އެމްއެމްޕީއާރުސީން ތުރުކީގައި ރާއްޖެ އިޝްތިހާރުކުރަނީ

ތުރުކީގައި ރާއްޖޭގެ ފަތުރުވެރިކަން އިޝްތިހާރުކޮށް އެޤައުމުން ރާއްޖެއަށް އަންނަ ފަތުުރުވެރިންގެ އަދަދު އިތުރުކުރުމަށް ޓްރެވަލް ތުރުކީ އިޒްމީރް ޑިޖިޓަލް ފެއާގައި ރާއްޖެއިން ބައިވެރިވެއްޖެއެވެ.

މޯލްޑިވްސް މަރކެޓިންގ އެންޑް ޕަބްލިކް ރިލޭޝަންސް ކޯރޕަރޭޝަން، އެމްއެމްޕީއާރުސީން މިފެއާގައި ރާއްޖެ ތަމްސީލުކުރާނީ ޚާއްސަ ސްޓޭންޑެއް ބަހައްޓައިގެންނެވެ. ރާއްޖޭގެ ސްޓޭންޑް މެދުވެރިކޮށް ޓުއަރިޒަމް ޕްރޮޑަކްޓްތަކުގެ މައުލޫމާތާއި ރާއްޖެއާ ބެހޭ އެންމެ ފަހުގެ މައުލޫމާތުގެ އިތުރުން ރާއްޖެއަކީ ފަތުރުވެރިންނަށް ރައްކާތެރި މަންޒިލެއްގެ ގޮތުގައި އިޝްތިހާރު ކުރާނެއެވެ.

މި ފެއާގައި ކުރިއަށްދާ ޚާއްސަ ވެބިނާ ސެޝަންއެއްގައި އެމްއެމްޕީއާރުސީގެ މެނޭޖިން ޑިރެކްޓަރު ތައްޔިބު މުޙައްމަދު ބައިވެރިވެވަޑައިގެން ރާއްޖޭގެ ފަތުރުވެރިކަމަށް ކޯވިޑް-19ގެ ސަބަބުން ދިމާވި ގޮންޖެހުންތަކާއި ރައްކާތެރި ފަތުރުވެރި މަންޒިލެއްގެ ގޮތުގައި ރާއްޖެ އިޝްތިހާރުކުރުމަށް ހިންގަމުން އަންނަ ހަރަކާތްތަކާ ބެހޭގޮތުން ވާހަކަދައްކަވާނެއެވެ.
މިމަހުގެ 25 އިން 27 ވަނަ ދުވަހުގެ ނިޔަލަށް ކުރިއަށްދާ މި ފެއާގައި ދުނިޔޭގެ އެކި ގައުމުތަކުގެ ފަތުރުވެރިކަމުގެ ދާއިރާގެ އެންމެ އިސްފަރާތްތަކުން ބައިވެރިވާނެއެވެ. ތިން ދުވަހުގެ މުއްދަތަށް ކުރިއަށްދާ މިފެއާގެ ޕްލެޓްފޯމްގެ ތެރެއިން ފެއާއަށް ޒިޔާރަތްކުރާ އަދި ބައިވެރިވާ އެކި ފަރާތްތަކާ ބައްދަލުކުރުމަށް އެޕޮއިންޓްމަންޓް ހެދުމުގެ ފުރުސަތު ފަހިވެފައިވާއިރު މިއީ ދުނިޔޭގެ އެކި ކަންކޮޅުތަކުން މިފެއާގައި ބައިވެރިވާ ފަރާތްތަކާއެކު ވިޔަފާރި ގުޅުން ޤާއިމްކުރަން ލިބޭ މުހިންމު ފުރުސަތެއްގެ ގޮތުގައި އެމްއެމްޕީއާރުސީން ދެކެއެވެ. 14 ވަނަ ޓްރެވަލް ތުރުކީ އިޒްމީރް ފެއާ (ޓީ.ޓީ.އައި) އަކީ ތުރުކީގައި ބާއްވަމުން އަންނަ ޓްރެވަލް ޓްރޭޑް ފެއާތަކުގެ ތެރެއިން ވާޗުއަލްކޮށް އެންމެ ފުރަތަމަ ބާއްވާ ފެއާއެވެ.

ރާއްޖެ އާއި ތުރުކީއާ ދެމެދު ސީދާ ދަތުރުތައް ކުރާއިރު އެގައުމުން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުކޮށް ކުރިއަށް އޮތް ތަނުގައި އިތުރުކޮށް ކުރިއެރުވުމަށް ރާވާފައިވާކަމަށް އެމްއެމްޕީއާރުސީން ހާމަކުރެއެވެ. މިދިޔަ އަހަރު ތުރުކީން ވަނީ ދިވެހިރާއްޖެ 3,164 ފަތުރުވެރިން ޒިޔާރަތްކޮށްފައެވެ.

advertisement