ކެއާ ސޮސައިޓީގެ ވޮކޭޝަނަލް ޓްރެއިނިން ޔުނިޓަށް ދިރާގުގެ އެހީތެރިކަން

ކެއާ ސޮސައިޓީގެ ވޮކޭޝަނަލް ޓްރެއިނިން ޔުނިޓު (ވީޓީޔޫ) ޕްރޮގްރާމަށް ދިރާގުން އެހީތެރިކަން ފޯރުކޮށްދޭން ނިންމައިފިއެވެ.

މިއަހަރު ކުރިއަށް ގެންދިއުމަށް ހަމަޖެހިފައިވާ ޕްރޮގްރާމްގައި ނުކުޅެދުންތެރިކަން ހުންނަ ކުދިންގެ ތެރެއިން 6 ކުދިން ބައިވެރިވެފައިވާ ކަމަށާއި އޭގެ ތެރޭގައި “ޑައުންސިންޑްރޯމް” ހުންނަ ކުދިން ހިމެނޭ ކަމަށް ދިރާގުން ބުންނެވެ. އަހަރުގެ ޕްރޮގްރާމް ހާއްސަ ކޮށްފައިވަނީ ބޭސިކް ކޮމްޕިއުޓާ ސްކިލް ދަސްކޮށްދިނުމަށް ކަމަށް ދިރާގުން ބުނެއެވެ.

advertisement

މި އަހަރުގެ ޕްރޮގްރާމުގައި ބައިވެރިވާ ކުދިންނަށް މައިކްރޮސޮފްޓުގެ އެޕްލިކޭޝަންތައް ދަސްކޮށްދީ ލެޕްޓޮޕް ނުވަތަ ކޮމްޕިއުޓާ ބަލަހައްޓާނެ ގޮތް ދަސްކޮށްދޭނެ ކަމަށް ކެއާ ސޮސައިޓީން ބުންޏެވެ.

ދުނިޔޭގެ “ޑައުންސިންޑްރޯމް” ދުވަހާއި ގުޅިގެން ބޭއްވި އޮންލައިން ބައްދަލުވުމުގައި ދިރާގުގެ ކޯޕަރޭޓް ސާވިސަސްގެ ޑިރެކްޓަރު އާތިފާ އަލީ ވިދާޅުވީ، ވީޓީޔޫ ޕްރޮގްރާމަށް އެހީތެރިކަން ފޯރުކޮށްދެނީ ނުކުޅެދުންތެރިކަން ހުންނަ ކުދިންނަށް ތަފާތު ހުނަރުތަކާއި ކޮމްޕިއުޓާ ސްކިލް ދަސްކޮށްދޭތީ ކަމަށާއި ކުރިއަށް އޮތްތާނުގައިވެސް އެ ޕްރޮގްރާމަށް ދިރާގުގެ ފަރާތުން އެހީ ފޯރުކޮށްދޭނެ ކަމަށެވެ.

ދިރާގުން މިއަހަރުގެ ވީޓީޔޫ ޕްރޮގްރާމަށް އެހީތެރިކަން ފޯރުކޮށްދީފައިވާއިރު، ވީޓީޔޫ ގާއިމުކުރި 2018 ވަނަ އަހަރުން ފެށިގެން ދިރާގުން އަންނަނީ އެ ޕްރޮގްރާމަށް އެހީތެރިކަން ފޯރުކޮށްދެމުންނެވެ. މި ޕްރޮގްރާމުގެ ދަށުން ނުކުޅެދުންތެރިކަން ހުންނަ ކުދިންނަށް ފެހުމާއި ކްރާފްޓާއި ޑިޒައިނިން ފަދަ ހުނަރުތައް ވަނީ ދަސްކޮށްދީފައެވެ.