މ. ދިއްގަރު ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއު އެމްޓީސީސީއިން ފަށައިފި

މ. ދިއްގަރު ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއުގެ އަމަލީ މަސައްކަތް ފަށައިފިއެވެ. މި މަސައްކަތް ފަށާފައިވަނީ އިއްޔެއެވެ.

މި މަޝްރޫއު ފެށުމުގެ ގޮތުން ދިއްގަރުގައި ބޭއްވި ރަސްމިއްޔާތުގައި ދިއްގަރު ދާއިރާގެ މަޖިލިސް މެންބަރު އިކްރާމް ހަސަންއާއި އެމްޓީސީސީގެ އިސްވެރިން ވަނީ ބައިވެރިވެވަޑައިގަންނަވާފައެވެ.

advertisement

އެމްޓީސީސީއާއި މ. ދިއްގަރު ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއު ހަވާލުކޮށްފައިވަނީ މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗައިންނެވެ. މިއީ 121.84 މިލިއަން ރުފިޔާގެ މަޝްރޫއުއެކެވެ. މި މަޝްރޫއުގެ ދަށުން 25 ހެކްޓަރުގެ ބިން ހިއްކުމާއި ބޮޑުހިލައިގެ ރިވެޓްމަންޓެއް ޖެހުމާއި ބޭރުތޮށި ލުމުގެ މަސައްކަތް ހިމެނޭކަމަށް އެމްޓީސީސީއިން ބުނެއެވެ.

އެމްޓީސީސީއަކީ އެއްވަގުތެއްގައި ރާއްޖޭގެ އެކި ކަންކޮޅުތަކުގައި މަޝްރޫއުތައް ހިންގަމުންއަންނަ ކުންފުންޏެކެވެ. ކޮވިޑްގެ ބަލިމަޑުކަމުގައި ކުންފުންޏަށް ދިމާވި ތަފާތު ގޮންޖެހުންތަކާއިއެކުވެސް ކުންފުނީގެ އަމާޒަކީ ނިންމަން ކަނޑައަޅާފައިވާ މުއްދަތައް މަޝްރޫއުތައް ނިންމުންކަމަށް އެ ކުންފުނިން ބުނެއެވެ. އެމްޓީސީސީގެ ތާރީހުގައިވެސް އެންމެ ގިނަ މަޝްރޫއުތައް ހިންގާފައިވާ އަހަރީ މިދިޔަ އަހަރެވެ. މި އަހަރަކީވެސް ގިނަ މަޝްރޫއުތައް ހިންގައި ކާމިޔާބު އަހަރަކަށް ހެދުމަކީ އަމާޒެއްކަމަށް އެ ކުންފުނިން ބުނެއެވެ.