ޕާމަނަންޓް ސެކްރެޓަރީންނާއި ގުޅޭގޮތުން ރޮޒެއިނާ ހުށައެޅުއްވި އިސްލާހު ބަލައިގަންނަން ނަޝީދަކަށް ނުފެނޭ

ޕާމަނަންޓް ސެކްރެޓަރީންނާއި ގުޅޭގޮތުން އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ހުށަހެޅުއްވި އިސްލާހުތަކުގެ ބިލް ބަލައި ނުގަތުމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެމްޑީޕީގެ މެމްބަރުންނަށް ލަފާ ދެއްވައިފި އެވެ.

ރޮޒެއިނާ ހުށައެޅުއްވި އިސްލާހުތަކުގެ ބިލުގައި ވަނީ މިނިސްޓަރަށް އިތުބާރު ނުކުރެވޭ ނަމަ ޕާމަނެންޓް ސެކްރެޓަރީން މަގާމުން ވަކިކުރެވޭ ގޮތަށް، އަދި ކައުންސިލަރުންގެ ލަފަޔާއެކު ކައުންސިލްތަކަށް އެންމެ އިސް މުވައްޒަފު އައްޔަންކުރާ ގޮތަށް ސިވިލް ސާވިސް ގާނޫނަށް އިސްލާހު ހުށައަޅުއްވާފައެވެ. ބިލު ބަލައިނުގަތުމަށް ނަޝީދު ލަފާދެއްވީ ޕާލަމެންޓްރީ ގްރޫޕްގެ ވަޓްސްއެޕް ގްރޫޕްގައިކަމަށް މައުލޫމާތުލިބެއެވެ.

advertisement

ޕާމަނެންޓް ސެކްރެޓަރީން ވަޒީފާ އިން ވަކިކުރެވޭނެ ސަބަބެއްގެ ގޮތުގައި މިނިސްޓަރަށް އިތުބާރު ނެތުން ގާނޫނުގައި ހިމަނަން ރޮޒައިނާ ހުށަހެޅުއްވި ބިލުގައި ލިޔެފައިވާ ބައިގެ ސްކްރީންޝޮޓެއް ވަޓްސްއެޕް ގްރޫޕާ ހިއްސާކުރައްވަމުން ނަޝީދު ފުރަތަމަ ވިދާޅުވީ އެ އިސްލާހަށް ތާއީދުކުރަން އެމަނިކުފާނަށް ފެނިވަޑައިނުގަންނަވާ ކަމަށެވެ. އެމަނިކުފާނު އެހެން ވިދާޅުވުމުން ރޮޒައިނާ ވިދާޅުވީ ކޮމިޓީ މަރުހަލާގައި އެކަން އިސްލާހުކުރެވިދާނެ ކަމަށެވެ.

ސިވިލް ސާވިސްގެ ގާނޫނަށް ބަދަލު ގެންނަން ރޮޒައިނާ ހުށަހަޅުއްވާފައިވާ ބިލުގައި، އެ ގާނޫނުގެ 57 ވަނަ މާއްދާގެ (ރ)ގެ ފަހަތަށް އަކުރެއް އިތުރުކުރަން ހުށަހަޅުއްވާފައި ވެ އެވެ. އެއީ ޕާމަނެންޓް ސެކްރެޓަރީ ވަކިކުރާ ސަބަބެއްގެ ގޮތުގައި “މިނިސްޓަރަށް އިތުބާރު ނެތުން” ހިމެނުމަށެވެ.

ސިވިލް ސާވިސް ގާނޫނަށް އެ ބަދަލު ގެނައުމާ ދެކޮޅަށް މަޖިލީހުގެ ޖަލްސާގައި ވެސް އެމަނިކުފާނު މިއަދު ވާހަކަ ދެއްކެވި އެވެ. ބިލުގައިވާ ބަދަލުތައް އެމަނިކުފާނު ސިފަކުރެއްވީ “ޕާމަނެންޓް ސެކްރެޓަރީންގެ މަގާމު ނެތިދިއުން” ކަމަށެވެ.