ބާޒާރުގައި ހުރި އެންމެ އަގު ދަށް ބޭސްކާން އާންމުންނަށް މަޖުބޫރުކުރުމަކީ ކަންބޮޑުވުމެއް – އެމްޕީއެޗްޑީއޭ

ބާޒާރުގައި ހުންނަ އެންމެ އަގު ދަށްބޭސް ކެއުމަށް އާންމުންނަށް މަޖުބޫރު ނުކުރުމަށް މޯލްޑިވްސް ފާމަސޫޓިކަލް އެންޑް ހެލްތުކެއާ ޑިސްޓްރިބިއުޝަން އެސޯސިއޭޝަން (އެމްޕީއެޗްޑީއޭ)އިން ގޮވާލައިފި އެވެ.

އެމްޕީއެޗްޑީއޭ އިން ބުނީ މޯލްޑިވްސް ފުޑް އެންޑް ޑްރަގް އޮޓޯރިޓީ އިން ސަރުކާރުން ކަނޑައަޅާފައިވާ މެކްސިމަމް ރީޓެއިލް ޕްރައިސް (އެމްއާރުޕީ) ރިވިއުކުރުމުން، މާކެޓުގައި ހުރި އެންމެ އަގު ދަށް ބޭސް ކާން ދިނުމަށް އާސަންދައިން ނިންމާފައިވާ ކަމަށާއި އެކަމާމެދު ކަންބޮޑުވާ ކަމަށެވެ.

advertisement

އެ ޖަމިއްޔާއިން ބުނީ 1980 ގައި ސަރުކާރުން އެކުލަވާލި ބޭސް އެތެރެކުރުމާ ބެހޭ ގަވާއިދުގައިވެސް އެމްއާރުޕީ ކަނޑައަޅާފައިވާ ކަމަށާއި، އެ ގަވާއިދަށް މިފަހުން ގެނައި ބަދަލާއެކު މާކެޓުގައި ހުރި އެންމެ އަގު ދަށް ބޭސް ފޯރުކޮށްދޭން އާސަންދައިން ކަނޑައެޅުމަކީ ވަރަށް ބޮޑު ގޯހެއް ކަމަށެވެ.

އާސަންދަ ޕޯޓަލްއިން އެންމެ ދަށް އަގުގެ ބޭސް ލިބޭ ގޮތަށް ކަނޑައެޅުމުން ރައްޔިތުންނަށް އެންމެ އަގުދަށް ބޭސްކާން މަޖުބޫރުވާކަމަށާއި، މިއީ ދާއިމީ ބަލިތަކުގައި ދިގު މުއްދަތަށް ބޭސް ބޭނުން ކުރަން ޖެހޭ މީހުންނަށް ވެސް ލިބޭ ވަރަށް ބޮޑު ގެއްލުމެއްކަމަށް މޯލްޑިވްސް ފާމަސޫޓިކަލް އެންޑް ހެލްތުކެއާ ޑިސްޓްރިބިއުޝަން އެސޯސިއޭޝަނުން ވަނީ ބުނެފައެވެ.

އެ ޖަމިއްޔާއިން ބުނީ އާސަންދަ ބޭސް ސިޓީއަށް ބޭސް ނަގާއިރު އެމީހަކު ބޭނުންވާ ކޮލިޓީއެއްގެ ބޭހެއް ނެގުމުގެ ފުރުސަތު މިހާރު ލިބިދޭ ކަމަށެވެ. ނަމަވެސް ގަވާއިދަށް ގެނައި ބަދަލާއެކު މާކެޓުގައި ހުރި އެންމެ އަގު ދަށް ބޭސް ފޯރުކޮށްދޭން އާސަންދައިން ކަނޑައެޅުމަކީ ކަންބޮޑުވާ ކަމެއްކަމަށެވެ.

އެމްއާރުޕީ ކަނޑައެޅުމުގައި އެ ޖަމިއްޔާއާއި އިންޑަސްޓްރީގެ ގިނަ ފަރާތްތަކުގެ ހިޔާލު ހޯދާފައިނުވާ ކަމަށް ވެސް ފާމަސީ ޖަމިއްޔާއިން ވަނީ ބުނެފައެވެ.