ސަރުކާރުގެ މަޤްބޫލުކަން ފެބްރުއަރީ މަހު %44 ގައި

މޯލްޑިވްސް އޮޕީނިއަން ނެޓްވޯކްއިން ކުރި ދިރާސާއަކުން ދައްކާގޮތުގައި ސަރުކާރުގެ މަޤްބޫލުކަން ފެބްރުއަރީ މަހު އުޅެނީ %44 ގައެވެ.

މޯލްޑިވްސް އޮޕީނިއަން ނެޓްވޯކްއިން އަންނަނީ ސަރުކާރާއި މެދު އާންމުން ދެކޭގޮތް ބެލުމަށް ދިރާސާކުރަމުންނެވެ. އެގޮތުން މިދިޔަ އަހަރުގެ ނޮވެމްބަރ މަހުން ފެށިގެން ކުރަންފެށި މި ދިރާސާގައި މިހާތަނަށް ސަރުކާރުން ކަންތައް ކުރާގޮތް ރަނގަޅުކަމަށް އެންމެ ގިނަބަޔަކު ބުނެފައިވަނީ މިދިޔަ ފެބްރުއަރީ މަހުއެވެ.

advertisement

ފެބްރުއަރީ މަހުގެ ދިރާސާއިން ދައްކާގޮތުން %44 އިންސައްތަ މީހުން ސަރުކާރާއިމެދު ވަނީ ހިތްހަމަޖެހުން ފާޅުކޮށްފައެވެ. %50 އިންސައްތަ މީހުން ބުނެފައިވަނީ ސަރުކާރުން ކަންތައް ކުރާ ގޮތާއިމެދު އެމީހުން އަދި
ހިތްހަމަނުޖެހޭކަމަށެވެ. އަދި %6 މީހުން ވަކި އެއްޗެއް ބުނެފައެއް ނުވެއެވެ

މާރޗް މަހަށް ވޯޓުލުމަށް https://opinion.mv/government-approval ޒިޔާރަޔް ކުރައްވައިގެން ވޯޓުލެވޭނެ.

ސަރުކާރާއިމެދު އެންމެ ގިނަ ބަޔަކު ހިތްހަމަނުޖެހުން ފާޅުކޮށްފައިވަނީ މިދިޔަ ޖަނަވަރީ މަހުގެ ތެރޭގައެވެ. ސަރވޭގައި ބައިވެރިވި %82 މީހުން ވަނީ ޖަނަވަރީ މަހު ސަރުކާރުން ކަންތައްކުރި ގޮތާއިމެދު ހިތްހަމަނުޖެހުން ފާޅުކޮށްފައެވެ. އެމަހުގެ ތެރޭގައި ސަރުކާރުން ކުރި މަސައްކަތް އެޕްރޫވްކޮށްފައިވަނީ ސަރވޭގައި ބައިވެރިވި %18 މީހުންނެވެ.

ޖަނަވަރީ މަހުގެ ތެރޭގައި ސަރުކާރުން އަމަލުކުރިގޮތް ރަނގަޅުކަމަށް %18 މީހުން ބުނުމަށްފަހު ފެބްރުއަރީ މަހުގެ ތެރޭގައި %44 މީހުން ސަރުކާރު ރަނގަޅުކަމަށް ބަލައިގަތުމަކީ ބޮޑު ކުރިއެރުމެކެވެ.
ފެބްރުއަރީ މަހުގެ ސަރުކާރުން ވަނީ ރާއްޖޭގައި ކޯވިޑް ވެކްސިންވެސް ދޭންފަށާފައެވެ. ވެކްސިން ދޭންފެށީ ފެބްރުއަރީ މަހުގެ 1 ވަނަ ދުވަހުއެވެ. ރާއްޖޭގެ އާބާދީގެ އެންމެންނަށް ވެކްސިން ޖަހަނީ މުޅިން ހިލެއެވެ. ފެބްރުއަރީ މަހު އިންސައްތަ މަތިވުމުގެ ސަބަބެއްކަމަށް މިކަން ވުމަކީވެސް އެކަށީގެންވާކަމެކެވެ.

ރާއްޖޭގައި މިހާތަނަށް 117،115 މީހުން ވަނީ ކޯވިޑް ވެކްސިން ޖަހާފައެވެ. ވެކްސިން ޖެހުމުގެ އިތުރުން ކޯވިޑް ބަލިން އަރައިގަތުމަށް ސަރުކާރުން އަންނަނީ ގިނަ ފިޔަވަޅުތަކެއް އަޅަމުންނެވެ. މީގެއިތުރުން ކޯވިޑްގެ ތެރޭގައިވެސް ސަރުކާރުން ވަނީ އާމްދަނީއަށް އަސަރުކުރި ފަރާތްތަކަށް އިންކަމް ސަޕޯޓް އެލަވަންސްގެ ނަމުގައި އެލަވަންސްއެއް ތައާރަފްކޮށް އެ ފަރާތްތައް މަގުމަތިވިޔަ ނުދިނުމަށްވެސް އެހީތެރިވެދީފައެވެ. އިންކަމް ސަޕޯޓް އެލަވަންސްގެ ގޮތުގައި މިހާތަނަށް ސަރުކާރުން ވަނީ 292.8 މިލިއަން ރުފިޔާ 18534 މީހަކަށް ދޫކޮށްފައެވެ.

ކޯވިޑް 19ގެ ސަބަބުން ވިޔަފާރިތަކަށް ލިބުނު ގެއްލުމުން އަރައިގަތުމަށް ސަރުކާރުން ވަނީ “ރިކަވަރީ ލޯނު ސްކީމް” ގެ ނަމުގައި ލޯނެއްވެސް ތައާރަފްކޮށްފައެވެ. މި ލޯނު ކުދި ފަންތިއާއި މެދުފަންތީގެ ވިޔަފާރިތަކަށާއި ބޮޑެތި ވިޔަފާރިތަކަށްވެސް ދޫކުރިއެވެ. މި ލޯނު ސްކީމްގެ ދަށުން ކުދި ފަންތިއާއި މެދު ފަންތީގެ 2108 ވިޔަފާރިއަކަށް 355.4 މިލިއަން ރުފިޔާ މިހާތަނަށް ވަނީ ދޫކޮށްފައެވެ. އަދި ބޮޑެތި ވިޔަފާރިތަކަށް 585.9 މިލިއަން ރުފިޔާ ވަނީ ދޫކޮށްފައެވެ.

މީގެއިތުރުން ސަރުކަރުން މިހާރު ވަނީ ހިޔާ ފްލެޓް ލިބުނު މީހުންގެ ވަގުތީ ލިސްޓް އާންމުކޮށް ޝަކުވާ ހުށައެޅުމަށްވެސް ހުޅުވާލާފައެވެ. އަދި ސަރުކާރުގެ ތަރުޖަމާނަކަށް މަބްރޫކް އަބްދުލް އަޒީޒް ދާދިފަހުން އައްޔަންކުރުމާއިއެކު ސަރުކާރުގެ އެކި ކަންކަމާއި ގުޅޭގޮތުން އާންމުންނަށް އަންނަނީ އެންމެ ފަހުގެ މައުލޫމާތު ފޯރުކޮށްދެމުންނެވެ.