ރިސޯޓް ތަރައްޤީކުރަން އުފައްދާފައިވާ ޖޮއިންޓް ވެންޗާގެ ސަރުކާރު ހިއްސާ ވިއްކާލެވޭގޮތް ހަދައިފި

ސަރުކާރު ހިއްސާވެގެން ރިސޯޓު ތަރައްޤީކުރުމަށް އުފައްދާފައިވާ ޖޮއިންޓް ވެންޗަރ ކުންފުނިތަކުގެ ސަރުކާރުގެ ހިއްސާ ވިއްކާލުމާބެހޭ ޤަވާއިދު ގެޒެޓް ކޮށްފިއެވެ.
މި ޤަވައިދު ގެޒެޓްކޮށްފައިވަނީ ފިނޭންސް މިނިސްޓްރީނެވެ. މި ޤަވައިދުގައިވާގޮތުން ސަރުކާރު ހިއްސާވާ ގޮތަށް ހަދާފައިވާ ޖޮއިންޓް ވެންޗަރ ކުންފުނިތަކުގެ ބިންބިމާއި، ފަޅުތަކާއި، ރަށްތަކުގެ ސަރުކާރަށް ނިސްބަތްވާ ހިއްސާ ވިއްކާލެވޭނީ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުގެ ބެލުމުގެ ދަށުންނެވެ.
މިޤަވާއިދުގެ ދަށުން ހިއްސާ ވިއްކާލެވޭނީ ރައީސުލްޖުމުހޫރިއްޔާގެ ލަފާގެ މަތިން ފިނޭންސް މިނިސްޓްރީން ނިންމައިގެންނެވެ. އަދި މިނިސްޓްރީގެ މިނިންމުން ޕްރައިވެޓައިޒޭޝަން ބޯޑަށް އަންގަންވާނެއެވެ. އެގޮތުން ހިއްސާއެއް އަގު ކުރާނީ، ރިޒޯޓު ތަރައްޤީކުރުމަށް ކުއްޔަށް ދޫކުރެވިފައިވާ ތަނުގެ ބޮޑުމިނުގެ ކޮންމެ އަކަމީޓަރަކަށް، އެ ކުންފުނީގައި ހިމެނޭ ސަރުކާރުގެ ހިއްސާގެ، ކޮންމެ އިންސައްތައަކަށް ފަސް އެމެރިކާ ޑޮލަރުގެ މަގުން އަގު ކުރުމަށްފަހު ޖެހޭ އަދަދަށްވާ މިންވަރަށް ކަމަށް ޤަވާއިދުގައި ބުނެއެވެ.
މީގެ އިތުރުން ހިއްސާ ވިއްކާލުމުގެ މުޢާމަލާތް ކުރިއަށް ގެންދަންވާނީ ސަރުކާރުންނާއި ހިއްސާދާރުންނާއެކު ލިޔެކިއުމުން ވެވޭ އެއްބަސްވުމުގެ ދަށުންނެވެ. އަދި ހިއްސާއަށް އަގު މުޅިން އެއްކޮށް އަދާ ކުރެވޭ ގޮތަށް ނުވަތަ ބަހާލައިގެން 18 މަސް ދުވަހުން އަގު އަދާކުރެވޭ ގޮތަށް ހިއްސާ ވިއްކިދާނެއެވެ. އަދި އަގު އަދާ ކުރާތާ ސަރުކާރު ބަންދު ނޫން 15 ދުވަސްތެރޭ ހިއްސާ ބަދަލު ކުރުމާއި ގުޅޭގޮތުން ކުންފުނީގެ ފަރާތުން ފުރިހަމަކުރަންޖެހޭ އިޖުރާއަތުތައް ފުރިހަމަ ކުރަންވާނެއެވެ.
މިޤަވާއިދުގައި ބަޔާން ކުރާ ކުންފުންޏަކީ މި ބޭނުމަށް ސަރުކާރުގެ ހިއްސާއާއެކު އުފެދިފައިވާ ކުންފުންޏެއްގެ ގޮތުގައި ބަލާނީ، ދިވެހިރާއްޖޭ ޓުއަރިޒަމާއި ބެހޭ ޤަނޫނަށް ގެނައި 10 ވަނަ އިސްލާހަށް އަމަލު ކުރުމުގެ ކުރިން އުފެދިފައިވާ ކުންފުންޏެއް ކަމުގައި ވާނަމައެވެ.

advertisement