ރޯދަމަހު ފިޔާ، ބިސް އަދި އަލުވި ވިއްކާނީ ހެޔޮއަގުގައި – ރެޑްވޭވް

ކުރިއަށް އޮތް ރޯދަމަހާއި ދިމާކޮށް ޙާއްސަ އަގުތަކެއްގައި ރެޑްވޭވުން ބިސް، ފިޔާ އަދި އަލުވި ވިއްކަން ނިންމާފައި ވާކަން ހާމަކޮށްފިއެވެ.

ކޮންމެ އަހަރެއްގެ ރަމަޟާން މަހާއި ދިމާކޮށް ބާޒާރުގައި ތަކެތީގެ އަގުތައް އުފުލެއެވެ. ޚާއްސަކޮށް ފިޔާ، ބިސް އަލުވީގެ އަގުތައް އަންނަނީ އިތުރުވަމުންނެވެ.

advertisement

ރެޑްވޭވުން ބުނީ މިއަހަރުގެ ރޯދަމަހު ބިހާއި އަލުވި، އަދި ފިޔާގެ އަގު އުފުލުނަނުދީ އެއްއަގެއްގައި ވިއްކުމަށް މަސައްކަތްކުރަމުން އަންނަކަމަށެވެ. މިހާރުވެސް ރެޑްވޭވުން ވަނީ ބިހުގެ އަގު 1.50ރ އަށް ހެޔޮކޮށްފައެވެ.

ރެޑްވޭވުން ބުނީ ފިޔާ އަދި އަލުވީގެ އައު ޝިޕްމަންޓް ލިބުމާއިއެކު އެތަކެތީގެ އަގުވެސް ވަރަށް އަވަހަށް ހެޔޮކުރާނެކަމަށެވެ. ރޯދަމަސް ނިމެންދެން ފިޔާ އަލުވި އަދި ބިހުގެ އަގު އެއްވަރެއްގައި ބެހެއްޓުމަށް ރެޑްވޭވުން މަސައްކަތް ކުރަމުން އަންނަކަމަށް އެ ކުންފުނިން ވަނީ ބުނެފައެވެ.

ކޯވިޑް19 ގެ ސަބަބުން ރާއްޖޭގެ އަދި މުޅި ދުނިޔޭގެ އިޤްތިޟާދަށްވެސް ވަނީ ބޮޑު ގެއްލުމަކާއި ކުރިމަތިލާން ޖެހިފައެވެ. އެގޮތުން ބާޒާރުގައި ތަކެތީގެ އަގުތައް އުފުލުން ފާހަގަކޮށްލެވެއެވެ. ރެޑްވޭވުން ބުނީ މި ބަލިމަޑުކަމުގެ ތެރޭގައިވެސް އެ ކުންފުނީގެ އަމާޒަކީ ޒަރޫރީ ކާބޯތަކެތި އެންމެ ހެޔޮއަގުގައި ކަސްޓަމަރުންނަށް ފޯރުކޮށްދިނުންކަމަށެވެ.

މީގެ އިތުރުންވެސް ރޯދަމަހާ ދިމާކޮށް ހައިސެންސް އަދި ޝާޕް ބްރޭންޑުގެ  އިލެކްޓްރޯނިކްސްގެ އިތުރުން ރޯދައަށް ހާއްސަ ގިނަ އައިޓަމްތަކެއް ވަރަށް ހެޔޮއަގުގައި ރެޑްވޭވްގެ ފިހާރަތަކުން ލިބެން ހުންނާނެ ކަމަށްވެސް އެކުންފުނިން މައުލޫމާތުދެއެވެ.