިންނެވެ.

advertisement