އިދިކޮޅުން ރައީސަށް ގެންދަން އުޅުނު “ބޮޑު ސިޓީ” ހިފަހައްޓައިފި

އިދިކޮޅު ޕީޕީއެމް، ޕީއެންސީން ރައީސް އިބްރާހީމް މުހައްމަދު ސޯލިހަށް ގެންދަން އުޅުނު ބޮޑު ސިޓީއެއް، ފުލުހުން ހުއްޓުވައިފި އެވެ. އިދިކޮޅުން ރައީސަށް ގެންދަން އުޅުނު ބޮޑު ސިޓީގައި ވަނީ އިންޑިއާ އާއި ރާއްޖެއާ ދެމެދު ވަމުންދާ އެއްބަސްވުންތަކުގެ އަޑި ނޭނގޭތީ ކަންބޮޑުވުން ފާޅުކޮށްފައެވެ.

މި ސިޓީ އޮތީ ޕްރިންޓްކޮށް ބޮޑު ފިލައެއްގައި ތަތްކޮށްފައެވެ. މި ސިޓީ ހިފައިގެން އިދިކޮޅު މީހުން ދިޔައީ ހ. ހުރަފާގައި ހުންނަ ޕީޕީއެމް/ޕީއެންސީ އޮފީހުންނެވެ. ފުލުހުން އިދިކޮޅު މީހުން މި ސިޓީއާއިއެކު ހުއްޓުވީ މަޖީދިއްޔާ ސްކޫލާއި ހިސާބުންނެވެ. މައުލޫމާތު ލިބިފައިވާގޮތުގައި މީގެ ކުޑަ ސިޓީއެއް އިދިކޮޅުން ވަނީ ރައީސް އޮފީހަށް ހުށައަޅާފައެވެ.

advertisement

ސިޓީގައި އިދިކޮޅުން ކަންބޮޑުވުން ފާޅުކޮށްފައި އޮތީ މުޅިން ވެސް، އަވަށްޓެރި އިންޑިއާއާ އެކުގައި ސަރުކާރުން ކުރަމުން އަންނަ އެކި އެކި މުއާމަލާތްތަކާ މެދުގަ އެވެ. އެއާ އެކު ބޮޑެތި ތުހުމަތުތައް ކޮށްފައިވެ އެވެ. އިންޑިއާއާ އެކުގައި ސަރުކާރުން ސޮއިކޮށްފައިވާ ބައެއް އެއްބަސްވުންތަކުގެ އަޑި ނޭނގޭ ކަމަށާއި އެ އެއްބަސްވުންތަކުގެ ސަބަބުން ރާއްޖޭގައި ބިރުވެރިކަމެއް އުފެދިފައިވާ ކަމަށް ސިޓީގައި ވަނީ ބުނެފައެވެ.