ބޮޑެތި ކުއްތައްކުރާ މީހުން ބޭރަށް ފުރާއިރު ވަގުތީ ޓްރެވެލް ޑޮކިއުމަންޓް އެއް

ބޮޑެތި ކުށްތައް ކޮށްފައިވާ މީހުން ރާއްޖެއިން ބޭރަށް ބޭސްފަރުވާއަށް ފުރާނަމަ ޕާސްޕޯޓުގެ ބަދަލުގައި ވަގުތީ ޓްރެވަލް ޑޮކިއުމެންޓެއް ދޭން ޖެހޭ ގޮތަށް އުސޫލު ބަދަލު ކުރަން ޖުޑިޝަރީ ކޮމިޓީއިން އަންގައިފި އެވެ.

ޖިންސީ ކުށުގެ ހަތް ދައުވާއެއް އުފުލާފައިވާ ކުރީގެ ޓުއަރިޒަމް މިނިސްޓަރު އަލީ ވަހީދު ބޭސްފަރުވާއަށް ރާއްޖެއިން ބޭރަށް ފުރުވާލި މައްސަލަ ޖުޑިޝަރީ ކޮމިޓީއިން ނިންމިއިރު އެ މައްސަލަ ނިންމި ގޮތުގެ ރިޕޯޓުގައި ގިނަ ކަންކަން ވަނީ ފާހަގަކޮށްފަ އެވެ.

advertisement

ރިޕޯޓުގައި ފާހަގަކޮށްފައިވާ ކަންކަމުގެ ތެރޭގައި ބޮޑު ކުށެއްގެ ތުހުމަތު ކުރެވޭ މީހަކު ނުވަތަ އެފަދަ ކުށެއްގެ ތަހުޤީގު ހިނގަމުންދާ މީހަކު ރާއްޖޭން ބޭރަށް ފުރާއިރު ޕާސްޕޯޓު ދޫކުރުމުގެ ބަދަލުގައި ވަގުތީ ޓްރެވަލް ޑޮކިއުމެންޓެއް ދޭން ޖެހޭ ގޮތަށް އުސޫލު ބަދަލު ކުރަން ވަނީ އަންގާފައެވެ. އަދި ކުށުގެ ތުހުމަތުވާ މީހާ ފުރައިގެން ދާނެ ތާރީހަކާއި އަންނާނެ ތާރީހެއް ކަނޑައަޅަން ވާނެ ކަމަށްވެސް ބުނެފައިވެ އެވެ.

މީގެއިތުރުން އެމީހާއަކީ ރާއްޖެ ނޫން ގައުމެއްގައި ފިލައިގެން އުޅެވިދާނެ ކަމުގެ މާލީ ތަނަވަސްކަން ހުރި މީހެއްތޯ ބަލަން ވާނެ ކަމަށް ކޮމިޓީގެ އެންގުމުގައި ވަނީ ބުނެފަ އެވެ. އަދި އެ ވަސީލަތްތަކުގެ ބޭނުން ނުހިފާނެ ކަމުގެ ޔަގީންކަން ކޯޓުން ހޯދަން ވާނެ ކަމަށް ވެސް ބުނެފައިވެ އެވެ.

ކޮމިޓީގެ ހުށަހެޅުންތައް ހުށަހަޅުއްވަމުން މުގައްރިރު އިމްތިޔާޒު ފަހުމީ ވިދާޅުވީ ކުށުގެ ތުހުމަތު ކުރެވޭ މީހެއްގެ މައްސަލަ ތަހުގީގު ކުރަމުން ދާ ނަމަވެސް އަދި ދައުވާކޮށްފައިވާ ނަމަވެސް އެމީހަކު ހުރީ ބަންދުގައި ނޫން ކަމަށް ވާނަމަ ގާނޫނުގައި ކަނޑައަޅާފައިވާ ހަމައަކީ އެމީހަކީ ރާއްޖޭން ބޭރަށް އަދި ރާއްޖޭގެ އެއްރަށުން އަނެއް ރަށަށް ދަތުރުކުރުމުގެ ހައްގު އޮތް މީހެއް ކަމަށް ބެލުން ކަމަށެވެ.

އަލީ ވަހީދު ޕާސްޕޯޓު ހިފެހެއްޓި އަމުރު ބާތިލު ކުރީ ހަތަރު މަސްދުވަހުގެ މުއްދަތަށެވެ. އަދި އެ މުއްދަތުގައި އޭނާ ރާއްޖެ ނައިސްފި ނަމަ ޒިންމާ ނަގާނެ ފަރާތެއްގެ ގޮތުގައި އޭނާގެ ރަހުމަތްތެރިޔާ އަދި ޔޫތު މިނިސްޓްރީގެ ސްޓޭޓް މިނިސްޓަރު އައްސަދު އަލީ (އަޑުބަރޭ) ވަނީ ހަމަޖައްސައިފަ އެވެ.