147 ރިސޯޓް އަލުން ހުޅުވައިފި، އެންމެ ގިނައީ ކ. އަތޮޅުގެ ރިސޯޓް

ކޯވިޑް19 އަށްފަހު އަލުން ޙިދުމަތްދިނުމަށް 147 ރިސޯޓެއް ހުޅުވާފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ކޯވިޑަށްފަހު ރާއްޖޭގައި އޮޕަރޭޓްކުރާ ރިސޯޓްތައް އަލުން ހުޅުވައި ޙިދުމަތް ދިނުމުގެ ހުއްދަ ދީފައިވަނީ މިދިޔަ ޖުލައިމަހުއެވެ. ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިހާތަނަށް 147 ރިސޯޓެއް ވަނީ އަލުން ހުޅުވާފައެވެ. މިއާއިއެކު ރިސޯޓްތަކުން އަލުން 34،076 އެނދު ވަނީ އޮޕަރޭޝަނަށް ނެރެވިފައެވެ.

advertisement

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިހާތަނަށް އެންމެ ގިނަ ރިސޯޓް ހުޅުވާފައިވަނީ ކ. އަތޮޅުންނެވެ. އެއީ ޖުމްލަ 48 ރިސޯޓެވެ. މިއާއިއެކު ކ. އަތޮޅުން އަލުން 11،742 އެނދު ވަނީ އޮޕަރޭޝަނަށް ނެރެވިފައެވެ. 2 ވަނަ އަށް އެންމެ ގިނަ ރިސޯޓް ހުޅުވާފައިވަނީ ބ. އަތޮޅު އަދި އދ. އަތޮޅުންނެވެ. މި 2 އަތޮޅުންވެސް ޖުމްލަ 16 ރިސޯޓެއް ވަނީ މިހާތަނަށް ހުޅުވާފައެވެ. އެހެންނަމަވެސް ޙިދުމަތްދެމުންއަންނަ އެނދުގެ ނިސްބަތައް ބަލާއިރު ބ. އަތޮޅަށްވުރެ އދ. އަތޮޅު އުޅެނީ ކުރީގައެވެ. އދ. އަތޮޅުން 4200 އެނދު އޮޕަރޭޝަންގައި ހުރިއިރު ބ. އަތޮޅުގައި އޮޕަރޭޝަންގައި ހުރީ 2953 އެނދެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ރާއްޖޭގެ 18 އަތޮޅެއްގެ ރިސޯޓްތައް ހުޅުވައި މިހާރު އަންނަނީ ޙިދުމަތްދެމުންނެވެ.