އިތުރު 1 ލައްކަ ޑޯޒްގެ ވެކްސިން ވަނީ ރާއްޖެއަށް ލިބިފައި – އެޗްއީއޯސީ

ކޮވިޑް-19 އާއި ދެކޮޅަށް ބޭނުންކުރާ ވެކްސިންގެ އިތުރު 100،000 ޑޯޒް ރާއްޖެއަށް ގެނެސްފައިވާ ކަމަށް ހެލްތް އިމާޖަންސީ އޮޕަރޭޝަން ސެންޓަރު (އެޗްއީއޯސީ) އިން ބުނެފި އެވެ.

ރާއްޖޭގައި ކޮވިޑް ވެކްސިން ޕްރަގްރާމް ފެށީ މިމަހުގެ 1 ވަނަ ދުވަހުއެވެ. ވެކްސިން ޕްރޮގްރާމް ފެށިއިރު ޖަހަންފަށާފައިވަނީ އިންޑިއާއިން ރާއްޖެއަށް ހަދިޔާކުރި ކޮވިޝިލްޑްގެ 1 ލައްކ ވެކްސިން ޑޯޒްއެވެ. މިހާތަނަށް ރާއްޖޭގައި ކޯވިޑް ވެކްސިން ޖެހި މީހުންގެ އަދަދު ވަނީ 105،000 އަށް އަރާފައެވެ.

advertisement

އެޗްއީއޯސީން ވިދާޅުވީ، ވެކްސިންގެ އިތުރު 100،000 ޑޯޒް ރާއްޖެއަށް ގެނެސްފައިވާކަމަށެވެ. އަދި ވެކްސިން ޕްރަގްރާމް މެދުނުކެނޑި ކުރިއަށްދާނެ ކަމުގެ ޔަޤީންކަން އެޗްއީއޯސީން ވަނީ ދެއްވާފައެވެ.

އިންޑިއާއިން ވަނީ އިތުރު 100،000 ވެކްސިން ޑޯޒް ރާއްޖެއަށް ހަދިޔާކޮށްފައެވެ. 1 ލައްކަ ޑޯޒް ހަދިޔާކުރާނެކަން އިންޑިއާއިން އިއުލާންކުރީ އެ ޤައުމުގެ އެކްސްޓާނަލް އެފެއާޒް މިނިސްޓަރު ސުބުރަހްމަންޔަން ޖައިޝަންކަރު މި މަހު ރާއްޖެއަށް ކުރެއްވި ދަތުރުފުޅުގައެވެ.

އެޗްއީއޯސީން ބުނީ އިންޑިއާއިން ރާއްޖެއަށް ހަދިޔާކުރާ 1 ލައްކަ ޑޯޒްގެ ވެކްސިން ޑޯޒް މިހާރު ރާއްޖެއަށް ލިބިފައިވާކަމަށެވެ.

މިހާތަނަށް މާލެ ސަރަހައްދުން 72،872 މީހަކަށް ވަނީ ކޮވިޑް ވެކްސިން ދީފައެވެ. އަދި އަތޮޅުތަކުން 32،620 މީހަކަށް ވެކްސިން ދީފައިވެއެވެ.