ވިލިމާލޭގައި 10 ބުރިއަށް އިމާރާތްކުރެވޭގޮތް ހަދާނަން – މުއިއްޒު

ވިލިމާލޭގައި 10 ބުރިއަށް އިމާރާތް ކުރެވޭނެ ގޮތް ހައްދަވައިދެއްވާނެކަމަށް ކުރީގެ ހައުސިން މިނިސްޓަރު އަދި ކުރިއަށް އޮތް ކައުންސިލް އިންތިހާބްގައި މާލޭގެ މޭޔަރު ކަމަށް ވާދަކުރައްވާ ޑރ. މުހައްމަދު މުއިއްޒު ވިދާޅުވެއްޖެ އެވެ.

މުއިއްޒު މިހެން ވިދާޅުވީ، ވިލިމާލޭ ކައުންސިލަށް ވާދަކުރައްވާ ޕީޕީއެމްގެ ކެންޑިޑޭޓް ނަހުލާ އަލީގެ ކެމްޕޭން ޖަގަހަ ހުޅުވުމަށް ބޭއްވި ޖަލްސާގައި ވާހަކަދައްކަވަމުންނެވެ.

advertisement

މި ޖަލްސާގައި ވާހަކަދައްކަވަމުން މުއިއްޒު ވިދާޅުވީ، ވިލިމާލޭގެ ރައްޔިތުންނަށް ދޭނެ ޔަގީންކަމަކީ މާލޭގެ އެހެން އަވައްތަކެކޭ އެއްގޮތަށް ވިލިމާލެއަކީވެސް އެގޮތަށް ތަރައްގީ ކުރެވިފައި އޮތް ތަނަކަށް ހެދުންކަމަށެވެ. އެކަން ކުރުމުގައި ސަރުކާރަށް ހުށަހަޅަން ޖެހޭ ކަންކަން ހުށަހެޅުމުގެ ފަހަތަކަށް ނުޖެހޭނެކަމަށް މުއިއްޒު ވަނީ ވިދާޅުވެފައެވެ.

ވިލިމާލޭގެ ބޯހިޔާވަހިކަގެ މައްސަލަ ހައްލުކުރުމަށް ދިމާވެފައިވާ އެންމެ ބޮޑު ގޮންޖެހުމެއް ކަމަށް މުއިއްޒު ފާހަގަކުރެއްވީ އިމާރާތް ކުރުމުގައި މިހާރު އޮތް ގަވައިދުތަކެވެ. މާލޭގައި 10 ބުރިއަށް ގެހެދުމުގެ ހުއްދަ އޮންނަ ނަމަވެސް ވިލިމާލޭގައި އެހާ އުސްކޮށް ގެ ހަދާކަށް ހުއްދަ އެއް ނުދެ އެވެ. އެހެންކަމުން އެކަން ބަދަލުކޮށް ވިލިމާލޭގައިވެސް 10 ބުރިއަށް ގެހެދޭ ގޮތަށް ގަވައިދު ބަދަލުކުރައްވާނެކަމަށް މި ޖަލްސާގައި މުއިއްޒު ވަނީ ވިދާޅުވެފައެވެ.

މުއިއްޒު ވިދާޅުވީ، ވިލިމާލޭގެ ރައްޔިތުންނަށް ދިމާވެފައިވާ އެންމެ ބޮޑު އެއް މައްސަލައަކީ ބޯހިޔާވަހިކަމުގެ މައްސަލަކަމަށެވެ. ވިލިމާލޭގައި ހައުސިން ޔުނިޓްތައް އަޅައި ބޯހިޔާވަހިކަން ފޯރުކޮށްދިނުމަށް ޖާގަ އޮތް ކަން ފާހަގަކުރައްވައި އޭނާ ވިދާޅުވީ، 500 ހައުސިން ޔުނިޓް އެޅޭވަރުގެ ޖާގަ ވިލިނގިލީގައި އެބައޮތްކަމަށެވެ.