ސަރުކާރު ކުންފުނިތަކުން މައުލޫމާތު ހޯދޭނެ ކަމަށް ބަޔާންކޮށްފައި އޮތީ ރަނގަޅަށް – ހައިކޯޓް

މައުލޫމާތު ހޯދައި ލިބިގަތުމުގެ ގަވާއިދުގައި ސަރުކާރު ކުންފުނިތަކުން މައުލޫމާތު ހޯދޭނެ ކަމަށް ބަޔާންކޮށްފައި އޮތީ ރަނގަޅަށް ކަމަށް ހައިކޯޓުން ހުކުމްކޮށްފި އެވެ.

މައުލޫމާތު ހޯދައި ލިބިގަތުމުގެ ހައްގުގެ ގާނޫނުގައިވާ ގޮތުން އެ ގާނޫނުގެ ދަށުން މައުލޫމާތު ހޯދޭނީ “ދައުލަތުގެ އިދާރާ”ތަކުންނެވެ. ދައުލަތުގެ އިދާރާކަމަށް ބުނެފައިވަނީ، ވެރިކަން ހިންގާ ފަރާތާއި، ރައްޔިތުންގެ މަޖިލީހާއި އަދުލު އިންސާފު ގާއިމުކުރުމުގެ ބާރާއި މިނިވަން މުއައްސަސާތަކާއި މުސްތަގިއްލު މަގާމުތަކާއި ސަލާމަތީ ހިދުމަތްތަކާއި ގާނޫނުއަސާސީގެ ދަށުން އިންތިހާބުކުރެވޭ ކައުންސިލްތައް ހިމެނޭ ގޮތުގެމަތިންނެވެ.

advertisement

ނަމަވެސް، އެ ގާނޫނުގެ ދަށުން، އައިކޮމްއިން ފަހުން ހެދި މައުލޫމާތު ހޯދައި ލިބިގަތުމުގެ ހައްގުގެ ގަވައިދުގައި ވަނީ އެ މާނައިގެ ތެރެއަށް އިތުރު އިބާރާތެއް ހިމަނާފަ އެވެ. ގާނޫނުގައި ބުނާ މާނައިގެ އިތުރުން، ދައުލަތުން އުފައްދާ ކުންފުނިތައްވެސް ދައުލަތުގެ އިދާރާތަކުގެ ތެރޭގައި ހިމެނޭ ކަމަށް ގަވައިދުގައިވާ އެ މާނައިގައިވެ އެވެ. އެއީ ގާނޫނުގައި އޮތް އިބާރާތަށް، ގާނޫނުގައި ދީފައިވާ މާނައަށް ފުށޫނާރާނެ ގޮތަށް އެ މާނަ އިތުރަށް ތަފްސީލުކޮށްދިނުން ކަމަށް އެޓާނީ ޖެނެރަލްގެ އޮފީހުންނާއި އިންފޮމޭޝަން ކޮމިޝަނަރުގެ އޮފީހުގެ ފަރާތުން މީގެ ކުރިން ބުނެފައިވެ އެވެ.

އެ ގަވާއިދުގައި އެގޮތަށް ބަޔާންކޮށްފައި އޮތީ ގޯސްކޮށް ކަމަށް ބުނެ އެ މާއްދާގައި އެހެން ބަޔާންކުރާ އަކުރު ބާތިލު ކުރަން ހައިކޯޓަށް މައްސަލަ ހުށަހެޅީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އިންނެވެ. އައިކޮމްއިން އެ ގަވާއިދުގައި އެގޮތަށް ހިމެނީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުން ދީފައިވާ ބާރަށް ވުރެ ފުޅާކޮށް، ގާނޫނުގެ އިހްތިސާސްގެ ބޭރުން ކަމަށް އެމްޓީސީގެ ފަރާތުން ބުނެފައިވެ އެވެ.

މައުލޫމާތު ހޯދައި ލިބިގަތުމުގެ ހައްގުގެ ގާނޫނަށް ބެލުމުން، ގަވާއިދު ހެދުމަށް ފުޅާ އިހްތިޔާރެއް އެ ގާނޫނުގެ ދަށުން އިންފޮމޭޝަން ކޮމިޝަނަރަށް ދީފައިވާކަން އޭނާގެ ރައުޔުގައި ފާހަގަކޮށްފައިވެ އެވެ. އެއީ އެ ގާނޫނުގެ ނިޔަތާ އެއްގޮތަށް ގާނޫނު ހިންގުމަށް ބޭނުންވާ ގަވައިދުތައް ހެދުމުގެ ބާރު ކޮމިޝަނަށް ލިބިގެންވާ ކަމަށް ގާނޫނުގައި ބަޔާން ކުރާތީ އެވެ. އަދި އެ ގާނޫނުގެ ނިޔަތާ ގުޅިފައިވާ ކަންކަމަކީ ދައުލަތުގެ އެންމެހާ ކަންކަން ހާމަކަންބޮޑު ގޮތެއްގައި އަދި ޖަވާބުދާރީކުރަނިވި ގޮތެއްގައި ކުރިއަށްގެންދިޔުންކަން އެ ގާނުން އެނގޭ ކަމަށްވެ އެވެ.

ގާނޫނު އެކުލަވާލާފައިވާ ގޮތަށް ބަލާއިރު، ގާނޫނުގައިވާ އުސޫލުތަކުގެ އިތުރުން އެހެން އުސޫލުތައްވެސް ހެދުމުގެ އިހްތިޔާރު އިންފޮމޭޝަން ކޮމިޝަނަރަށް ލިބިގެންވާ ކަމަށްވެސް ހުކުމުގައިވެ އެވެ.

ދައުލަތުގެ ވިޔަފާރި ކުރާ ތަންތަން އެ ގާނޫނުގެ ބާރުގެ ތެރޭގައި ނުހިމެނޭ ކަމަށް ނިންމުމަކީ، ހާމަ ކުރަން ޖެހޭ ކަންކަން ސިއްރުން ފޮރުވައިގެން ތިބެ ކުރުމުގެ ފުރުސަތު ދެވޭނެ ކަމެއް ކަމަށާއި، އެއިރުން ގާނޫނުގެ މަގުސަދު ގެއްލޭނެ ކަމަށް ހުކުމުގައިވެ އެވެ. އަދި އިންފޮމޭޝަން ކޮމިޝަނަރަށް ލިބިދޭ އިހްތިޔާރުގެ ދާއިރާ ހަނިވެ، ގާނޫނަށް ފުރިހަމައަށް އަމަލު ކުރެވޭ ގޮތް ނުވާނެ ކަމަށްވެސް އެ ހުކުމްގައިވެ އެވެ.

އޭގެ އިތުރުން، ސައްހަ ވިޔަފާރީގެ މަސްލަހަތަކަށް ގެއްލުން ލިބޭ ހާލަތެއްގައި މައުލޫމާތު ދޫނުކުރުމުގެ އިހްތިޔާރު ދައުލަތުގެ އިދާރާތަކަށް ލިބިގެންވާ ކަމަށް ގާނޫނުގައި ބަޔާންކުރާކަން ހުކުމުގައި ފާހަގަ ކުރި އެވެ. އެހެން ބަޔާންކޮށްފައިވާއިރު، ސައްހަ ވިޔަފާރީގެ މުއާމަލާތް ދައުލަތުގެ ތަންތަނުގެ ތެރޭގައި ދައުލަތުގެ ވިޔަފާރި ތަންތަން ނޫން އެހެން ތަނަކުން ކުރާނެ ކަމަށް ނުބެލެވޭ ކަމަށް ހުކުމުގައިވެ އެވެ.