މާލެ ސަރަހައްދުގެ މިސްކިތްތަކުގައި ޖަމައަތުގައި ނަމާދުކުރާއިރު ގައިދުރުކަން ދެމެހެއްޓުމަށް އެދެފި

މާލެ ސަރަހައްދުގެ މިސްކިތްތަކުގައި ޖަމައަތުގައި ނަމާދުކުރާއިރު ގައިދުރުކަން ދެމެހެއްޓުމަށް ސަމާލުވުމަށް މިނިސްޓްރީ އޮފް އިސްލާމިކް އެފެއާޒުން އެދެފިއެވެ. އެމިނިސްޓްރީން ބުނީ ކޯވިޑް-19ގެ މިހާރުގެ ޙާލަތަށް ލުއި ލިބެންދެން ޖަމާޢަތުގައި ނަމާދުކުރުމުގެ ކަންކަން ކުރިއަށްގެންދިއުމުގައި ހާއްސަ ސަމާލުކަމެއް ބެހެއްޓުމަށް އެދިފައެވެ.

އިސްލާމިކް މިނިސްޓްރީން ބުނީ މިމަހުގެ 1 ވަނަ ދުވަހުގެ މެންދުރު ނަމާދުން ފެށިގެން މާލެ ސަރަޙައްދުގެ މިސްކިތްތަކުގައި ނަމާދުކުރުމުގައި ގައިދުރުކަން ބަހައްޓަން ޖެހޭނެކަމަށެވެ.

advertisement

މިނިސްޓްރީއިން ބުނީ މާލެ ސަރަހައްދުގައި ކޯވިޑް ކޭސްތައް އިތުރުވާން ފެށުމާއިއެކު އަމަލްކުރަންވާ ގޮތްތަކާއި މެދު ހިޔާލް ހޯދުމަށް ފަތުވާދޭ މަޖިލީހާއި ދީނީ ޢިލްމުވެރިންނާއި މަޝްވަރާކޮށްފައިވާކަމަށެވެ.
އިސްލާމިކް މިނިސްޓްރީއިން ވިދާޅުވީ މިހާރު އޮތް ޙާލަތުގައި މިސްކިތްތައް ބަންދުކުރުމަކީ ރައްޔިތުންނަށް ލިބިގެންދާނެ އިތުރު ހިތްދަތިކަމެއްކަމުގައި ފަތުވާދޭ މަޖިލީހާއި ދީނީ ޢިލްމުވެރިން ފާހަގަކުރައްވާކަމަށެވެ. އެގޮތުން މިވަގުތު ގައިދުރުކަން ކަށަވަރުކޮށްގެން ޖަމާޢަތް ހެދުމަށް ފަތުވާ މަޖިލީހާއި ދީނީ ޢިލްމުވެރިން ލަފާދެއްވާފައިވާތީ އެގޮތަށް ނިންމެވީކަމަށެވެ. އަދި ކޯވިޑްގެ ޙާލަތު ރަނގަޅުވާން ފެށުމާއެކު ކުރިއެކޭ އެއްފަދައިން ނަމާދު ޖަމާޢަތްތައް ޤާއިމުކުރެވޭނެކަމަށްވެސް އިސްލާމިކް މިނިސްޓްރީއިން ވިދާޅުވެއެވެ.

އިސްލާމިކް މިނިސްޓްރީގެ ވަނީ މިސްކިތުގައި ޖަމާޢަތުގައި ނަމާދުކުރުމުގައި ސަމާލުކަން ދޭންޖެހޭ ކަންތައްތައް ފާހަގަކޮށްފައެވެ. އެގޮތުން ކޮންމެ ނަމާދެއްގެ ކުރިން މިސްކިތުގައި މޮޕްލައި ސާފުކުރުމާއި، ސައބޯނި ލައިގެން އަތްދޮވެވޭނެ އިންތިޒާމު ޤާއިމުކުރުމާއި، ކޮންމެހެން ބޭނުންކުރަންޖެހޭ ޙާލަތުގައި ނޫނީ އެއަރކޯން ބޭނުން ނުކުރުމާއި، އެއަރކޯން ބޭނުންކުރާނަމަ މިސްކިތުގެ ދޮރުތައް ދޭތެރެދޭތެރެއިން ހުޅުވާ ވައި ބަދަލުވާނެ ގޮތް ހެދުން ހިމެނެއެވެ. މީގެއިތުރުން އެއްވެސް ނަމާދެއް 7 މިނިޓަށްވުރެ ދިގުނުކުރުމަށް އެ މިނިސްޓްރީން ވަނީ އަންގާފައެވެ.