20 އަހަރުން މަތީގެ މީހުންނަށް ވެކްސިން ޖަހަން ފަށައިފި

ކޯވިޑް-19އިން ރައްކާތެރިވުމަށް ދޭ ވެކްސިން، ޢުމުރުން 20 އަހަރުން މަތީގެ މީހުންނަށް ދޭން ފަށައިފިއެވެ. އުމުރުން 20 އަހަރުން މަތީގެ މީހުންނަށް ވެކްސިން ދޭންފަށާފައިވަނީ މިއަދުއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ވިދާޅުވެފައިވަނީ މިވަގުތު މިއުމުރުފުރާގެ މީހުންނަށް ވެކްސިން ދިނުމުގެ ކަންކަން ހަމަޖައްސާފައިވަނީ މާލޭ ސަރަޙައްދުގައި އެކަނި ކަމަށެވެ. އަތޮޅުތަކުގައި މިވަގުތު ވެކްސިން ދެމުންދަނީ ސިއްޙީ ދާއިރާގެ މީހުންނާއި ކޯވިޑް-19ގެ ޙާލަތުގައި އިސް ސަފުގައި މަސައްކަތްކުރާ މީހުންނާއި ޢުމުރުން 60 އަހަރުން މަތީގެ މީހުންނާއި ހައިރިސްކް ކެޓަގަރީގައި ހިމެނޭ މީހުންނަށެވެ.

advertisement

ރާއްޖޭގައި ކޯވިޑް ވެކްސިން ޖަހަން ފަށާފައިވަނީ ފެބްރުއަރީ މަހުގެ 1 ވަނަ ދުވަހުއެވެ. ރާޢްޖެއިން މިހާތަނަށް 111،415 މީޙަކު ވެކްސިން ޖަހާފައިވާއިރު މީގެ ތެރެއިން މާލެ ސަރަޙައްދުން 75،163 މީހުން ވަނީ ވެކްސިން ޖަހާފައެވެ. އަދި އޮތޮޅުތަކުން 36،252 މީހުން ވަނީ ވެކްސިން ޖަހާފައެވެ.

މާލޭ ސަރަޙައްދުގައި ވެކްސިންދޭ ތަންތަނާއި ގަޑިތަކަށް ބަލާއިރު ސޯޝަލް ސެންޓަރާ އިސްލާމީ މަރުކަޒާ ހުޅުމާލޭ ވެކްސިނޭޝަން ސެންޓަރުގައި ހެނދުނު 09:00އިން ފެށިގެން 16:30އަށް ވެކްސިން ދިނުން ކުރިއަށްދާނެއެވެ. ރައްޔިތުންގެ މަޖިލީހާއި ޓްރީޓޮޕްގައި ވެކްސިން ދެމުންދަނީ ހެނދުނު 09:00އިން 12:00އަށެވެ. އަދި ވިލިމާލެ ޒުވާނުންގެ މަރުކަޒުގައި ހެނދުނު 09:00އިން 13:00 އަށް ވެކްސިން ދިނުމުގެ ކަންކަން ކުރިއަށްދާނެއެވެ.

ކުޑަކުދިންނާއި، މާބަނޑު މީހުންނާއި، ދިފާއީ ނިޒާމު ބަލިކަށި މީހުންނަށް ވެކްސިން ޖެހުމުގެ ހުއްދަ މިހާތަނަށް ދީފައެއް ނުވެއެވެ. އެހެންކަމުން މުޅި މުޖުތަމަޢުގެ ރައްކާތެރިކަމަށްޓަކާ، ވެކްސިން ޖެހޭ އުމުރުފުރާގެ އެންމެން ވީހާވެސް އަވަހަށް ވެކްސިން ޖެހުމަށް އެޗްޕީއޭއިން އިލްތިމާސްކުރައްވައެވެ.