ރީ ރެޖިސްޓްރީވާން 26000 އަށްވުރެ ގިނަ މީހުން ހުށައެޅި

އަންނަ އެޕްރީލް މަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިހާބަށް ރީ ރެޖިސްޓްރީވާން ހުޅުވާލި ފުރުސަތުގައި 26،000 ވުރެ ގިނަ މީހުން ރެޖިސްޓްރީ ކޮށްފައިވާ ކަމަށް އިލެކްޝަންސް ކޮމިޝަނުން ބުނެފި އެވެ. އިންތިޚާބަށް އަލުން ރަޖިސްޓްރީވުމަށް ފުރުސަތު ހުޅުވާލީ މިމަހުގެ 02 ވަނަދުވަހުއެވެ.

އިލެކްޝަންސް ކޮމިޝަންގެ ރައީސް އަހްމަދު ޝަރީފު ވިދާޅުވީ ރީ ރެޖިސްޓްރީކުރުމަށް ހުޅުވާލި ފުރުސަތު މިމަހުގެ 11 ވަނަ ދުވަހު ހަމަވިއިރު އެ ކޮމިޝަނަށް 26،750 ފޯމް ލިބިފައިވާކަމަށެވެ. އޭގެއިތުރުން ފޯކަލް ޕޮއިންޓަތަކަށް އިތުރު ފޯމްތައް ހުށައަޅާފައި ހުރެދާނެކަމަށްވެސް ޝަރީފު ވިދާޅުވިއެވެ.

advertisement

އިންތިޚާބުގައި ވޯޓުލުމަށް ރީރަޖިސްޓަރވުމުގެ ފުރުސަތު އަލުން ދީފައިވަނީ މިދިޔަ އަހަރުގެ އެޕްރީލު މަހުގެ 4 ވަނަ ދުވަހު ބޭއްވުމަށް ނިންމުމަށްފަހު ފަސްކުރި އިންތިޚާބުގައި ރަޖިސްޓްރީކުރި ތަން ނޫން އެހެންތަނަކަށް ވޯޓްލާން ބޭނުންވި ފަރާތްތަކަށެވެ.

ޝަރީފް ވިދާޅުވީ ރީ ރަޖިސްޓްރީވާން ދެން އިތުރު ފުރުސަތެއް ނުދޭނެ ކަމަށެވެ. އިތުރު ފުރުސަތެއް ދީފިނަމަ މިހާރު ކަނޑައަޅާފައިވާ ތާރީހުގައި އިންތިހާބު ނުބޭއްވޭނެ ކަމަށެވެ. އޭނާ ވިދާޅުވީ ކުރިން އިންތިހާބު ބޭއްވުމަށް ރީރަޖިސްޓަރވާން ހުޅުވާލި ފުރުސަތައްވުރެ ގިނައިން މިފަހަރު މީހުން ރަޖިސްޓަރ ވީކަމަށެވެ.

އަންނަ އޭޕްރީލް މަހުގެ 10ވަނަ ދުވަހު ބޭއްވުމަށް ތައްޔާރުވަމުންދާ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވޯޓްލުމުގެ ހައްޤު ލިބިފައިވާ މީހުންގެ އަދަދަކީ 273،128 އެވެ.

މި އިންތިޚާބުގައި ޖުމްލަ 3934 ކެނޑިޑޭޓުން ވާދަކުރާއިރު، އޭގެ ތެރޭގައި ހިމެނެނީ ލޯކަލް ކައުންސިލް އިންތިޚާބުގައި ވާދަކުރާ 2264 ކެނޑިޑޭޓުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވާދަކުރާ 1670 ކެނޑިޑޭޓުންނެވެ.