އިއްޔެ ރެކޯޑް އަދަދަކަށް ރާއްޖެއިން މީހުން ވެކްސިން ޖަހައިފި

ކޯވިޑް-19އިން ދިފާޢުވުމަށް އިއްޔެ ރާއްޖޭގައި ރެކޯޑް ޢަދަދަކަށް މީހުން ވެކްސިން ޖަހައިފިއެވެ. މާލެއާއި އަތޮޅުތަކުގެ ރަށްރަށްރަށުގައި ޤާއިމްކޮށްފައިވާ ވެކްސިން ސެންޓަރުތައް ހިމެނޭހެން ރާއްޖޭގައި އިއްޔެ ޖުމްލަ 9،781 މީހުންވަނީ ވެކްސިން ޖަހާފައެވެ.

އެޗްޕީއޭއިން އާންމުކޮށްފައިވާ ތަފާސްހިސާބުތައް ދައްކާގޮތުން އިއްޔެ ރާއްޖެއިން އެންމެ ގިނަ ބަޔަކު ވެކްސިންޖެހީ އަތޮޅުތަކުގެ ސެންޓަރުތަކުގައެވެ. މިގޮތުން އަތޮޅު ތަކުގެ ސެންޓަރުތަކުގައި 5،000 އަށްވުރެ ގިނަ މީހުން އިއްޔެ ވެކްސިން ޖެހިއެވެ. އަދި ވޭތުވެދިޔަ 24 ގަޑިއިރުގެ ތެރޭގައި އަތޮޅުތަކުން 5،322 މީހުންވަނީ ވެކްސިން ޖަހާފައެވެ. މާލެ ސަރަޙައްދުން ވެކްސިން ޖަހާފައިވަނީ 4،459 މީހުންނެވެ.

advertisement

އެޗްޕީއޭގެ ތަފާސްހިސާބުތައް ދައްކާގޮތުން މިހާތަނަށް ރާއްޖެއިން ވެކްސިންޖެހި ޖުމްލަ މީހުންގެ ޢަދަދު މިވަނީ 175،456 އަށް އަރާފައެވެ. އެއީ އަތޮޅުތަކުން 75،633 އަދި މާލެ ސަރަޙައްދުން 99،821 މީހުންނެވެ. ވެކްސިން ޖެހުމުގެ ޚިދުމަތް މިހާރު ދެމުން އަންނަނީ މާލެ ސަރަހައްދުގެ 8 ސެންޓަރަކާއި އަތޮޅުތަކުން 169 ސެންޓަރެއްގައެވެ. އަދި މާލޭ ސަރަޙައްދުގައި ވެކްސިން ދިނުމަށްޓަކައި 2 މޯބައިލް ޓީމްވެސް ހަރަކާތްތެރިވަމުން އާދެއެވެ.