އެންމެ ބޭހެއްގެ އަގަށް ގެނައި ބަދަލާއިއެކު، އާސަންދައިގެ ހަރަދުން 12 މިލިއަން ރުފިޔާ ސަލާމަތްވެއްޖެ

ރާއްޖެއަށް އެތެރެކުރާ ބޭހެއްގެ އަގު ހިފަހައްޓައި އާސަންދައިގެ ހަރަދުން 12 މިލިއަން ރުފިޔާ ސަލާމަތްކޮށްފިއެވެ.

އާސަންދައިން ބުނީ އަގުގެ ތަފާތު ފާހަގަކުރެވޭ ބޭސްތައް އެތެރެކުރާ ފަރާތްތަކާއެކު އަގު ކުޑަކުރުމަށް އަބަދުވެސް މަޝްވަރާކުރާ ކަމަށާއި ނަމަވެސް ބައެއް ބޭސްތަކަކީ މާކެޓް އެކްސްކްލޫސިވިޓީ ނުވަތަ ވަކި ބަޔަކަށް އެތެރެކުރުމުގެ ހުއްދަ ދީފައިވާ ބޭސްތަކަކަށް ވުމުން އެފަދަ ބޭސްތައް ހަމައަގަށް ގެނައުމުގައި ދަތިތަކާއި ކުރިމަތިވާ ކަމަށެވެ.

advertisement

މާކެޓް އެކްސްކްލޫސިވިޓީ ދީފައިވާ ބޭހެއް ކަމަށްވާ “ޒޮވަންޓާ” ބޭސް އެތެރެކުރާ ފަރާތްތަކާއި މަޝްވަރާކޮށް މިބޭހުގެ އަގު މިހާރު ހެޔޮވެފައިވާކަމަށް އާސަންދައިން ބުނެއެވެ. މި ބޭހުގެ އަގަށް ގެނައި ބަދަލާއިއެކު އަހަރަކު ގާތްގަޑަކަށް 12،000،000 (ބާރަ މިލިޔަން ރުފިޔާ) ސްކީމް ހަރަދުން ކުޑަކުރެވޭނެކަމަށް އެ ކުންފުނިން ބުނެއެވެ.

އާސަންދައިން ބުނީ ސްކީމްގެ ހަރަދު ކުޑަކުރުމަށް، ސްކީމްގެ ތެރެއިން ދޫކުރެވޭ ބޭހުގެ އަގުތައް ރިވިއުކުރުމުގެ މަސައްކަތް އެކުންފުނިން އަބަދުވެސް ކުރަމުންދާ ކަމަށެވެ.

ސްކީމްގެ ހަރަދު ބޮޑުވާ އެއް ސަބަބެއްކަމަށް އާސަންދައިން ފާހަގަކުރީ ބައެއް ފާމަސީތަކުން ބަލިމީހާއަށް އަގު ދަށް ބޭސް ދޫކުރުމަށްފަހު އަގު ބޮޑު ބޭހަށް އާސަންދައަށް ބިލްކުރާތީއެވެ. މީގެއިތުރުން ދިގު މުއްދަތަށް ބޭސްކުރާ ފަރާތްތަކަށް ތިން މަސްދުވަހަށް ޑޮކްޓަރު ލިޔެދެއްވާ ބޭސް ސިޓީއަށް ދެ މަސްދުވަހަށް ބޭސް ދޫކުރުމަށްފަހު، ތިން މަސްދުވަހުގެ ބޭހަށް އާސަންދައަށް ބިލްކުރުން ފަދަ ކަންކަން ފާހަގަވެފައިވާކަމަށް އާސަންދައިން ބުނެއެވެ. އަދި މިފަދަ މައްސަލަތައް ބެލުމަށްފަހު، އޮންނަ އުސޫލުގެ ތެރެއިން ފިޔަވަޅު އަޅާފައިވާ ކަމަށް އެކުންފުނިން ބުނެ އެވެ.

އެފަދަ މައްސަލަތަކަށް ހައްލެއް ހޯދުމަށް އާސަންދައިން ތައާރަފުކުރި ‘ވިނަވި’ ޕޯޓަލް ބޭނުންކުރާ ހުރިހާ މަރުކަޒަކުން، ސްކީމްގެ ދަށުން ކޮންމެ ރައްޔިތަކުވެސް ހޯދާ ހިދުމަތްތަކާއި ނަގާފައިވާ ބޭސްތައް އެޕް މެދުވެރިކޮށް ޗެކްކުރެވޭނެ އެވެ.