މަސްތުވާތަކެތީގެ މައްސަލައެއްގައި ފުރަތަމަ ފަހަރަށް މަނީ ލޯންޑަރިންގެ ދައުވާކޮށްފި

މަސްތުވާތަކެތީގެ މައްސަލައެއްގައި ފުރަތަމަ ފަހަރަށް އެކަމުގައި ޝާމިލްވާ ބައެއްގެ މައްޗަށް މަނީ ލޯންޑަރިންގެ ދައުވާކޮށްފިއެވެ. މި ދައުވާކޮށްފައިވަނީ މަސްތުވާތަކެތި އަތުލައިގަތް މައްސަލައެއްގައި، ފައިސާ ދައުރުކޮށްފައިވާ ގޮތް ބަލައިގެންނެވެ. މިއީ ރާއްޖޭގައި މިފަދަ މައްސަލައެއްގައި ފުރަތަމަ ފަހަރަށް މަނީ ލޯންޑަރިންގެ ދަޢުވާކުރި ފަހަރެވެ.

ޕްރޮސިކިއުޓަރ ޖެނަރަލް ޙުސައިން ޝަމީމް ވިދާޅުވީ މަސްތުވާތަކެތީގެ ވިޔަފާރިން ހޯދާ ފައިސާ، އެހެން ކަންކަމަށް ބޭނުންކުރާނަމަ، މަނީ ލޯންޑަރިންގެ ދައުވާ ކުރަން ޤާނޫނު ޖާގަދީފައިވާއިރު، ޕީޖީ އޮފީހުގެ ސިޔާސަތަކީ، އެމަގުން ދިއުމަށްކަމަށެވެ.

advertisement

ޝަމީމް ވިދާޅުވީ އެބާވަތުގެ ފުރަތަމަ މައްސަލަ، މިމަހުގެ 18 ވަނަ ދުވަހު ކުރިމިނަލް ކޯޓަށް ހުށަހަޅާފައިވާކަމަށެވެ.

ޕީޖީ ޝަމީމް ވިދާޅުވީ މަސްތުވާތަކެތި ރާއްޖެ އެތެރެކޮށް އޭގެ ވިޔަފާރިކުރާ މީހުންގެ ފަހަތުން ދާންޖެހޭއިރު، ފުލުހުންގެ ބުރަ މަސައްކަތުން އެކަމުގައި އުޅޭ ނެޓްވޯރކްތައް ރޫޅާލެވިފައިވާކަމަށެވެ. އަދި ދެންއޮތް މަރުހަލާއަކީ އެކަމުގައި ހަރަކާތްތެރިވާ އަޞްލު “ވިޔަފާރިވެރިން” ފަހަތުން ދިއުންކަމަށްވެސް ޝަމީމް ވިދާޅުވިއެވެ.

ޕީޖީ ވިދާޅުވީ މަސްތުވާތަކެތީގެ މައްސަލަ ޙައްލުކުރުމަށް ޖިނާއީ ޢަދުލުގެ ނިޒާމުން ކުރާ މަސައްކަތުގެ މައިގަނޑު އަމާޒަކީ މަސްތުވާތަކެތީގެ ވިޔަފާރިން މަންފާވާ، ފަރާތްތަކުގެ ފަހަތުން ދިއުންކަމުގައެވެ.
މިމައްސަލަ ޙައްލުކުރުމަށް ހުރިހާ ސަރުކާރަކުންވެސް މަސައްކަތްކޮށްފައިވާކަމަށާއި، މަސްތުވާތަކެތި ބޭނުންކުރާ މީހުންނަށް ފަރުވާ ދިނުން ހަރުދަނާ ކުރުމުގެ މަސައްކަތް ސަރުކާރުން ކުރައްވާކަމަށް ޕީޖީ ޝަމީމް ފާހަގަކުރެއްވިއެވެ.